سلام عليكم

كيفكم ؟

دوبي قبل شويه قريت موضوع عن الاخ اللي ضايقه السوداني ف الدوام

تصدقو ؟

انا ضايقني سعودي !!

انا خريج صيدلة بمعدل ممتاز ومتدرب في مدينة الملك عبدالعزيز الطبية ومتخرج بأمتياز

والله لي الاحقية بالوظيفة ف الحرس لكن اختبار اللغة وان شاء الله نعيد وننجح

المهم

قدمت ف شركات ادوية من مكتب العمل

رحت شركتين اللي هما النهدي و سقالة

سقالة .. للمرة الثالثة يقولو اكتفينا .. والله بكيت من القهر

النهدي بواسطة .. كل فترة بعد العيد ومره مدري متى حنسوي اختبار ف التخصص ولا شئ لحد الان !!

طبعا جا الامل بعد تعب

شركة تمر للأدوية

وكان خطابي ف يوم 1 / 9

بالقوة لقيت الموقع ف نص البلد

طبعا غير التصريفات ف التلفون

المهم دخلت وسلمت قال راجع مكتب العمل تلاقي المندوب يوم السبت بعد الظهر

والله من الساعة 9 - 1 الظهر ف مكتب العمل وانا صايم كمان

ولا جا اسبوع اسبوعين نفس الحالة ولا جا

ف الاخير حشرتهم وقالو روح للأستاذ

احمد المدحمي / الله لا يحفظه
المهم بعد لطعه تقريبا ساعتين وانا انتظر طلع عندهم عمارة تانية ورا العمارة اللي تقدم فيها

وارسلوني عليه

استقبلني بكل حفاوة وتقدير < العكس صحيح

جلس ينفخ عليا احنا قبلنا الناس وانتا فينك

قولت انتا فينك ليا 3 اسابيع اطاردك ولا توم وجيري

قالي والله مافي وظايف لكن

لو جاك واحد من اقاربك معاه ثانوي وواحد متخصص

مين توظف

قولت اكيد المتخصص لانه ادرى واولى

قال لا قريبك بالثانوي

اقسم بالله انا انصدمت

قلت وانا غلطان درست بفلوسي وجيت اهين نفسي عندك

المهم دخلني اختبار ع كلامو صيدلة والله يا جماعة انو ولا كلمة ف الصيدلة

انو كلها احصائيات ف جريدة المدينة وعكاظ ومتى كانت مرتفعة مبيعاتها وتتكلم عن نفسك

لا ويهزئني يقول مصيبة ازا ما تعرف تجاوب اسئلة تافهه

طبعا كدب عليا وقال واحد صاحبك قبلناه ولما قابلت الولد والله يحلفلي ولا اتصل عليه حتى

ولما حشره قال ليه ما ترسلي مسج !!

وللأسف لا رد عليه مسج ولا مكالمة

وواحد اختبر معايا سواق معاه رخصة عمومي

تصدقو اختبرو انقلش !!

الولد معاه سادس ابتدائي ؟

لا وينفخ عليه يقول اللي يبغى الوظيفة بيلقى



انا رايح اشتكيه اقسم بالله ما اتنازل عن حقي ماابغى الوظيفة لكن والله لاحرمه زي ما حرمني شئ استاهله

اسئلكم بالله اش نسوي لمين نشتكي ؟؟