[poem=font=",6,white,bold,normal" bkcolor="darkred" bkimage="https://www.btalah.com/mwaextraedit2/backgrounds/100.gif" border="groove,2,deeppink" type=1 line=0 align=center use=ex num="0,black""] اللي بقى لـي مـع الأيـام .. وفّيتـه=والضيق لو ينهمـر تشربْـه وديانـي
ماهي كبيـره علـي والحـزن غنيتـه=وْلاهـي غريبـه إذا وقتـي تحـدانـي
الخوف -يا من نبشت القلـب وادميتـه=لاعشت زهرة شبابك وانت وحدانـي!!
كم جرح خذْته من الأحبـاب.. ضمّيتـه=وجـروح قلبـي زكـاة لْحُـبّّ خِلاّنـي
مطعون؟ عاااادي ،، جفا الأقراب؟ داويته=تعبان؟ مبطي ،، ردى هالحظ؟ خاوانـي
صدمه؟ بسيطه ،، هَوان الحال؟ مرّيتـه=مقروده؟ أدري ،، وإذا حرمـان؟ عدّانـي
ما فـاح هـمّ ٍ لـك الله مـا تقهويتـه=ما مـرّ حـزن ٍ بغيـري مـا تبلاّنـي!
ياما ويامـا مـن الخـذلان .. عديتـه=إلا بصاحبْ .. بعد عِشـره تناسانـي!!
أزريـت لأنسـى غيابـه ليـن ناديتـه=والمـوت لامـن تجاهلنـي وجافانـي
وينه يجينـي .. وكـل عْتـاب كنّيتـه=ياليت يدري بعد فرقـاه وش جانـي!!
من كنت طفل ٍ وانا أرجـاه فـي بيتـه=شيّبت.. واثره على هالحـال خلانـي!
حتـى جنـاح العَتَـب لرضـاه ذليتـه=ماطِرْت بعده فـرح مـن ذلّ جنحانـي
يا قلب صبرك .. ترى كل شيّ سويتـه=ما كان أفضل من اللي كـان بإمكانـي
لو بيّ قـوه علـى الهجـران؟ خليتـه=لو بـيّ ذره مـن النكـران؟ يفدااانـي
الجرح أرحم .. إذا يرجع مـن أغليتـه=مجروح؟ فِدوه .. ولكن صعب وحداني![/poem]

عبدالله الظفيري