صـيـدلـيـة كـنـتـاكـي للـتـمـويـنـات الـغـذائـيـة << هج افمك يرزقك

خشرم · #1 (**permalink**) 28-10-2009, 02:59 PM

حيــــــــــاكم

اقلطوا

من مكه ومن طيبه... من كل انحاء بلادي

من ابها ومن صفوى... والرمله والوادي

انا جيت

جيتكم ملهوف

... قاصد جداكم حافي ياحلوين المشم

يامرحبمبم

عيال النعمه ... وخطرهم على الجيل الجديد

استغرب صراحه اذا شفت واحد من معارفي او جماعتي مسجّل ولده بمدرسه خاصة ( غاليه )

رغم ان الآدمي حالته الماديّه ( وسط ) ومش أد كده

يعني ما ادري وين يروح المخ هذيك الساعة.. من جد الواحد مايفكر قبل يبزع ؟؟

الحين انت ترمي ولدك بمجتمع غير مجتمعه وبيئه غير بيئته

وراح يختلط بعيال نعمه يختلفون عنه جذرياً في كل شيء

اول شيء --> راح تهتز شخصيته ويحس انه أقل منهم..

وخصوصاً اذا بدأ يقارن بين مصروفه ( المتواضع ) ومصروفهم ( الراهي )

او شنطته اللي بخمسين ريال... وشناطهم اللي فوق المائتين

والأهم من هذا كله اذا جت الطلعة

وجاء ابوه ياخذه بسيارته ( العاديّة ) بين السواويق والجموس والسيارات الاستعراضية

ثاني شيء --> اذا كبر شوي وصار برابع او خامس راح يرهق ابوه بالطلبات

ويبي يحاول قدر الامكان انه يحاكي عيال النعمه زملاءه بكل شيء

يلبس مثلهم وياكل مثلهم ويشتري مثلهم

اذكر واحد من الجماعة... موظف عادي بالمرتبة التاسعة

سجل ولده ( اول متوسط ) بمدارس غالية... وعانى معاناة مو بسيطة

الولد ماعاد يقتنع بشماغ بروجيه بـ70 ريال... وما يبي الا جيفنشي بـ250 ريال

واذا راح للمدرسة يخلي ابوه يوقف بعيد على راس الشارع.. يستحي يشوفون السيارة

ومصروف الولد زاد بشكل جنوني... وماعاد يكفّيه الشيء البسيط

الى درجة انه ذاك اليوم جاه ولده يقول عطني ثلاثمائة ريال !!!

قال له ليش ؟؟

قال الولد : بكرى الدور عندي بالفطور بالمدرسة !!

أثاريهم عيال النعمه كل صبح يرسلون سواويقهم ويجيبون من هرفي وكودو

والولد دخل معهم بالفطور وجاه الدور

ياجماعة والله الموضوع مو سهل ابد

مد رجليك على قد لحافك

ما اقول لاتسجل ولدك في مدارس خاصة... لكن اختر شيء مناسب ومايكون غالي

.

.

عيالك اوّل ياسعادة الوزير.. والا ( خل ماك بـ لزاك )

ضاعت علومنا مع لقاح انفلونزا الخنزورات

<< يدلعهن يدوّر السلامه

ابوربيعه يحلف ويقول ( قسم عظم ان اللقاح مامثله )

والمندسين بعالم النت يقولون عنه كلام يجيب ( ام الهكّي ) وام الركب

وحنّا طايرتن بوهتنا وماندري وش العلم

.. وش الخيره ياوجيه الخير ؟؟

نلقّح... والا مانلقّح ؟؟؟

هو شقردي... والا داشر تسلاب << اقصد اللقاح

فيه فكره مطروحه ومنتازه جداً جداً بالحيل

وسبق استخدامها مع وزير الزراعة وجابت نتيجة ايام انفلونزا الطيور

هذيك الايام قال الوزير : كولوا دجاج وماعليكم الا العافيه... الدجاج سليم

قالوا له : ماناكله الا اذا شفناه على مائدتك العامره طال عمرك

وبالفعل

اعلن الوزير ان الدجاج الوطني يتصدر مائدته يومياً.. وكان هالشيء مصدر راحه للمواطنين

والحين نقول للوزير الربيعه :

ابدأ بعيالك اول ولقّحهم... وساعتها ابشر بعزّك

.

.

على نخرتي

في لبنان...

اكل العنب ( حبه حبه )... على مسؤولية فيروز

وفي القصيم...

( زرط ) السكري ( سطل سطل )... والمسؤولية مقيّدة ضد مجهول

//

//

تدرون وش اكثر شي يرفع ضغطي في الحياة ؟؟

اذا غسلت سيارتي بالليل...

وقمت الصبح متفائل ومنتعش ومسفهل

وانجلط اذا لقيت على القزازة الاماميه هذوليك الخطّين المتوازيين اللي لونهن ابيض

//

//

فرحانين ومتشققين لأن تذاكر المباريات بتصير إلكترونيه

نعن ابو بليسكم البلاء مو بالتذاكر

نبي ( عسكر ) إلكترونيين واقفين على بوابات الملاعب

//

//

الحين بعض الاسواق مثل مركز ( الهرم )

قبل الاذان بنص ساعة يقشّون الحريم وزحلطن بالشارع

وبعد الصلاة بربع ساعة يفتحون الباب وخذ ياتدافع ( ولا رمي الجمرات )

طيب هذولا مايدرون ان نص هالحريم ماخذات اجازة اضطرارية عن الصلاة ؟؟

//

//

محلات الكوفي شوب..

في ايطاليا متخصصه بالاسبريسو والكابوتشينو..

وفي تركيا متخصصه بالقهوة التركية والشاي التركي المغلي بالبخار..

وفي مصر متخصصة بالشاي المصري الكشري والقهوة بـ( وش )

وبالمغرب متخصصة بالشاي الاخضر المغربي

وبالسعودية ( اتحداك ) تلقى أي كوفي شوب متخصص بالدلّه والقدوع !!!

//

//

وش قصّة ( مان ديفان ) ؟؟؟

صحيح انها مساهمة جيدة من عجلان واخوانه لخدمة المجتمع مع بنك التسليف والادخار

وفيها تحقيق للهدف الاساسي وهو ايجاد فرص العمل للشباب السعودي

لكن توزيع المحلات بهالشكل العشوائي يثير الضحك

بالشارع الواحد بين كل بقاله ومغسلة تلقى له فرع

... ماصارت يابوعجلان

//

//

يقولون... والعهده على الراوي

ان فيه وظايف جديدة بتنزل في الخطوط السعودية

وبتوفّر اكثر من ألف فرصة عمل للشباب السعودي الطموح

والمطلوب فيها بس شهادة الثانوي + شويّة ركادة ( يمنع المطافيق )

الوظيفة عبارة عن ( ملبّق طيارات )

فرنقع

من كثر ماحنّيت.. ذابت قزوزي

وصار زيتي ياهوى البال ينقص

مبتعث إمريكا · #2 (**permalink**) 28-10-2009, 04:59 PM

والله انك صادق في المدارس الاهلية يتعبون الاباء بشكل كبير من قسط المرسه ومن عيالهم يبون زي اصحابهم

خشرم · #3 (**permalink**) 28-10-2009, 07:39 PM

حياك............................

حنان البطله · #4 (**permalink**) 28-10-2009, 08:30 PM

انا ماراح ارد ع الموضوع
ابي اعرف وش معنى نكك؟

خشرم · #5 (**permalink**) 28-10-2009, 11:03 PM

اقتباس:

المشاركة الأصلية كتبت بواسطة حنان البطله

ابي اعرف وش معنى نكك؟

هذا اسمي قريتي في مدينة النماص اسم القريه خشــــــــرم..

شوف صورتها:

واذا عجبتك حياك بيتي مفتوح هناك

أبوريفان · #6 (**permalink**) 28-10-2009, 11:41 PM

اقتباس:

المشاركة الأصلية كتبت بواسطة حنان البطله

انا ماراح ارد ع الموضوع
ابي اعرف وش معنى نكك؟

ماله معنى دخلت على كذا موقع أدور خشرم الموقع علق

هبت ريح · #7 (**permalink**) 29-10-2009, 12:05 AM

والنعم والله ببني شهر كلهم

وكللل اهل الجنوب ..

دخلت القي التحية فقط

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

تسجيل الدخول

صـيـدلـيـة كـنـتـاكـي للـتـمـويـنـات الـغـذائـيـة << هج افمك يرزقك

إستراحة الأعضـاء

حيــــــــــاكم اقلطوا من مكه ومن طيبه... من كل انحاء بلادي من ابها ومن صفوى... والرمله والوادي انا جيت

صـيـدلـيـة كـنـتـاكـي للـتـمـويـنـات الـغـذائـيـة << هج افمك يرزقك