السلام عليكم ورحمة الله وبركاته
اليوم طالع مع ناس من الربع حول الثمامه
المهم معهم عيالهم وكل شوي واحد منهم يبي يلعب ( دباب )
المهم طرت في بالي فكره اني احط دبابات زي هالناس المسترزقه واستفيد
الساعه بخمسين ان زادت ستين الساعه
ولقيت رااع جمس ومعه عربيه سحب فيها دبابات ومتنقل معه عامل سودااني وهو سعودي
واول من استاجر منه البزران الصغار الي معنا وعشر دقايق وكل الناس تستااجر منه
مشالله عليه وتقريبا العربيه تشيل تسع دبابات
الي يعرف الطريقه لا يبخل وينفع اخوانه ويعلمهم والي ما يعرف يعطينا رايه
وبيض الله وجيهكم

مشروع ناجح بس فيه مخاطر
وفي اعتقادي وتجنبا للمشاكل والحوادث
ان دخلت راسك المشروع
ان تشتري عدد ثلاثه دبابات واعتقد سعرها من 3000 الى 4000 ويمكن تحصل مستعمل شبه جديد
وتبدا فيها ولاكن الافضل ان لا تؤجرها على شباب كبار افضل
وضع لك ميزه حلوه حتى تقبل عليك العائلات
الا وهي شراء خوذات لحمايه الراس من الحوادث لاسمح الله وبكذا يرتاح اب العائله وانت ترتاح
وهذا الفكرة لم اشاهدها ابدا وممكن تكون ميزة لك وان شفت ان الشغله مربحه ممكن تزود عدد الدبابات وتستغل الاجواء وخروج العائلات هناك سواء بالرياض او غيرها
هذا مالدي اسئل الله لك التوفيق والنجاح
دمت بخير وود

الله يرزقك مشروع ناجح

السلام عليكم ورحمة الله وبركاته
احب اقدم لك بعض المعلومات المفيده
اولا شي تكون متفرغ للشغلة ولديك معرفه تامة بصيانه الدبابات او توفر فني صيانه للدبابات
ثانيا لديك راس مال لتوفير عدد مناسب للدبابات ولتبدا فقط كبداية 4 دبابات
ثالثا توفير عربه لحمل الدبابات
رابعا عمل مسح ميداني لاصحاب الدبابات لمعرفة اسرار الشغله
والسوال عن انواع وماركات الدبابات لانه هناك دبابات في السوق صينية لا تصلح الا لفترة قصيرة وليس لها قطع غيار واحسن نوع هو كمثال( الوسيط ) ماركة دباب
واعرف انه هذه الشغله موسمية وخاصة في فصل الشتاء عندما تمطر السماء ويفرح الناس وطلعون للبر والتنزه
واهم شي اسال نفسك هل انت قادر على كل هذا اعني هل انت حاب الشغله بكل ايجابياتها وسلبياتها
اذا كان الاجابة بنعم فستعن بالله وتوكل عليه
وعمل على ان تخطط وتبدأ في التخطيط ثم تعمل
والله الموفق

انا فكرت بالمشروع لاكن ماعندي راس مال
ولعلمك الي يكسبك اكثر شي الدباب البانشي الساعه 120 ريال والنص 60
وقيمته في السوق الجديد 24 الف وافضل لك نوعية السوزوكي
والمستعمل اتوقع حول 13 الف

وانصحك قبل ماتبدا المشروع روح عند احد المحلات في الثمامه
وروح عند الزوله واجلس معاهم شوي وخذ منهم التفاصييل كللهاا
ويمكن يعرف احد من اصحابه يبي يشتغل مثله
وبعدها خذ رقم صاحب او راعي الدبابات واتصل عليه واستفسر منه

وان شاء الله اني افدتك

في نظري إبحث عن دباب جديد واستأجره لمدة أسبوع أياً كان سعره
واذهب إلى الموقع وجرب بنفسك وانظر لدخله إن كان مناسب فاشتري لك
دبابين وترزق الله كونها موسمية وكان أحد أقربائي له نفس المشروع بالرياض فإن كان
لا زال يعمل فيها سأجعلك تتواصل معه
وفقك الله

بيض الله وجيهكم
والشغله موسميه زي ما قلتو
واشكركم جزيل الشكر

حنـآ نوي وربك الي يسوي //// والعـبد في دنيآهـ منهي ومآمور

بيت احفظه وماعرف اسم شاعره

والله يا اخوي انا مثلك بغيت ادخل في المشروع

بس يوم سويت دراسة جدوى لقيت ان المشروع مكلف .... ومثل ما قالو الاخوان انهو لزم تشتري النوعيات

الممتازة والنوعيات هاذي اسعارها حدود العشرين الف ...... وسئلت عنها وقالو فيها مخاطر كثيرة

اخر مره جيتهم الاسبوع الي طاف يذكرلي السوداني انه اتاة صاحب همر جديد ويقول اتسأجرو الدباب ساعة

يقول والله ما شفتهم ليومك هاذ ... ولا تنسى بعد الحوادث والقطع الغيار وغيرة كثير

واعذرني على الاطالة بس حبيت اوضح لك وانت براحتك

السلام عليكم ورحمة الله وبركاته
اسعد الله مساكم
اليوم جيت محلات الدبابات الي عند حراج بن قااسم في الرياض
وشفنا دبابات واكثرها تايوان واقايمها صراحه مهيب غاليه وحصلت سزوكي وغالي
بس الزين زين والغالي فيه حقه وللحين ما صار شي
وسلامتكم

فكره ممتازه ولا تبدأ بدبابات جديده بل خذ مستعمل وجدده واصبر
تقريبا تحتاج عامل يبقى عندها في حالة عدم تواجدك يأجرها
الشي الثاني اللي ما اشوف احد تكلم عنه هو التصريح

يعني له هذي الشغله مصرحه لأي انسان يبي يشتغل فيها؟
والا لازم بلديه وتجاره ومرور ودوشه؟