بسم الله الرحمن الرحيم ..

والله على ما أقول شهيد .. و لأن اللي ذاق القهر والظلم مآ يبي غيره يذوقه ..
بالنسبة لي الحمدلله الله عوضني بوظيفة أطلق و أفضل منهآ مليون مره
ولو باقعد عندهم سنتين ماطلع اللي بطلعه بوظيفتي بـ 5 اشهر ولله الحمد
غير عن الراحة النفسيه و حتى بالشغل ولله الحمد
لكن والله لو ما احد اتكلم ماراح يوقفون ولا يعتدلون ..!


مدارس دار الأمآن الأهلية .. بالمدينة المنورة / أي أمآن يا دار السرقات !

لا تستغربون أي بـ مدينة الرسول عليه الصلاة والسلام ..
لا احترمو حرمة المكان ولا تحريم الله للظلم ..


جاني أتصال منهم لمقابلة شخصية ..
و كان فيه عدد كبير متقدمات .. من جميع التخصصات

تم قبولي .. !
و باشرت اليوم اللي بعد المقابله مباشرة ..
اخذت جدولي اللي كانو يلعبون معي طيري فيه !

نفس اليوم طلبتني المديرة ( أ. حنان )
و كانت عندها مدخلة البيانات ( تهاني ) ..

سلمت وجلست .. و اعطتني خبر انو انا ( مساااااااااعدة لمدخلة البيانات تهاني )
و سألتني اذا كنت اعرف للبرنامج قلتلها لا ..

قالت بـ امكانك تاخذي دورة فيه " سلامات اصارف ابوكم انا اخذ دورة ليه ! "
قلتلها ما يحتاج اتعلمه من الانترنت .

و تتـدخل هنا تهاني وتقول ( انا ليا 3 سنوات ماخذة البرنامج فـ ناسيته << -- اعرفي امسكي الكمبيوتر اول بعدين قولي اخذة البرنامج )
الله واعلم من بايع لها شهادتها او متوسطلها بالوظيفة .. ما علينا .......!

اتعلمت البرنامج و اتقنته بيوم لا مو بيوم بساعتين ..
وحده دارسه لغات و مشتغله ع برامج اصعب منها .. راح يصعب عليها هالبرنامج !

اسبوعين يشهد الله و المعلمات و عيون تهاني والكرسي والكمبيوتر ..
اشتغلت فيهم من قلب و ضمير , حصة فراغ حتى ماعندي , المعلمات كانت كلمتهم " معطينها اداري وهنا ..! شغلين ! " .
قلت يابت اصبري نهايتها خاصة لو شهرين خبره تفيدك ,
الفطور كنت يوم افطر ويومين لا ,

حتى آلة التصوير اتعلمت كيف اصور فيها و كنت اصور للمعلمات فيها
سويت جرد لجميع الادراج من اولى متوسط الى 3 ثانوي ( وحدي ) من اول يوم .
وطلعت فيه الاجنبيات وكتبتهم و طبعتهم !

مع العلم انها ادعت قدام المديرة " انو القليل المتوسطه حأعملهم انا- تهاني - والثانوي الكثير ياحرام حتعملهم هي - اللي هي انا - " عملتهم كلهم وحدي ..!

جات بعدها تقولي انو ( مروه ) المشرفه وزعت فصول اولى وزعي انتي فصول ثانية - وبالفعل وزعتهم ...

بعدها طلبت مني ادخل بيانات بنات ثالث ثانوي وبالانجليش !
ودخلت بيانات القسم الادبي واللي كانو 4 فصول و ملفاتهم بالهبل يمكن كل فصل فيه 20 اذا مو اكثر .

اخر يوم لي عندهم جات تدعي ( تهاني ) اني مادخلت بيانات سنة ثالث ع حسب كلام ( مروه ) ..
لما ناديت ( مروه ) وسألتها قالت لا ماقلت كذا قلت ثانية مادخلتيهم ..
وقلتلها انا اني مادري مين دخلتو انت قبل ما اجي و مين لا
.. لاني جديده وبناء ع طلب تهاني وزعتهم ع الفصول
ولا ادري اذا تجي ملفات جديده اللي تعطوني هي وتقولو جديده ادخلها .
اقسم بالله ان رد تهاني كان : آآآآ < زي اللي افتكر كلامه ! بعدها قالت جدد هذولي ! < تصرف ؟

ترد ( مروه ) : لا هاذي من بداية السنة موجوده .

بداية السنة للحين ! ليه الست ( تهاني ) مادخلتها ؟؟

نهاية الدوام ,
كنا راجعين من التوجيهي وطلبتني هنادي دقيقتين اجلس ..( هنادي - المشرفه اللي ماتنشاف الا بالاسبوع مره او بالاسبوعين مره )

وصار بيننا التالي .


أنا : خليها بعدين عندي حصه متأخره عليها .
هنادي : دقيقتين بس .
أنا : اوكي
هنادي : أنتي عندك اخطاء بيقولو لي ( تهاني ) و ( مروه )

في قلبي : هه الله يالدنيا تهاني اللي من جيت مافيه معلمه ماتعرف انها ماتدري عن البرنامج صارت تقول عندي اخطاء خايفه ع كرسي الرئاسة مثلاً اخذه منها ؟!!

أنا : اخطاااء ؟ ايش هي ؟
هنادي : مدري بيقولو عندك اخطاء
أنا : طيب ايش هي
هنادي : الحين تجي تهاني ونسألها
أنا : أوكي
دخلت علينا مروه وجلست ولا اتكلمت !
وجات تهاني
التفت عليها : تهاني ايش الاخطاء اللي عندي ؟
اقسم بالله أن ردها كان
تهاني : بعدين بعدين اقولك < تقولها بوجه منزلته للارض وعيون مافارقت الورق اللي بيدها وبصوت منخفض
أنا : لا قوليلي الحين بعرفها
تهاني : مدخلة ثانية ع ثالث < بنفس الصوت والنظرة !
أنا ضحكت بقلبي ورديت : والله يا استاذة هنادي لو قلتي غلط بالسجل بتاريخ الميلاد اقول
لكن انا جديده لايمكن افتح درج ثانية و افتح درج ثالث واقعد ابدل بالملفات ..

تقاطعني هنادي : ولانك جديده راح اطلب من تهاني ومروه جزاهم الله خير يعلموك
أنا : انا اتقنت البرنامج مو قصدي جديده بدا الشي اقصد انو الدرج افتحه اسجل بيانات ثانيه واقفله وهيك مع ثالث
هنادي : انتي اصلا ماتعرفي للبرنامج ولا متمكنه منه < مين ذبح عيال القطوة وراها تهاجم ؟

انا : ايوة انا ماعرف للبرنامج ومن لما نادتني استاذة حنان قلتلها قالت انتي مساعدة لمدخلة البيانات وقلتلها انو ماعرفله قالت خذي دورها اعطيتها خبر اني ماعرفله وقلتلها حتعلمه من النت واتقنته
هنادي : لا لا لا انتي مانك مساعده انتي اصلا مدخلة بيانات


انا : مدخلة بيانات

هنادي : ايوة , هم جزاهم الله خير مروه و تهاني بيساعدوك لكن بعدين انتي المسئولة عندي عن اي خطاء ..
امس جلسو يشتغلو عليه الى متى 3
ردت تهاني : ايوة
هنادي : بس انتي و مروه .
ردت تهاني : ايوة
قالت وانتي وين عنهم

انا : اقعد الى ثلاثة ؟؟؟!!
هنادي : ايوة والين ماتخلصي شغلك < لو ماخلصت بأفهم تبيني أبات عندهم ؟

انا هنا فطست ضحك بقلبي قلت بيني وبين نفسي لابو مدرستكم
قلتلها طيب عقدي ماوقعته < ماعطوني خبر الا لما طلبت التوجيهي اني ماوقعت عقدي ! قبلها قالو بس ابوك يوقع انتي لا

قالت هنادي : ماوقعتيه
انا : لا

مروه : عند الرجال بكره اجيبه
انا : اوكي حتعطوني شهادتين خبره

هنادي بعد مارفعت حاجبها وبدون نفس : ايوة وبعد ماتخلصي حصتك ع وحده ونص تعالي لتهاني تعلمك

ههههههههههههههههههههههههههههههههههههه ! اتخيلو وحده ماتعرف تمسك الكمبيوتر تعلمني انا خريجة الحاسب

انا : ان شاء الله , بدك شي
هنادي : سلامتك
انا : بيني وبين نفسي الله لا يسلملك فيك لا عظم ولا ولد يالظالمه واعطيها ظهري وامشي




مو بس كذا ,



فوق 20 معلمة انضحك عليهم ..
نظامهم دف .. يشغلو المعلمه اسبوعين و يطردوها او يطفشوها ..
وبكذا مايحتاج يدفعو رواتب !

معلمة جاتهم قالولها المقابلة بعد الدوام روحي شوفي الجو
ودخلت حصص
واعطوها حتى انتظار
نهاية الدوام قالولها ... لا خلاص احنا من امس مكلمين وحده !





هذا تنبيه لكل من تسول لها نفسها انها تشتغل مع هالظلمة ..
خذي عليهم ورقه لو بخط اليد
لو جاء خطاء منهم انو يدفعولك حق تعبك لو يومين !


حسبي الله عليك يا هنـــادي و نعم الوكيل
والله اني طلعت من عندك و رفعت يدي للسماء ..
يارب اجعلها ببناتها اللي خافت عليهم و غيبتهم لما مرضو ..
يارب اجعل ظلمها لي فيهم .. يارب اجعلها تخسرهم بحجم ظلمها لي


حسبي الله عليك يا تهـــاني و نعم الوكيل
الله يحرق قلبك ع بنتك زي ما اخذتي جهدي وتعبي و نسبتيه لنفسك .

حسبي الله عليك يا مــروه و نعم الوكيل
حسبي الله عليك يالشيطان الأخرس .. مو طيبة اللي فيك بـ قدر ماهي سذاجة شاركتي بـ ظلمي و باخذ حقي منك ان شاء الله بالاخره قبل الدنيا ..

الله يعينك
مشكلة هالامكان ماعليه رقابه ولا عليه اي شي
يعني يأخذونك لحم يرمونك عظم
ولو تشتكين عليهم يطبقون المثل ضربني وبكي سبقني واشتكى

الحمد لله الي عوضك احسن من هالوظيفه

حسبي الله ونعم الوكيل

ويستمر مسلسل مهزلة المدارس الخاصة لارقيب ولاحسيب

حسبي الله ونعم الوكيل

للأسف سبب تماديهم

مكتب العمل

أحد الأصدقاء ذهب إلى مكتب العمل ليشتكي

فكان ردهم " لا النظام يقول كذا والشركة لا يحق لها ذلك "

صديقي : أعطوني ورقة منكم تثبت ذلك أقدمها لهم

مكتب العمل :لا خذ رقمنا " الثابت العطلان " خلهم يتصلون علينا ؟؟!!!!

وقام يردد آآآآآآآآآآآآآآآه يا بلادي

قرأت قصتك كاملة وأشوفها شئ منتشر بجميع الموظفين على مختلف القطاعات

انا الاحظ أننا بشكل عام مانتحمل الظروف القاسية اللي نواجهها بالعمل

والامر من كذا الظروف حدتنا على الوظائف الاهلية سواء المدارس او المستشفيات

وربنا يكون بعودن الجميع وبصراحة يحز بخاطري ذكر اسماء بعينهم بالمنتديات

يكفي ذكر اسم المنشأة .. هذا رأيي لايزعلك بلييييز

مهزله ذا المدارس الاهليه

من جد لا حسيب ولارقيب
وواسطات ماشاء الله ذا المدير يوظف كل اخوانه وخواته..

على حساب ذوي الخبرات والشهادات..