السلام عليكم ورحمة الله وبركاتة

الصراحة انا محتار وجيت هنا ابي رايكم واستشارتكم واقتراحتكم من اصحاب الخبرة
انا طبعاً عندي بكالريوس حاسب آلي تربوي وعندي لغة انجليزية يعني كويسة
وانا الحين ( عــــــــاطل من خمســة أشهــر ) !

بحثت عن وظائف تكون في مجال الحاسب الآلي ولكن للأسف ما لقيت
ولكن لقيت وظيفة في وزارة حكومية في مركز الحاسب الآلي يعني اللي اتمناها وراتبها كويس مرة بس قالي المدير بعد ما انتهت الاجراءات كلها قالي يمكن ادق عليك بعد اجازة عيد الاضحى باسبوع لأن صراحة صار عندنا خلل في الميزانية وكذا وقام يعني يلف بالموضوع
المهم احسه كذا من اسلوبة يصرفني .

والحين لقيت وظيفة في شركة تأمين كول سنتر خدمة عملاء عن طريق الهاتف
والحمد لله عديت المقابلة وقالولي خلاص بعد ثلاثة ايام تبدأ التدريب وبعدها تبدأ

الحين في راسي اسئلة ما لقيت لها اجابة ! ، اللي هي :

1- انا اخطط اني اعمل في مجال الحاسب الآلي فلو رضيت بوظيفة حقت شركة التأمين فهل هذة الوظيفة حقت الكول سنتر بتفيدني كخبرة حتى اني اعمل في مجال الحاسب الالي أم في ماذا بتفيدني ؟ طبعاً انتوا عارفين دور الخبرة يعني ما يحتاج .

2- هل انتظر الوظيفة اللي قالي عنها الرجال الي في الوزارة مع العلم ان الوظيفة اللي في شركة التأمين يعني صعب اني لقيتها ومالقيت الا هذه الوظيفة وانقبلت فيها والحمد لله ، فلو مثلا تركتها وانتظرت وظيفة الوزارة اخاف بعد هالوظيفة ما القها لان الرجال قالي اذا فيه شيء بدق عليك يعني يصرفني يعني احس كذا مافيه ؟

ملاحظة / الوظيفةحقت شركة التأمين فيها ( عقد ) يعني مثلا لو توظفت فيها ما اقدر اقدم استقالة واطلع لو جتني الوظيفة الثاني حقت الوزارة الا بشرط جزائي ادفعة لشركة ويكون عالي .

3- انا جالس يعني احضر لإختبار التوفل والحمد لله حسيت اني امشي بكل جيد وعشان اخذ الشهادة هذه بدرجة كويس احتاج من 4 الى 6 اشهر كدراسة ، فما هو رأيكم اني اترك هالوظيفتين واكمل دراسة عشان اخذها ، مع العلم اني عاطل الحين لي 5 اشهر ولا خبرة ولا شيء .
تعرفون اختبار التوفل يزيد من فرصة الابتعاث واكمال الدراسـة


اتمنى من اصحاب الخبرة انهم يفيدوني ودعواتي لهم عن غيب
والله يوفقكم ويحقق امانيكم

خذها مني

لا تتوهق مع وظيفة كول سنتر وانت تخصص حاسب آلي

كمل دراستك او انتظر وظيفة الوزارة او قدم على وظيفة غير كول سنتر يعني تكون في مجال تخصصك هذا وهي تعتبر الخبرة الاولى بالنسبة لك لازم تكون في مجال التخصص .

الكول سنتر وظيفة عمياء ما منها فايدة وخبرتها متواضعة

يعني مجرد قضاء وقت

بالتوفيق

انا رايي من راي التعليم الفني ... انت حاسب الي وعندك لغة كويسة صدقني راسل جميع الشركات ومتاكد مليون بالمية انهم بيتصل حد منهم عليك .. اما كول سنتر ما انصحك فيها لانها مو لك ابد ابد
لا وبعد في شركةتامين !!؟؟

نصيحة اصبر شوي وراسل الشركات الكبار واي شركة حتى لو ما طلبو وظيفة بتخصصك بالذات شركات الانترنت اول نت وغيرها .... وانا قد سمعت ان معهدة الادارة يدورون حاسب وعندهم انجليزي روح لهم وقدم

والله يوفقك ... دعواتك لنا

التعليم الفني + اقتصادي

مشكورين على الرد ربي يوفقكم

وافهم من كذا اني اترك الكول سنتر

بس انا ما لقيت وظيفة في مجال الحاسب الآلي دورت وراسلت ( كل الشركات ) وفيه من المراكز الحكوميـة
ومحد دق علي لي 5 اشهر عاطل ما ادري وش اسوي ابي وظيفة في مجالي
وش الحل بديت افكر بأني ( اشتغل تطوعي ) ويكمن ما القى

الوقت يمشي وكل يوم اقول راح القى وظيفة في مجالي اخاف الايام تمشي ولا اشتغلت بشيء

انا محتاج حل وش تقترحون علي ما هو الحـل المنـاسب !!

أنا اللي أعرفه إن موظف الشركة الخاصة إذا جاته
وظيفة حكومية مايقدرون يتفلسفون عليه لأنه شي حكومي
طبعا كلامي من واقع تجربتي مع المدارس الأهلية
قبل ثلاث سنين كنت في مدرسة أهلية ولما وقعت العقد كان فيه شرط جزائي
وجاتني وظيفة تعاقد حكومي ولما بلغتهم كان الوضع عادي جداً..
بس أنا من وجهة نظري إذا كان راتبها يمشي الحال توكل على الله
لحد مايجيك اللي تتمناه .. وقبل أي شي استخير الله ...
... موفق بإذن الله ...

طاغية الانوثة
مشكور على المعلومة الجديدة ربي يوفقك

تحياتي

أنا رأيي من رأي التعليم الفني +اقتصادي +غدووو

ماشاءالله معك بكالوريوس حاسب ولغتك كويسة .. انامتاكدة بتجيك فرصة احسن من خدمة عملاء .. اللي مااعتقد انها بتفيدك كخبرة ..

طيب ماجربت تقدم تدريس؟ ولا ماتبي تكون مدرس؟