السلام عليكم ورحمه الله وبركاته
مساكم الله با الخير اخواني الاعزاء
ابي استشارتكم في مشروع البقالة حصلت بقالة لتقبيل بقيمة 38 الف ريال
العمال واحد راح يسافر والثاني راح يكون موجود فيها
البقالة عليها سوق في الحاره هي في حارتنا واعرفها زين
بس البظاعه الي فيها شويه يعني يبيلها بضاعه زود العامل الي فيها راتبه 1600
وشرايكم اخذ البقاله وتكل على الله خايف تروح على الفرصه وندم بعدين الغريب ان سعرها رخيص طولت عليكم معليش يا اخواني بس هذا اول مشروع اغامر فيه
سوالي =1- كيف اجرد البقالة على الهندي الي فيها
2-كيف اعرف انها دخلت اليوم وكم في الشهر



ارجوا الرد على استفساري يا جماعه الخير باسرع وقت ممكن

جرد البقالات ليس بالسهل
وأرى أن العامل راتبة عال
وفقك الله

البقالة لسعودي ربحها قليل صرف البيت + العامل + الايجار + الكهرباء بلاضافه الى ذالك الدين

ولازم بيكون في البقالة نفرين

وجرد البضاعة صعبه

وراتب العامل اذا اعطية 2000 بيسرق

احسن شي اجرها عليه

مثل ماقال (المحترس) جرد البقاله صعب جدا

انا عديلي فتح بقاله في احد الاحياء الجديده يعني مافيه بالحي الا بقالته وكانت ماشيه بشكل جيد ورائع جدا
ولكن شاف العامل الى عنده يسرق بشكل غير متوقع وبطرق ملتويه حتى قل دخل البقاله من شهر الى اخر وغير عديلى العامل وتحسنت دخل البقاله وصارت افضل من الاول بكثير ولكن لم يمضي اكثر من شهرين حتى عادت البقاله الى التدهور مره اخرى واتضح ان السبب في العماله التي تدير البقاله ونصحه ناس اخرين بتأجير البقاله على العامل وفعلا اجرها عليه بمبلغ 3000 ريال شهريا وارتاح عديلى من جرد البقاله وطلباتها .

فافضل شي انت تقبل البقاله واجرها على العمال التي في البقاله وهم عليهم كل شيء.

شاكر لكم اخواني على طرحكم
باقي صلاه الاستخاره والله يكتب الي فيه خير

لا صعبة ولاشيء
استخير الله وشوف ...

أما عن الجرد .. ممكن فيه تعب شوي!! \

ليش تبغى فلوس تجينا ببلاش !! لازم تتعب .

ياعم .....
امسك البقالة رف رف علبة علبة
وسجل كم علبة عندك وكم سعرها الاصلي وكم سعر البيع ؟

خليك طيب مع العامل وحازم بنفس الوقت ..

بالنسبة ليست مشكلة أنه يسرق ريال ولاريالين !! المشكلة انه يحمل براسه فكرة السرقة !!
هذا عطه شلوووووووووت على برا...
والله وانا اخوك احذرمن بعض العمالة وخاصة البنقالية الامن رحم الله .
شوف لك سوداني تراه زين ..خاصة لو كان سبق انه اشتغل مثل هالشغلة ..
اما ان كان عاملك طيب خله ..
تراه عارف سكان حارتكم مين اللي يدفع الدين آخر الشهر من اللي يماطل !!

التطوير مهم .. والابتكار ممتع ...

املا البقالة بما يتناسب مع حجم الطلب ..

الفكرة اللي طرحها الأخ /
انك تأجرها عليه تراها حلوة .... بس اعرف دخلها من راعيها الاول .

وخذ لك كم لفه بالمنطقة وشبك لك كم راعي بقالة واستفد من خبراته ..

1/ استشير اهل الخبرات
2/ استخير الله عزوجل (مهم جدا مهم جدا ).

عن جابرٍ رضي الله عنه قال : كان رسول الله صلى الله عليه وسلم يعلمنا الاستخارة في الأمور كلها كالسورة من القرآن ، يقول إذا هم أحدكم بالأمر ، فليركع ركعتين من غير الفريضة ثم ليقل : اللهم إني أستخيرك بعلمك ، وأستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب . اللهم إن كنت تعلم أن هذا الأمر خير لي في ديني ومعاشي وعاقبة أمري » أو قال : « عاجل أمري وآجله ، فاقدره لي ويسره لي، ثم بارك لي فيه ، وإن كنت تعلم أن هذا الأمر شر لي في ديني ومعاشي وعاقبة أمري » أو قال : « عاجل أمري وآجله ، فاصرفه عني ، واصرفني عنه، واقدر لي الخير حيث كان ، ثم رضني به » قال : ويسمي حاجته . رواه البخاري.
وبالتوفيق

اجرهاااا على العامل وريح نفسك


والله يوفقكك

جزاكم الله خير
المشكله ان البقاله ماهي لاحد من السعودييين العامل يقول انها له لحاله طرحت عليه فكرت ايجارها عليه
قال كل شهر راح اعطيك 3000 ريال احس انها قليله وش رايكم انتم والله مدري وش اسوي
لو راح العامل الي فيها منين راح اجيب عامل يعرف الزباين زيه ويعرف بيوتهم انا واحد من الزباين
يعني بشتريها منه واجرها عليه ما ابيه يروح وشرايكم يا اخوان اشتريها وجيب عامل ثاني
ولا اجلس معه في البقاله وشوف كم طلع 0000000؟

الله يوفقك وييسر أمرك

حياك الله أخوي الغالي المثابر ..

أولا / لاتمسك دور المدافع الخايف ان البقالة تطير عنه ويخسر الفرصة .

اعلم علم اليقين كما أنه لاأحد يستطيع أخذ شيء من رزقك المكتوب لك فإنك لاتستطيع أخذ شيء من رزق أحد ,فلا تستعجل رزقك سيصلك ورزقي سيصلني فلاينبغي اني انام ولا ينبغي اني استبق الزمن .

لك عندي فكرة !!

اعرض تأجير البقالة عند الباكستانيين والسودانيين أصحاب البقالات وشبه السوبرماركات الضخمة .

أو::::

اجلس الله لايهينك محاسب في البقالة لمدة شهر هذا ان بغيت الجد الصحيح واعرف كم قرش داخل وكم قرش طالع .

أو:::::

شوف لك شاب سعودي من الزملاء ماعنده وضيفة بشرط انك تثق فيه . وخله يداوم شهرين بالبقالة ب2200 ريال بس يكون رجل طيب فاهم سهل في تعامله مع الناس ويكون العامل مساعد براتب شهري حتى تعرف شغلك زين .

وانا ماشوف شي احسن من ان الرجل يرعى حلاله بنفسه ...
(ماحك جلدك مثل ظفرك )..
وان كان من اخوانك تراها حلوة مرة مانت خسران الراتب اللي ياخذه تتطلع انت واهلك على تيس بالبر واحلى طلعه لاحلى راتب واحلى موظف ...

اتمنى لك التوفيق يااخي الكريم .