بسم الله الرحمن الرحيم
السلام عليكم ورحمة الله وبركاته
ان شاء الله تكونون في تمام الصحه والعافيه .
المعلومات اللي عندي بخصوص الدوره التأهيليه الخاصه رقم 3 اللي بيفتح التسجيل فيها يوم الاحد القادم . معلومات كثيره وكلها من واقع تجربه لان التقديم على الدوره اصلاً كان في شهر 8 وانا من اللي قدموا عليها في ذاك الوقت .
على العموم حنا قدمّنا عليها وكل شي وخلصنا الكشف الطبي ومقابلاتنا في الاسبوع الجاي ان شاء الله .
ولكن السبب في انهم فتحوا التسجيل من جديد لان العدد المطلوب ما اكتمل باقي ويبون يكملونه بهذا التقديم ولاعندي اي علم بالارقام المتبقيه للمتقدمين في هذا التقديم ولا عن العدد المطلوب .
الدوره هذي طبعاً أمن سفارات وعلى حسب كلامهم ان التوضيف فيها ممكن يكون في داخل المملكه وممكن خارجها واذا كان في الداخل فطبعاً راح يقتصر على ثلاث مدن الرياض - جده - الشرقيه بحكم تواجد السفارات والقنصليات بهذه المدن .
طبعاً رواتبها ممتازه وفوق 5000 ان شاء الله ودورتها في مدينة الرياض اتوقع 6 أشهر .
طلباتهم طبعاً لم تختلف .
يعني طالبين الطول 175 سم وهالشرط ما اتوقع فيه جدال لانه بالنسبه لهم شرط ضروري واتوقع فيه تعقيب عليهم من ضباط كبار لانهم مايمشون واسطات في هذا الشرط .
ويوم رحنا لهم مدينة التدريب قاسوا الطول من عند البوابه الخارجيه واللي طوله اقل من 175 ماكانوا يدخلونهم للمركز ابداً
الشرط الثاني هو النسبه 75 % وما ادري عن الواسطات ممكن تمشي في النسبه او لا لكن هم فتشوا علينا ذلك اليوم في النسب من عند الباب واللي تحت 75 طلعوهم .
الشرط الثالث اللي هو القدرات 55% وهذي بعد فتشوا عليها من عند الباب واللي ماعندهم قدرات طلعوهم برا .
هذي هي شروطهم بس وفيه شرط واحد وهو حلاقة الرأس بس مو لازم صفر ممكن تخفف اهم شي مايكون شعرك طويل وانت رايح تقدم عليهم .
هذي كل المعلومات اللي عندي وكلها شفتها يوم رحنا نقدم عليهم على نفس الدوره في شهر 8 .
وان شاء الله مقابلاتنا حنا المتقدمين عليهم في ذيك الفتره راح تكون في الاسبوع الجاي .
ان شاء الله ربي يوفقكم ويوفقنا وننقبل ونكون سوا في هذي الدوره .
وفيه ناس من الشباب اللي قدموا معنا ممكن تستفسرون عن اي شي منهم .
اخوكم عبدالله العتيبي