السلام عليكم ورحمة الله وبركاته

كيف حالكم يااخوان والله يوفق الجميع
نخش في الموضوع صراحة انا ودي اشتغل في الثمامة بس ماعندي افكار
كل مافكرة في شي القاه موجود بكثرة واشوف الناس ماشاء الله تشتغل شغل
ممتاز فقلت اشوف الاخوان يمكن عندهم خبرة او احد يعطيني فكرة جديدة
وعندي وانيت يعني لو يحتاج نقفل الحوض مافيه مشكلة لو فيه فايدة ولوحتى
مكان ثاني غير الثمامة ماعندي مشكلة اهم شي فكرة حلوة ومفيدة وكمان
بعد شهر تقريبا تبداء الجنادرية ان شاء الله يعني نجهز من الان وجزاكم
الله خير....

يختلف المشروع على حسب الامكانيه
اشوف الحين طايحين في شوي الذرة على الطريق

بيع الشاي والقهوة والمكسرات
وفقك الله

سو لك كشك صغير وبيع فيه المشروب الساخن والفشار والحاجات ذي

بالنسبة للثمامة بالرياض فالافكار كثيرة وانا احد المتجولين هناك وصراحة لقيت الاجانب مستفيدين كثير لانهم تعلموا الصبر والمثابرة والجد فاذا انت جاد وبتحمل شوي ممكن تشتري خيام وتأجرها ( عمود ب 100 ريال باليوم وعمودين 200 ريال الى 180 ريال بس لاتنسى ماطور وفرشات ولمبات وكل شئ بحقه ) ( وممكن تأجر دبابات ) وايضا فيه بالثمامة على طريق المجمعة يسوون( استراحات برية عائلية يعني كل الشغله ارض فاضية وشبك اوتسوي عقم وبوابة و3 خيام فيها عزبة وفرش ولمبات طبعا بالماطوروتأجرها لاتقل عن 1200 ريال باليوم الى 1400 ريال وخصوصا خميس وجمعه ايام الشتاء ) والدعوة ماتكلف اكثر من 7 الاف ريال على حد اعتقادي الى 10 الاف بس الشغله اذا ماني واهم انك تنسق مع امانة الثمامة موجودين على نفس الطريق .
وتقبل تحياتي ,,,,

اخوي
في اماكن حلوة
بس خل في بالك انك لازم تعمل فيها انت
هل انت سعودي ؟؟
اذا انت سعودي تقدر تحط خيمة وتبيع على كيفك
لانه قبل سنه مسكو كل الي يبعون من الاجانب

واذا انت صامل وسعودي مالك الا رجال يدور لك مكان حلو
والشغلة ماتحتاج الا للتالي
1/خيمة ام عمود او عمودين
2/طربمة هواء نفس الى بمحلات البنشر قيمتها من 1500الى 3000جديدة وتحصل مستعمل ارخص
3/رف خشب او حديد تحط عليه البساكيت والشوكلاته والحب داخل المحل حتى لو تجيبة من الشارع يعني لاتشتري
4/ربطات حطب الربطة بسعر من 6ريال الى 7ريال وانا ادلك على الرخيص والزين
5/جيكات ماء فاضية .. وانا ادلك عليها بالسر الرخيص ..هالجيكات تاخذ مثلا 8جيكات وتعبيها بانزين 95/91يعني اربع 91واربع95
6/تمر على محل جملة وتشتري شوكلاتات المطلوبة وهي معروفة اكيد عندك. وكم شبس. وكم كرتون ماء ابو ريال. وكم كرتون ببسي وسفن وحمضيات ولا تنسى كولا قزاز ولا تكثر يعني خفافي.ولا تنسى كم فطيرة من لوزين
وتونه وصامولي وخبز مفرود وفول وطحين وملح وسكر ولا تنسى الكبريت والولاعات.. واهم شي فصفص باجة
7/محول كهرباء عشان تشبك عليه اللمبات او تشتري ماطول صغير
7/ تعمل من يوم الاربعاء الصباح الى يوم الجمعة المغرب, وانت ماتفارق الخيمة.
والمكان انصحك بالعاذرية طبعا خل معاك ثنين او واحد من اخوانك او ربع او حتى عامل


وبكذا انت بتعبي الهواء بالمكينة للسيارات
وبتبيع بانزين
وبتبيع مواد غذائية

انتظر ردك وبالنسبة للمكان بشوف لك المكان الزين لوجه الله وبجتهد في ذلك ولا ابي منك لا جزاء ولا شكورا.

طبعاً اهم شي الماء
اشتر الماء الجياك الى الجيكة سعرها 5ريال
وانت اشترها من الدينات الى تبيع وتحصل سعرها 4ريال
واشتر بعد ماء الى الجيكة بسعر 3 ريال


وبالنسبة للمكان في مكان حلووو بس بعيد شوي بس بشوفة لك هل هو للحين زحمة او لا
وتراه مايجيه الا الناس الى تدفع ماهمها .. اذكر كنت اعبي الهواء فيه بعشرة مع انه بالثمامة بخمسة
بس لانه الوحيد ولانه الى يجون يعبون هواء مايسئلون عن السعر رفع السعر ع الجميع حتى علينا