السلام عليكم ورحمة الله وبركاته
قبل فترة يأخواان كان لي موضوع بهالمنتدى الهادف اللي هو مشروعي ((مغسلة الملابس))لكن شلت الفكرة من رأسي بعد مأستشرت بعض الاخواان....

المهم لي اللحين يومين وأنا أقلب فكرة جديدة براسي اللي هي محل مكسرات ((ومايتبعة من بهارات.هيل.قهوة.خلطات.وأكيد جميع أنواع المكسرات...الخ

وأدري أنكم منتم مقصرين معي بالرد على أستفسارتي البسيطة..
المحل أبي اخلية متميز يعني أبي أجيب بضايع من القصيم أو الرياض على طاري القصيم فية ناس يقولون ببريدة فية أسواق جملة قديمة تبيع البهارات والمكسرت والخلطات بتراب الفلوس((ياليت اللي يعرفه عنها شي يعطيني خبر)) ..

المنافسين هنود وبنقلة ومصارية وبضايعهم مغبرة وتسد النفس ولاتتغير لأن موزعهم واحد..

يعني لوجبت بضاعه متميزة وكان الشغل نظيف بأكسر سوقهم

المحل اللي حاط عيني علية متوسط لاهو كبير ولاصغير ومناسب جداً للمشروع من وجهة نظري..

والشارع الللي بأفتح فية المحل يوجد منافس واحد وبضاعتة زي وجهه...

وحاط في بالي إني أتوسع وأصير بنفس الوقت موزع للسوبر ماركات خصوصا اللي عند محطات البنزين يعني أسوي أكياس عليها أسم المحل وأعبيها فصفص فستق لوز..الخ وأغلفها وأبدأ بالتوزيع وبكذا بقدر بأذن الله أصرف البضاعة بوقت قياسي

الزبدة ...كم تتوقعون يكلف المشروع((أبي بالمعقول لايجي أحد ويقولي مية ألف))؟؟
وكم سعرالمكينة اللي تحمص القهوة؟؟

وشاكر ومقدر لكم ولاتنسونا بأرائكم واللي يدخل ولايرد بيكون حسابة عسيـــــــر<<أمزح

ليتني اعرف كان علمتك
موفق

بالتوفيق أخوي وأهم شي خل لك سمعة والاهم يكون شغلك مرتب ونظيف وأتكيت ترى الناس يحبون المظاهر

الفكرة حلوة بس يبي لها تعب خبرك القهوة لازم تصرفها في يومها او بعده بيوم لأنها تخرب و تروح ريحتها مثل

الهيل و الاشياء هذه كلها لكن لو كان لك مئة منافس و تميزت انت بحاجة تكون افضل منهم سواء بقهوة معينة

او رخص اسعار او شيء راح ينجح مشروعك

اتمنى لك التوفيق

الاخ ملقاط بن جمر
محد بالمنتدى يستطيع ان يفيدك بتكلفة مشروعك لانه يختلف من محل لاخر حسب الايجار وعلى حسب نوع الماكينة وحجمها وعلى حسب البضاعة وكميتها فتختلف من مشروع لاخر ولكن عليك ان تبحث عن موزعين الجملة واهل البضاعة الجيدة وبنفسك تستفسر عن تكلفة المشروع ..
وماخاب من استشار وماندم من استخار !

والله يا أخي العزيز أتفق معك في التعبئة لأنها انتشرت وسوقها تمام
ويلزمك دعاية وتوزيع على التصريف
والله يوفقك