السلام عليكم ورحمة الله وبركاته
الحمد لله إني لقيتكم
أنا مقدمة مشروعي من قبل 10 شهور على الموقع وما جاني أي رد وطنشتهم لأني كنت آخر سنة دراسة
ورحت منتدى التنمية الاجتماعية وكان المدير هناك وقالوا لو في أسئلة اكتبوها وكتبت تساؤل ليش ماجاني رد
لأنه قبلها قال إن الموافقة المبدئية للمقدمين على النت تجي مباشرة وفي نفس الوقت ويطلب دراسة الجدوى وأنا كنت مقدمة من 5 شهور وعاد ما صدقت ابتلش فيه
وكان وقتها المحاور تركي الدخيل والحمد لله أخذ سؤالي من بين الأسئلة وسأله واحرجه
عاد هذاك قال لا مستحيل وقام يخبط في الكلام خلوها تكلم مديرة القسم النسائي وهي موجودة حالياً في القاعة ودورت عليها مالقيتها وطنشت قلت لو ربي كاتب لي فيها الخيرة بتجيني الموافقة
ما عدى كم أسبوع إلا وجات رسالة الموافقة وفيها طلب ارسال دراسة الجدوى وطنشتهم لأنه وقتها كنت بقدم بحث التخرج وأنا أبكي ومني خلقهم هذا كان شهر 6
المهم هذا الشهر جاتني رسالة تم قبول دراسة الجدوى وسيتم تحديد موعد المقابلة
عاد أنا استغربت لأني متأكدة ما أرسلت دراسة الجدوى
قلت يمكن بالغلط
رجعوا ارسلوا عن تحديد موعد المقابلة ، قلت يمكن غلط في السيستم
يوم الأربعاء اللي راح اتصلوا عليه من الرياض حددوا موعد المقابلة يوم الثلاثاء الجاي من 8 إلى 12
ما سألته لأنه أعرف ما بيقول شيء ولا عنده خبر والوقت كان العصر وصوت الرجال رايح فيها
قلت لا طبيت عندهم أسأل كيف وافقوا بدون دراسة جدوى
وعندي 4 أيام عشان أسوي دراسة الجدوى
مدري كيف بصراحة ، أنا حملت الملف من موقعهم وبعبيها بإذن الواحد الأحد من بكرة
أنا مشروعي مدرسة أهلية في جدة للبنات رياض أطفال وإبتدائي
وما أعرف كيف أعرف الإيجار أنا محددة موقع المدرسة في حي الرحاب أو السليمانية أو الصفا
لأن أغلب المدارس في الشمال ومدارس الجنوب يا غاليه يا قرمبع
وأسعار ماتسوى ما أبغى أقول أسماء الله يستر عليهم
أنا حددت المبلغ ب350 ألف ووافقوا واتوقع توصل التكلفة 400 ألف
لأن الإيجار لحاله في حدود 200 ألف
خصوصاً مع شروط البلدية والوزارات يصير الموضوع شيء يخلي الوحدة
بس حكاية إنه بس يقدروا يأجلوا القسط 6 شهور صعبه ما شفتها لما قدمت ولا كان قدمت في بنك التسليف خصوصاً إنه بدون فوائد ويوصل المبلغ لمليون ونص ولو عندك أرض يسلفوكي مبلغ بدون حد أعلى
إيش العمل في دراسة الجدوى ؟
والمكان ؟
كمان دوبي قرأت إني أسدد شهري ؟
طيب المدرسة دخلها نص سنوي من فين أجيب لهم ؟
وعلى فكرة أنا مآخذه القرض بضمان المشروع يعني لا قدر الله صار شيء يآخذوا المشروع كامل أنا لا ليه ولا عليه لأنه أساساً أنا ما امتلك شيء لا أرض ولا بيت ولا حتى زوجي فما في شيء ارهنه
وحطيت في الخيارات بضمان المشروع
شكلي بشوف يوم الثلاثاء واستخير وأكنسلهم وأروح لبنك التسليف لأنهم يعطوا مهلة
سنتين بس لازم يكون رياض أطفال فقط
والمبلغ يوصل لمليون ونص يعني ممكن نشتري المكان مو تأجريه حسب المنطقة لأنه في جدة مستحيل بس اتوقع الرياض ممكن
للي يقدر يفيدني وعنده تجربة
أي أفضل صندوق المئوية أو بنك التسليف ؟
اللي أعرفه
صندوق المئوية يآخذ مبلغ نسبة من القرض لكن التسليف يآخذ 2.5% من أرباح المشروع لدعم المشاريع الباقية
ولقيت إنهم بيتعانوا مع صندوق المئوية في المبالغ الأقل من 400 ألف
هل يعني حتى لو قدمت ي بنك التسليف راح أحول للمئوية ؟؟؟؟؟؟؟؟
28-10-2009, 07:42 AM
العرض العادي
