السلام عليكم ورحمة الله وبركاته

أول مره أكتب موضوع هنا و إن شاءالله يكون بالقسم المناسب ..

أنا خريجة الكليه التقنيه / دبلوم حاسب ألي - دعم فني
ماعندي خبره هالسنه تخرجت ( خبرتي فتره تدريب ميداني في مدرسة 3 شهور )
كل يوم و انا في رحله بحث عن وظيفة

الاسبوع اللي راح أتصلت علي مديره روضة وطلبت مقابلتي
رحت لهم و اجرت المقابله و قالت بنجربك أسبوع وبعدها نقرر تستمرين معانا ولا لا
قلت طيب مو مشكله ..
طبعا انواع الكرف و التسلط ( ياصبر الارض على المساعده اللي عندها )
شغلهم محيوس وملفاتهم انواع الحوسه و كأنهم جابوني اضبط لهم امورهم ..

- مدخل بيانات + تنسيق جداول .. الخ
- ترتيب ملفات و سجلات
- محاسبة
-استقبل طلبات التسجيل للمستجدين

كل هذي الاعمال انا مكلفه فيها مع ان اللي اعرفه ان لكل عمل من هذي الاعمال موظفة
لكن قلت يابنت مو مشكلة أهم شي الوظيفه

أمس كملت الأسبوع وقلت لها / أنا مستمره معاكم ولا لا عشان اعرف اكمل ولا اروح ادور لي على وظيفة ثانيه ..

قالت لا انتي ان شاءالله مستمره معانا وعجبني شغلك وذكائك وفاهم بكل شي ماشاءالله ومن هالكلام .. قلت الحمدلله أجل نوقع عقد ولا اشلون !
قالت ايه نوقع العقد بكره وراتبك ( 1000 ) ريال .. أنا وجهي صار كذا ( )
قلت 1000 ريال غريبه اللي اعرفه بالمدارس الأهلية وبحكم اني تدربت 3 شهور
بمدرسة اهليه وكنت مطلعه على رواتبهم مافي راتب 1000 ريال
السكرتيره اللي كانت ترد على المكالمات تاخذ 1500 .. مدخله بيانات تاخذ 1800 - 2000
قالت مااقدر اعطيك اكثر من 1000 قلت بس مو معقوله اشتغل أكثر من وظيفه و بالأخير 1000
قالت ترى البنات مكدسين بالبيوت ويتمنون الوظيفه قلت / ياعزيزتي اعرف هالشي وانا اولهم ابي الوظيفة بس ألقى بالأخير راتب يناسب مجهودي و تعبي ..
أنتي مكلفتني بأكثر من وظيفه و بالأخير 1000

قالت / بدخل اسمك بالموارد .. قلت لها الموارد من شهر 6 / 2009
نظامهم الرواتب تكون 3000 ريال ( 1500 من صاحب العمل و 1500 من الموارد )
وانتي بتعطيني 1000 .. طبعا اعرف انه فتره 3 شهور التدريب قبل توقيع عقد الموارد يكون الراتب على حسب
اللي تعطيني بس بعدها هي مجبره تعطيني 1500 والموارد 1500

هل انا غلطانه ياجماعه

المهم قالت انا ماعندي الا اعطيك 1000 وانتي فكري وشغلنا مو كثير
قلت في نفسي هين موب كثير كل هالمهام اللي مكلفتني فيها و تقولين موب كثير
انا اللي قاعده اكرف و مساعدتها متربعه على المكتب
لا شغله ولا مشغله حتى لو تبي ورقه من المكتب اللي
جنبها قالت لي يافلانه قومي جيبيها لي

هذي مشكلتي اللي حبيت اشارككم فيها
كل اللي أٌقدر اقوله حسبي الله ونعم الوكيل في كل من يهضم حق أخوه المسلم
او يبي يستغله يعني مو معقول هي مابترضاها على نفسها ...
صح الواحد يحمد ربه ويقول الحمدلله ويرضى بالقليل يرسل له الله الكثير
بس مو بهذي الطريقه هذا يسمى استغلال ..

يعني ممكن اقبل 1000 ريال لو كنت مدخله بيانات فقط اما تعطيني اكثر من وظيفه وتقولي هالراتب مو حرام عليها

وقتها رجعت البيت ورسلت رساله على جوالها قلت :
( سعيده بمعرفتكم والله يوفقكم .. انا من بكره مااقدر أداوم لان مو معقوله اشتغل كل هالأعمال بهذا الراتب وشكرا لك )


شكراً لكم .. اتمنى تعطوني رأيكم و مشورتكم و دعواتكم ..

لا اختي احسن شي سويتيه انك ماشتغلتي بهذا الراتب وانشالله الله يرزققك غيره وافضل منه
والف ريال ايش بتزين هالوقت هذا مشكلتنا ان الأجانب صاروا يخذون اكثر منا رواتب مصيبه بس الله يعين ......

النظام الي تكلمتي عنه اول مره اسمع فيه وان فيه اجبار انها تعطييك 1500 عموما يجي من يفيدك في هالموضوع

بس من ناحية الوظيفه انا بقولك وجهت نظري
استمري في الشغل منها تكسبيين خبره ومنها تقظيين وقت فراغك واذا لقيتي الافضل رووحي بلا تردد

الرجال وهم رجال مالقو وظائف

الله يرزقك انشالله والصبر مفتاح الفرج

يوسف / جزاك الله خير .. وفعلا هذي مشكلتنا خيرنا لغيرنا

حبوب / النظام سألت وحده مديرة موارد بشريه
وقالت لي هالشي ( بعد توقيع عقد الموارد أقل راتب 3000 ريال 1500 من صاحب العمل و 1500 من الموارد )
تنزل 3000 ريال على حساب الموظف ..
بااستثناء فتره ماقبل توقيع العقد اللي هي 3 شهور وتسمى فتره تدريب .. الراتب على حسب صاحب العمل
لكن بعد مايدعم الموظف من الموارد و يوقع العقد اجباااري الراتب يكون 3000 ريال للموظف ..

ومن ناحيه الوظيفه الله يعوضني باللي احسن منها ويرزقني ويرزق جميع اخواتي و اخواني المسلمين
صح الواحد يبي الخبره بس مو بهذي الطريقه و بهذا الاستغلال ..

شكراً لكم ..

طيب الحين هل خلصتي فترة التدريب الي هي ال3اشهر؟؟؟؟

لان المديره ملزوومه معك بعقد بعد ال3 اشهر واغلب الوظائف يتعدل الراتب بعد ال3اشهر التدريبيه

لا انا ماداومت عندهم الا اسبوع لانها قالت لي اسبوع اختبرك فيه وبعدها تستمرين معانا او لا
بعد الاسبوع تبيني استمر معاهم و اوقع عقد والراتب 1000 ريال
ويوم تناقشت معاها تقولي انا ماعندي الا 1000 مااقدر اعطيك اكثر من كذا
وتحججت ان بنظرها الشغل مو كثير !!

هي مو فاهمه نظام الموارد و لا راضيه ترفع الراتب .. يعني حتى بعد 3 شهور لو استمريت
هي ماتبي ترفع الراتب .. فهمت ؟

مدري وش نظامها كل الحكايه انها متمسكه برأيها وبنظرها مااستاهل الا 1000 ريال
مع ان هذا مو من عندي لو هي فعلا فاهمه كان بتعرف ان بعد 3 شهور لو اسمي دخل و اندعم من الموارد
اجباري يصير راتبي 3000 ريال

تستاهليين كل خير
طيب اشتكي عليها

ولا كلمي المديره حقت الموارد البشريه قولييلها اذا وقعت العقد هل بعديين تلزمونها بتعديل العقد ولا اجل على راتب 1000ريال على طول اذا قالت نلزمها نغير العقد ف توكلي على ربك وخلك نشيطه وانشالله تتوفقين

حبيبتي الناس صارت تظلم وياما انظلمت وياما جاني من المدارس الاهليه وكنت ساكته ماكان يهمني الراتب كان عادي بالنسبه لي بس اهم شي كنت ابي خبره بس من وراء هالخبره تحملي راح يجيك قولون عصبي وشد في الاعصاب وهم وغم والله الحين اني مشتريه راحه بالي ونمت بالبيت اصرف معززه مكرمه مو مذلوله من احد او تجي في الاخير وحده تتأمر علي صار لي ياقلبي هالموقف كانت المديره تتأمر علي وكنت امسك مكانها اذا غابت او اخذت اجازه وفي نهايه السنه اجي اطبع الشهادات والا اطبع لها اي شي وترميه في وجهي وتقول ماابي كذا وكنت اصمم شعارات لها وتروح تقول للاداره الرجاليه مو هم اللي صمموها اخذوها مني مع انها عجوز وفي الاخير ربي فوق كل شي قعدت فتره طايحه من مرض وكل هذا من دعاوي المدرسات والطالبات ونامي ياقلبي وربي الرازق

الآن زمن الاستغلال لكن شتسوي المفروض أي موظف أو موظفه في قطاع عام أو خاص لا يقل عن مرتبه

الشهري عن 3000 ريال فيه ناس عندها دوامين صباح ومساء والمساء ما يدخل البيت إلى 11 بالليل

تعبان قرفان ينام ويقوم الصباح ويروح الدوام ويرجع 1 ظهراً ينام يقوم العصر يروح الدوام يرجع 11 بالليل ينام

وعلى هذا الموال براتب 1800 هذا غير المسافه 65 كيلو يومياً فيه قرف أكثر من كذا ؟؟؟؟
يعني حياته الاجتماعية صفر كأنه عايش عشان هالعمل الزفت

كله عشان الخبره ؟؟؟

نشكي الحال لله

جد مشكله تكرف وتنكرف وبالاخير 1000 ولا حق الشنطه الي على كتفها ..
يعني 1000 ريال ايش تسوي فيهم ..
ومشكله اذا اجبروها تسووي مشاركات .. يعني بالعربي اصرفي 1000 ريال علينا
خيتو قلبي وكل حواسي معاكي ومع الي زيك من بنات وابناء هذا الوطن الغالي