الدرج


بسم الله الرحمن الرحيم

السلام عليكم ورحمة الله


اما بعد,


قسم بالله العظيم اني ماسويت شي ومهوب انا اللي وسخ درج السطوح انه اخوي الصغير وولد خالي العربجي لكن دايم ابوي ما يهاوش الا انا

ابقولكم القصة من البداية وانتم احكموا وشوفوا مين الغلطان


في يوم 15 حزيران الموافق 26 تموز الماضي سمعت قربعة فوق السطوح وجا على بالي ان فيه حرامي ويوم طلعت للسطوح لقيت العرابجة (اخوي وولد خالي) معهم مسامير وخشب ومسوين زحمة يبغون يسوون صندقة!!!

وفوق هذا ماغسلوا رجولهم ووسخوا الدرج بالاتربة والغبار والضباب لدرجة ان الرؤيا انعدمت الى مادون الخمسة امتار وتشوف سكان العمار داقين فليشر واللي ملبق واللي ماسك يمين وماشي بشويش

واللي زاد البلة طين (الطين بلة) انهم راشين موية عشان يبرد الجو..

طبعا انا ما يرضيني الكلام هذا رحت كلمت الوالد اطال الله عمره ويوم عاينت انا واياه موقع الجريمة قال لي: ياولدي معليش انت الكبير....قلت له طيب انا عارف اني انا الكبير وفي واحد من اخواني اكبر يعني لو مافصلت العداد كان صرت اكبر منه

الوالد: ابيك تغسل الدرج
ارخميدس: افااااا يابويه انا اغسل الدرج.....نسيت اني عالم رياضيات ونسيت اني اول من اكتشف ان للمثلث ثلاثة اضلاع
الوالد:ثلاثة اضلاع والا عشرين ضلع غسل الدرج لاهنت

قلت له ابشر


رحت انادي على العرابجة عشان يساعدوني لكن للاسف سحبوا علي بس جابوا صابون ومكانس وافلحوا(هذه كلمة جنوبية وتعني انهم ذهبوا)



كنت وقتها تعبان قلت خلني ابدأ من الدور الارضي وكان شعاري (من قال الشغل عيب) اخذت عفشي وبديت اغسل من تحت لفوق

كل ما يمروا سكان العمارة يتشمتوا فيني .....الله يالزمن....ماعاد احد يقدر العلم والعلماء اجلس طول عمري اكتشف لهم المثلثات والمساطر وساين وكــوسـاين وفي الاخير يستخدمون المثلثات في الجبنة فقط ولا احد يقدرني كعالم عاش في حضارة اليونان!!

غسلت الدور الارضي وطلعت للدور الاول وغسلته ولمعته صار يلق لق.....لدرجة ان جارتنا ام سالم تقول لامي ماشاء الله عندكم حارس عمارة شغله احسن من شغل شركات النظافة!!!

سويت نفسي ما اسمع تعرفون علماء الرياضيات يجيهم صمم مبكر

غسلت الدور الاول والثاني والثالث ووصلت للرابع ويوم وصلت عند باب اخر شقة وانا امسح فتحت وحدة مصرية الباب ويوم شافتني قالت يالهووووووووي انفجت تحسبني حرامي

وتمسكني من ثوبي وتسحبني الين دخلتني عند زوجها يوم شفته قلت انا ميت ميت مافيها كلام بس قلت خلني اجرب السياسة

مسكني من اذني وورفعني فوووق صرت كاني ناطحة سحاب واشوف الطيارات تمر من فوقي بس انزل راسي عشان ما تصدمني الطيارت وما ادري الا طيارة داخلة من تحت الكم حق الثوب!!!!

بعد خمس دقايق من التعليقة دق علي طارق ابو ريحة يقولي تراك طالع في التلفزيون مباشر
قلت له : قول والله
قالي : قسم

واحاول اضبط الثوب وازرر الازارير المقطوعه وابتسم يمكن اطلع في الجريدة والا في قناة العربية

وبعد ربع ساعة نزلني المصري وقالي عايز ايه
قلت انت اللي عايز ايه انت اللي معلقني من اذاني

قال لي : بص ياله

قلت له: آمر

قالي انا حديك علئة مش حتنساها في حياتك..

قلت له : طيب ماعندك احترام للعلماء وخصوصا علماء الرياضيات يعني مثلثات مربعات دواير شي زي كذا؟

وشوي ماعاد شفت شي اشوف لمبات تولع وتطفي توقعت ان الكهرباء ضربت .....اثاريني قاعد انضرب وانا مادري!!!

ما فتحت عيوني الا وانا في الدور الارضي وابوي قدامي

قالي : خير

قلت له : الخير بوجهك.....ابدا ....زحلطت من الدور الرابع

ثم سفهني ابي وذهب..

ويوم فتحت عيوني

اطالع في الدور الارضي والاول والثاني والثالث بعد


واذا بي اتفتق من هول ما رأيت

يالله لقد كأني ما سويت شي كل الوسخ اللي فوق نزل تحت وهذا يعني انه في خلل وهو نفس الخلل اللي ارتكبه القصيبي يوم قرر انه يسعود الوظايف الدنيا

المفترض انه يبدأ من فوق لاني اللي فوق بيحاول يمد يده للي تحت لكن اللي تحت ما يقدر يطلع لفوق لوحده!!


يعني لو سعودوا وظايف مدراء الفروع كان تلقى كل الفروع سعوديين لكن بما ان المدراء اجانب فالقرار سوف يموت في رحم الجشع


تخيلوا ...
شركة ضخمة ما كان فيها ولا اجنبي ويوم جابوا مدير قسم من جنسية عربية خلال ثلاثة شهور صارت نص ادارته من نفس جنسيته.....وشهاداتهم مزروة وبرواتب خيالية!!!!!

اي قرار يتخذه اللي فوق راح يتأثر به اللي تحت

لكن اللي تحت مسكين ما يقدر يصدر قرار....ولا حتى يأثر على احد......

اللي فوق مهما كانت جنسيته راح يحاول انه يوظف اكبر عدد من بني جلدته ولا يهمه العاطلين!!

اللي في الدور الرابع يقدر يكشف كل الادوار اللي تحته..!.!.!.!.!..!.!


ابن البلد اولى بالخير من الاجنبي ولأن القصيبي اصدر قراراه من زاوية وحدة فالله يعينكم على غسيل الدرج وعلى الوسخ والغبار والاتربة




على فكرة لقيت كِرز دخان تحت الدرج وانا اغسله اموووووووووت واعرف حق مين
ولقيت نص ريال مزور (غطا بيبسي ابو نص)


السؤال اللي يطرح نفسه:

مين المفروض انه يغسل الدرج....انا والا اخوي وولد خالي.....والا .......غازي القصيبي؟والنص الريال المزور حق مين؟؟؟
فمان الله



ارخميدس....

هههههههههههههههها
طرح رائع

بوركت

ههههههههههههههه

حلوة

يعطيك العاافيه

والله المفروض ان المصري(المدير) اللي اعطاك العلئة هو اللي يغسل الدرج
ولاننسى غازي القصيبي
ولا انسى العرابجة اخوك وولد خالك (العمالة )
اللي يوسخون كل شئ بالبلد
وماتجي الا على راس المواطن المسكين (اللي هو انت )

قصة رررررررائعة استمتعت فيها يعطيك العافية

قصة رائعة
بس والله في البداية صدقت الموضوع لحد ماوصلت
لطيارات وانك طلعت بالتلفزيون
اسلوب رائع وساخر
يعطيكـ العافية

ارخميدس يا أيها العالم الفذ

اقترح انك تخلي الدرج وسخ لان مافي احد بيغسله لين يجيب الله مطر


شكرا لك ولقصتك الجميلة

الله يعطيك العافيه طرح رائع وجميل
استمتعت به كثيرا

وعليكم السلاام ورحمة الله وبركاااته

الله ياطووول اللّفه وانا ياحليلي دخلت في السالفه >>>طبعاً فيها مثلثات وساينات

آآآهـ ياخوووي تعددت الاسبااب والقصيبي (الموت) واااحد
زين جاات ع الدخاان وع النص المزووور وماخفي كااان اعظم!!!!

مشكله الدرج لها حلّ وااحد ولا تخافوون مو حلّ خمسيني>>مااحب اتعدى ع وزارهـ البطاله

إننا نشيل سيراميك الدرج ونخليه بطحاا عشاان مايباان عليه الوسخ ولا الغباااار يالله الشغله كلها تغطيه خلينا نغطي الدرج بعد عشااان المنظر العاام لازم يكون حضاري!!!


املنا بربنا كبير الله يفرجها

تسلم اخوي استمتعت بطرحكـ