السلام عليكم
بختصار يا اخوان انا حاب ادخل في التجاره لان ماعاد فيه وظايف تعبنا وحنا ننتظر بدون فايده وليس المراد من الوظيفه المال فقط بل المراد منها ايضا في منع اوقات الفراغ الي مامنها فايده

الي حاب يشاركني ونتعاون مع بعض ونستفيد من بعض
انا املك راس مال وناوي افتح مشروع تجاري والي حاب يشاركني اهلا وسهلا بشرط يكون عنده ولو بعض الشي من المال

الي الان انا مامعي احد وغير متحمس لكن الفكره والنيه موجوده من فتره ومادري بنفذ الفكره او لا الله اعلم يالله الي عنذه مشروع صغير ممكن نستفيد منه واذا شجعتوني ان شاء الله بنفذ المشروع ونغامر الحياه مغامره بدال جلستنا 24 ساعه على النت ما اقول انها كلها غير مفيده بس اغلبها غير مفيد

ملاحظه : بعضكم يقول لو عندنا فلوس مادورنا وظايف بس فيه ناس وانا منهم تدور وضايف او اي شي تنشغل فيه بدال وقت الفراغ

يالله انتظركم

الله يوفقك وصدقت في كلامك حتى لو معك فلوس لكن ايش يسد وقت الفراغ
الفراغ يوصل الى طرق خطيرة فلا بد من استغلاله بالشي الصحيح

والله صدقت وانا أخوك

الفراغ مو طيب

العمل عباده ... والله يرزقك من واسع أبوابه ويرزقك بالشريك اللي تتصافون أنت وياه

أنا أقول البسطات زينة خصوصا الجنادرية قريب
بس مدري بأيش أبسط ؟؟

أخوي نتعاون
تشرفنا بتواجدك يا أخي العزيز انا من سكان محافظة الخرج وصراحة شبه اسبوعيا تواجدي في الرياض وصراحة أثناء تجولي بالرياض اكتشفت ان الرياض بخصوص انها عاصمة وكثافة السكان فيها فالاستثمار فيها ناجح باذن الله اذا درس المشروع بالطريقة الصحيحه وانا بصراحة آخر اكتشافاتي هو في الثمامة اذا انها سياحة الرياض البرية والمتنزهات حيث المخيمات والاستراحات وانا عندي افكار حلوة بالثمامة ومشاريع ماتكلف الكثير وراس مالها قليل ولكن تحتاج الجد والمثابره والصبر والصدق والتوكل على الله فاذا انت جاد وحاب تشاركني فراسلني على الخاص وتقبل تحياتي ,,,

انا اقترح عليك تسوي مطعم بس هالمره مطعم مختلف مو زي اللي متكرر عندنا تركي سعودي بخاري وبس

كن العالم مافيها دول الله ياكافي ..............ههههههه


طبعا اقصد مطعم سفري يعني للطلبات الخارجيه فقط

يكون مطعم سندوتشات ياباني صيني ايطاليا اؤربي امريكي وتكون وجباته مختلفه

ويكون المطعم شكله راقي وذوق

وان متاكده راح يطلع ذهب لان الناس تدور دايما على الجديد

وانا اول الزباين .........هههههههه

ولو كان مطعم نسائي مغلق يكون احسن لانه راح يطلع بدال الذهب الماس

وشكرا

الله يعطيكم العافيه جميعاّ

وبانسبه للي قال راسلني شيك على الخاص

مستعد ابدا معك عاطل وعندي ونيت قديم شوي نشغل في اي شغلة

غريب القوم لا ما اقصد نشغل ونيت ولا شي
اقصد نتعاون بشغله معينه وكل واحد يتشارك براس المال الي عنده نفتح محل او مطعم اوبقاله ونجيب مثلا انا عامل وانت عامل ونشغلهم واذا كسبنا من التعاون مثلا تبي تفتح لك مشروع مستقل لحالك على راحتك

انا راس المال موجود عندي بس المشروع للحين مابعد حددته