نعم رقمي منتشر بالشاتات ولا أعرف من هو الحقير والتافه اللي نشره لعنه الله عليه

وهذا هو ثاني رقم لي ألغيه

كانت توصلني مكالمات من أرقام غريبه في البدايه على رقمي الأول وألغيته
وجبت رقم ثاني وقبل شهرين تقريباً صارت توصلني مكالمات من شخص واحد
وفي كل مره يغير رقمه واحياناً يكلمني من ارقام ثابته تبدأ بفتح الخط 07
كان لما يسمع صوت رجال يقفل الخط لكن مع هذا يرجع ثاني ويدق
احيانا اضغط زر الرد واترك الجوال يصرف عليه بدون ما اقول اي كلمه
ومره دق على جوالي رقم نفس رقم اختي تقريباَ ورديت عليه بدون ما ادقق في الرقم ولما سمع صوتي قال لي أخيراً رديتي
وكأنه عارف انه هالرقم لبنت
لما سمعت صوته ثرت عليه وجلست ادعي عليه واسبه وسألته من وين جايب رقمي
قال لي جبته وبس وابغى اسولف معك
قفلتها بوجهه وصار كل مايدق اعمل طريقتي الأولى ارد واتركه يصرف عليه بدون اي كلمه مني
وفي الآخير اخذ اخوي رقمه على اساس يجيب اسمه او يقطع عنه الخط ولا ادري وش صار عليه
قبل يومين وصلني اتصال من رقم جديد ما اعرفه وطنشته
شوي وتجيني رساله من واحد يقول لي مساء الخير يا قمر انا الجنرال ..!!
قلت لامي عنه وقالت امسحيها ولا تردين عليه
واليوم الصباح دق علي رقم ورديت عليه وانا نايمه المهم
الشخص هذا قال اسمي وقفلها
انا انصدمت ودقيت عليه ثاني وقلت من انت ووش تبي قال لا تتبليني انا ما كلمتك ومدري وش
...قفلتها وراح دق علي مره ثانيه وجلس يستهبل
قلت لا تكثر كلام ومن وين جبت الرقم
قال من واحد اسمه سامر
يقول انك معطيته رقمك في شات
سبيه وجلست ادعي عليه وعلى هالسامر
قال لي الشرهه مو عليك على اللي يعلمك
رجعت وقفلتها بوجهه
شوي ويرسل لي رساله يقول يا بنت أنا آسف لكن والله رقمك منتشر في الشاتات ..؟؟

لو اني ادخل شات او اني اعطي رقمي حتى لو بنت في النت ممكن اشك في الموضوع

لكن أرقامي ما احد يعرفها إلا اهلي وصديقات مقرباات مني

والمشكله مو برقمي الحين
المصيبه بأسمي شلون عرفه .......؟؟؟؟

أنا شاكه في شي واحد بس
وهو الفاكسات ..والإيميلات المشبوهه في الموقع طبعاً غير الهوتميل والياهو

واللي أكد لي هالشي انه هالازعاجات ما تجيني إلا على الارقام اللي احطها في السيره الذاتيه حقتي
حتى رقم امي ما سلم من هالازعاجات لإني اكتبه كرقم بديل

رقمي هذا ما اقدر أغيره أبداً لإنه هو الرقم الوحيد اللي اكتبه في كل الاماكن سواء في الوظائف او اشتراكات او فواتير وحتى صديقاتي والبنات اللي اعرفهم وضيعت انا ارقامهم
ما يعرفون الا هالرقم
وصعبه ألغيه او أتخلى عنه
مع العلم انه مو بأسمي

وش رأيكم وش اسوي
ووش الحل مع هالحيوانات حسبي الله ونعم الوكيل فيهم
وكيف راح نثق بعد اليوم بهالفاكسات والاعلانات اللي توضع في الموقع


اقسم بالله حالتي حاله من بعد هالاتصالات وموضوع رقمي اللي ينتشر

ولو وصل رقمي لواحد من اخواني او اقاربي وش بيكون موقفي

عطوني حل تكفون