السلام عليكم ورحمه الله
احبتي في منتديات حلول البطاله

ابي المشوره منكم في بعض الافكار التجاريه المناسبه لرأس المال المتوفر حاليا لدي.
لدي مبلغ وقدره 60 الف ريال سعودي .ووبالي كذا مشروع واحترت بينهم وبقوقلها لكم .
1-شراء سياره دينا اسوزو.
اقوم بشراء دينه بالمبلغ وبتجيب لي موديل 2003 تقريبا وهذا كلام قريب لي له خبره بالدينات .يقول اشتر دينه واجرها على هندي بـ 2000 ريال شهريا ويكون بينك وبينه عقد موقع ومعتمد من الغرفه التجاريه.


2-فتح محل لبيع المكسرات.
اقوم بفتح محل لبيع المكسرات الراقيه مثل باجه والرفاعي بس بدون ما ابيع الالبطاطس والبسكويت مثل اغلب المحلات .بس شغلي كله على مكسرات راقيه وبعض الفواكه المجففه مثل اللي عند الرفاعي. يعني شغلي كله تمام وشغل عدل وبضاعه راقيه ونضيفه ,وحصلت دعم من جاري وهو رجل اعمال قال افتح المحل وبجيب الشركات للمحل عندك ينزلون بالسعر اللي اخذه منهم.بس بفتح عند الاسواق والمجمعات النسائيه .بس لقيت الايجار غالي تقريبا يوصل 35 الف ريال للسنه.

3-فتح سوبر ماركت.
افتح بقاله واجرها على العامل بمبلغ متفق عليه بالشهر ,لأن ولد عمي عنده محلات تجاريه للجمله مثل محلات العثيم .يعني بيجيب لي البضاعه وينزلها عندي تقريبا براس المال.

4- فتح بوفيه .
افتح بوفيه وبجيب عامل له خبره بالشغل .طبعا العمال حاليا بالهند .وبحطها بمكان حلو ومناسب.

5- محل بيع الخضار.
اقوم بفتح محل للخضار بس البضاعه تختلف عن غيري واكون مميز بحيث كل البضاعه عندي زراعه عضويه وطبيعي .اخذ الباضعه من مزرعه قريب لي شهوور جدا بالمملكه ولديه مزارع بالمملكه ويزرع زراعه عضويه اخذ منه واعرض وابيع .

6- تسديد قرض بنكي.

لدي قرض ببنك الراجحي وقدره 100 الف ريال . اسدد القرض بدل ما ياخذ مني 2000 شهريا ,بس فكرت فيها قلت مبلغ حلو بيدي احطه بمشروع يدر علي 2000 افضل لي واقدر اطوره مستقبلا .



7- اتزوج بها ثانيه:o.(بدون ضحك رجاءا)
اتزوج بها ثانيه ,والله يعيني على وجع الراس مع العلم اني متزوج تقريبا لي سنه بس الأجواء مغبره .

ويا ناس انا والله جااااد بس محتار
ابي مشورتكم وبستخير
والله يكتب لي الخيره ويوفقني ويوفق كل انسان بالرزق الحلال.