السلام عليكم ..

ياشباب ... أريد أن أشتري سيارة جديدة من أجل أن تكون ليموزين على حسابي الخاص حتى أترزق منها .... لكن لمن أذهب حتى أخلّص الأجراآت ؟؟!! أريد أبدأ بالخطوة الأولى !!!

هل أشتري السيارة أولاً ؟؟؟ أم ماذا ؟؟؟

ثانياً سمعت أن الرخصة المطلوبة (( عمومية خفيف ) فهل هذا صحيح ؟؟؟؟

ومن المسئؤول عن طباعة الشعارات على الليموزين ؟؟

ياليت أحد يفيدني بأي معلومة حول هذا الموضوع

للرفع

عليكم السلام ورحمة الله

فعلاً يجب أن تحصل على رخصة عمومي ويكون مسمى وظيفتك متسبب وليس موظف أو خلاف ذلك

وقبل شراء السيارة راجع وزارة المواصلات لتحصل على الشروط اللازمه

ومسألة شعارات الليموزين هذي لدى شركة خاصة

تركب لك العداد والمصباح والشعار


بالتوفيق

بارك الله فيك مشرفنا العزيز على ردك

بالمره !! بما أنك من الدمام أخبرني عن مكان وزارة المواصلات في الدمام !!! أذكر شفتها بس وين ما أدري !!!؟؟؟ أتصلت عليهم بس للأسف ما أحد يرد !!!!

موقعهم شارع 9 وأنت جاي من الإدارة العامة للبريد راح يكون البريد على يمينك

وزارة المواصلات بعد البريد مباشرة قبل جامع الريان وقبل الجوازات

وعلى فكرة وكالة هوينداي المجدوعي عندهم عرض

تاخذ سيارة النترا 2000 سي سي بدون دفعة أولى فقط تدفع رسوم ادارية وقدرها 500 ريال

بالتوفيق اخوي

يا ليت تزور شركة عبداللطيف جميل لخدمة المجتمع يعطونك سياره ليموزين وتسدد لهم قيمة السياره على اقساط واعتقد بدون فوائد.

الله يوفقك وتستاهل كل خير

ياخي انا ماأنصحك ترووح للموااصلات على طوول ..

في عندك في الدمام بنك التسليف ترا شروطه مريحه ..وماتتأخر في استلام السياره

وتعطيك السياره ..على شرووطك <<<<وانصحك انك تاخذ سيار(( نوفا ))ستة مقاعد

واقصادها ..1557 ريال شهريا ..وانت اختر اللون ابيض عشان هم يحطون فيه الشعار ..لو خذت هذي السياره راح تستفيد كثير وخاصتا ان الصيفيه مو بعيده
..راح تلقى مشااويير عائليه لقصوور الافراح ومشااوير داخليه ومشاوير من محطات النقل
الجماعي ومن المطار ومشاوير خارج منطقة الدمام وتقدر تنزل بالسياره مكة في
اوقات الحج بعد ماتاخذ تصريح للحج ..وتكد عليها هنااك وراح تطلع ذهب منهاا وخاصتا ..
وراح تلقى مشاوير للمدرسات او موضفات سواائا داخليه او خارجيه ..ولا تنسى ضع رقمك
على قزاز السياره .عشان يتصلوون عليك وكمان اطبع لك بطاقاات فيها رقمك عشان توزعهاا لزباينك....وانت تشطر في الباقي ..

واما عن الرخصه المطلوبه ...عمومي نقل خفيف <<< فقط

والله يرزقنا واياااكم اجمعيين ..

مشكورين ياشباب على هذه الردود الجميلة والمفيدة جداً وعسى الله لا يحرمكم من الأجر إن شاء الله

بسم الله الرحمن الرحيم

لكم الحب والتقدير ابناء وطني الحبيب
كم انا سيعدا بكم وبكل عباره تقال بهذا المنتدى
((منتدى الرجال))
نعم نحنوا اسرة تلاحم واخاء ومحبه
ادامكم الله وحفظكم وسدد خطاكم ياشباب الوطن
والله ولي التــــــــــــــــــــــــــو فيق
اخوكم /عبدالعزيز

رح لعبداللطيف جميل لخدمة المجتمع يعطونك كامري 2006 على الزيرو......وتسدد لهم بالاقساط وبدون فوائد ويعطونك تأمين طبي........القسط السهري 2100 وعملوا لها دراسة واعتقد انهم نزلوها لـ1500 ريال........