السلام عليكم ورحمة الله وبركاته
أسعد الله مسائكم - صباحكم بكل خير
لدي افكار كثيره واحببت ان افيدكم بحكم اني من اهل مكه المكرمه وتاجر على قد الحال يارب لك الحمد واسأل الله ان يجمعني بمدينتنا الغالية مكه المكرمه بأقرب وقت ممكن وان يعينني على بعدي عنها .

المهم هذي الأفكار واسأل الله لكم الفائدة وهي من اعدادي:

أولا مشروع بطائق سوى :
[IMG]http://www.sh4sa.net/images/Item/2112_2_****2.bmp[/IMG]

تروح ياطول العمر على الكعكيه بجانب بيتزا بوفيه يوجد محل معروف مختص ببيع بطاقات الشحن سوى - موبايلي - زين بأسعار جملة الجمله أو اي مكان اخر تعرفه يبيع بطائق بالجمله بعد كذا تروح اي محل قزاز تسويلك صندوق قزاز 50 سم في 50 سم ويكون فيه قفل عشان تحط البطايق بداخله وتقفله وماراح يكلفك اكثر من 100 ريال مع القفل أبو 4 ريال وشفلك طاوله وكرسي صغار عشان ماتتعب من شيلتهم وروح عند أي سوق بالعزيزيه أو عند الحرم وحط الطاوله والكرسي والصندوق فيه البطايق واجلس وتوكل على الله وشوف الرزق الي بيجيك واعرف ناس اشتغلوا فيها وانا منهم عينوا خير بفضل من الله علماً ان هذه المفكره مطبقه بجانب الحرم النبوي بالمدينه بالمواسم أو بدون المواسم واشوفهم دايماً وبالنسبه لرأس مال المشروع شوف كم عندك تكفيك من 1000 الى 4000 ريال ان شاءالله.

ثانياً مشروع اكسسوارات الاتصالات :

قد اشتغلت بالمشروع ذا ويارب لك الحمد فيه خير كثير اهم شي اختيار المكان المناسب والأشياء المطلوبه منك تشتري 1-شواحن سفريه 2- تعاليق الي تعلق الجوال فيها وتحطها على رقبتك طبعا الشواحن من جده شارع فلسطين محلات جملة الجمله تلاقي الشواحن السفرية بريالين الى 3 ريال للحبه وتبيعها ب10 ريال فقط لاتكون طماع عشان الي ياخذ منك حبه تخليه يجيب الي ياخذ منك حبتين أما التعاليق تحصل انواع بريال وريالين وتبيعها ب10 ريال بالراحه تنباع معك اهم شي سوي تشكيله حلوه وشفلك مكان حلو بجانب سوق أو بجانب الحرم وطاوله وكرسي صغار وابسط والله يرزقك علماً أن تكلفة هذا المشروع اقل من 600 ريال .

ثالثاً مشروع بيع الساعات :

تروح جده البلد فيه الساعات الي اشكالها حلوه جدا ورخيصه يا اخوان وبعضهم يبيعونها بالكيلو وتجيك كل ساعه في كيس وماتكلفك الساعه أكثر من 3 ريال وتشتريلك كميه كبيره واشكال كثيره
وشفلك مكان مميز مثل ماذكرت وابسط وبيع الحبه على 5 ريال لاتكون طماع وصدقني الي يفكر ياخذ منك 4 حبات هدايا راح ياخذ منك 8 حبات والله يرزقك.

رابعاً مشروع الشاهي والحليب والبساكيت الخفيفه:

هذا المشروع ماشي وناجح ولكن عيبه البلديه تسويلك رجه يمكن تتساهل معك بباقي المشاريع لكن ذا ممكن تسوي زحمه شوي المهم تشتري بالجمله بساكيت وبفات وكروسون وأشياء خفيفه وتجيب ترمس كبير تعبيه مويه حاره وتبيع والله يرزقك والمشروع ذا فيه خير ومايكلفلك اكثر من 500 ريال.

خامساً مشروع بيع الفواكه:

تروح الحلقه من الفجر تشتري فواكه منوعه برتقال تفاح موز وخلافه وتبيعها بالجمله عند اقرب سوق أو عند الحرم أو عند المساجد الي يكثر فيها الحجاج وباذن الله راح تعين خير وفير لانه البيع راح يكون بالكيلو وماراح يكلفك المشروع اكثر من 500 ريال .

سادساً مشروع بيع دهن العود والبخور :

تاخذلك بالجمله مجموعه طيبه واسعارها طيبه من المبثوث والبخور ودهن العود بالنسبه للبخور انصحكم بالبخور الصناعي الاندنوسي نوعيه ممتازه جدا وريحته طيبه ويزبد ويخلي الي مايشتري يشتري وسعر الكيلو تقريبا 500 الى 1000 حسب نوع البخور وصدقوني بتعينوا خير من هذا المشروع لانه مجرب اهم شي الأسلوب والصدق يعني تاخذ دهن عود كمبودي درجة ثانيه بالجمله يكلفك النص كيلو تقريبا 400 ريال هذا الشاطر والي يقدر يجيبه بالسعر ذا لانه ذا سعر جملة الجملة وتقدر من ال400 تطلع منها 3000 بالراحه صافي ربح غير باقي الأنواع وباقي البخور
وطبعا لازم تشفلك مكان مناسب مثل ماذكرت واسلوبك في التسويق يكون ممتاز والله يرزقك وماراح يكلفلك المشروع اكثر من 1500 الى 2000 ريال لو نوعت بين المتوسط وابو مشي حالك.

سابعاً : المواشي

تروح لأصحاب الحلال وتاخذ اسعارهم ولك على كل راس عشرة ريال طبعاً وتروح للحملات وتسوقها طبعا هذا المشروع ما انصح فيه الي ماقد دخل فيه لانه منتشر بكثره والمندوبين الي زي كذا تحصلهم زي الرز وهذا من واقع خبرة طبعا المشروع مايكلفك ريال واحد .

ثامناً : الخردوات

تروح على الخاسكيه بجده تاخذلك خردوات ابو ريالين زي مثلا الكاسات المقصات الساعات الخشبيه وغيره الكثير من الخردوات ومايحتاج اقلكم عليها طبعا تاخذها بسعر الجمله اذا مره بتلاقي القطعه ب3 ريال وفيه قطع بريال زي الأقلام وتجيك حلوه وغيره وغيره وتبيع القطعه بخمسه ريال انت اهم شي تشفلك موقع ممتاز والبيع يكون ب5 ب10 وتبسط والله يرزقك وماراح يكلفك المشروع اكثر من 800 ريال وباذن الله راح تعين خير.

تاسعاً : الألعاب


تروح على الخاسكية بجده تاخذلك مجموعه كبيره من الألعاب الي درزنها ب8 ريال و10 ريال و12 المهم القطعه ماتطلع عليك بأكثر من ريالين وتاخذ مجموعه وتنوعها تاخذلك 1000 قطعه مثلا مابتكلفك 500 ريال ان شاءالله وتروح وتبسطها وتبيعها ب5 ريال للقطعه بموقع ممتاز والله يرزقك ومثل ماذكرت ماراح يكلفك المشروع 500 ريال

عاشراً التمور

طبعا الكل يعرف التمور وفائدتها ومين الي مايحب التمور وبالذات الحجاج يحب يشتروها من مكه لهم أو لأقاربهم كهدايا فتروحوا ياطويلن العمر تاخذولكم من محلات ممتازه بجملة الجملة تمور طيبه اهم شي لايكلفكم الدرزن ابو نص كيلو أكثر من 150 ريال وفيه انواع طيبه وتلاقي الدرزن ب120 ريال لانه الحجاج مايبغوا شي غالي وهذا من واقع خبره والي يمشي الطيب والي سعره طيب يعني لو تبيع النص كيلو من 15 ل20 ريال ممتاز وممكن تضيف فكره مميزه وتجبلك خير تروح تكلم الوالده ربي يحفظها لك وتجبلها البر أو الدقيق والتمر المعجون وتطلب منها معمول تسويلك كميه كبيره وتساعدها وحطها بعلب بلاستيك وبيع الكرتون ب10 الى 15 ريال وصدقني هذي ربحها يمكن 3 اضعاف راس مالك اذا مو اكثر يمكن اهم شي لاتاكل المعمول كله وانت رايح تبيع وطبعاً تتحرك ولا تجلس بالبيت وتقول وش اسوي ولا وش اشتغل وخلي اهلك ينبسطو منك طبعا المشروع ذا ماراح يكلفك أكثر من 1000 الى 1500 ريال .

المشروع رقم 11 بيع النظارات:

طبعاً النظارات الشمسيه لها سوقها واسعارها حلوه تقد تاخذها من الخاسكيه حسب الأنواع بالدرزن تقريبا تلاقي الدرزن من 3 ريال النظارة إلى 7 ريال وتضيف أيضا كم درزن علب اعتقد تطلع العلبه عليك ب5 ريال اذا كانت علبة ماركه أو ب4 ريال اذا كانت علبة نظاره عادية وانا قد اشتغلت من زمان بهالشغله ويارب لك الحمد فيها خيرا يا أخوان اهم شي سوي تشكليه حلوه رجالي ونسائي والله يرزقكم اهم شي موقع ممتاز واسلوب مميز يعني قله النظاره شكلها حلو النظاره استايلها جديد ومن ذا الكلام والبيع يكون من 20 ل30 ريال علما ان التكلفه راح تكون عليك من 8 ريال ل13 ريال وككل المشروع ماراح يكلفك اكثر من 700 ريال.


طبعاً هذي المشاريع الي في بالي وكتبتها على عجل واتمنى من الله عز وجل ان تكون ذو فائدة لكم واعذروني سواء على الأخطاء الإملائية أو عدم التنسيق والترتيب وذلك لعجلتي بكتابة الموضوع وانشغالي وأسألكم بالله الدعاء لي بالصحه والعافية وبأن يرزقني الله رزقاً طيباً مباركاً واي استفسار ان شاءالله الي اقدر عليه اساعدكم فيه وفي حال استجدت افكار لدي سأضعها هنا ان شاءالله.

قام باعداد الموضوع وكتابتة في منتديات حلول البطالة
اخوكم ابو عبدالله
يوم الإثنين 28-11-1430هـ
محمد العطاس
وحقوق الموضوع لكل مسلم

جزاك الله خيراخوي محمد على المجهود الي بذلته وأن شاء الله تعالى يستفيد منه احد ويدعوا لك دعوه في ضهر

الغيب

بصراحه مشاريع جيده وسوف اضيف نقطه مهمه جدا

مميزات المشروع الناجح خاصة في المواسم القصيره مثل الحج :
1- ان تكون البضاعه صغيره الحجم لسهولة النقل والتخزين
2- ان لاتكون البضاعه لها صلاحيه اوتعتمد على موديل او تكون لايستفاد منها الا وقت الحج فقط فلو تبقى معك كميات كبيره فأنك لن تستفيد شي اما بأنتهاء صلاحيتها مثل الفواكه وغيرها وهكذا .
3- ان تكون بضاعتك في المقام الاول من الحاجات الأساسية للحجاج وليس من الكماليات .
يمعنى اوضح احسب حسابك وفكر في لو لم تستطع بيع كامل بضاعتك في موسم الحج ماذا ستفعل بها لاسيما اذا كانت كبيره فالتاجر الناجح يضع له خط للرجعه بمعنى يعرف طريق الذهاب ولا يعرف طريق الرجوع او يعرف طريق الدخول ولا يعرف طريق الخروج

ولكن اخي الكريم ادرس مشروعك جيدا اذا كان شغلك على مستوي كبير فأن موسم الحج بركه على الجميع
لدرجة انك لو اردت بيع الحجارة وهي بالمجان فستجد من يشتري منك .

وبالتوفيق للجميع ان شاء الله تعالى

اخوكم / ابوابراهيم

ما شاء الله عليك
مشاريع غير مكلفة
ودخلها جيد
وفقك الله
وكتب لك الأجر

رابعاً مشروع الشاهي والحليب والبساكيت الخفيفه:
هذا المشروع ماشي وناجح ولكن عيبه البلديه تسويلك رجه يمكن تتساهل معك بباقي المشاريع لكن ذا ممكن تسوي زحمه شوي المهم تشتري بالجمله بساكيت وبفات وكروسون وأشياء خفيفه وتجيب ترمس كبير تعبيه مويه حاره وتبيع والله يرزقك والمشروع ذا فيه خير ومايكلفلك اكثر من 500 ريال.


انا اشوف ان هذا احسن مشرووع

الله يعطيك العافيه
مشاريعك كلها حلو
لاكن اعجبتني فكره سوا ماعتقد الحجاج يستغنون عنها

مشاريع رائعه حتى لو كان المدخول بسيط بس اسمه رزق يدخل مصروف لو حق شهر يعطيك العافيه وموفق ان شاء الله

ماشاء الله عليك أ. محمد العطاس



افكار رائعه بمعنى الكلمة

وانا برأيي مشروع البطايق و الشاي




الله يجعل هالموضوع في ميزان حسناتك



وبالتوفيق لأهل مكه

بس في مشكلة مهمة ان البلدية ماتسيبك في حالك

استاذ محمد شكرا لك