السلام عليكم ورحمة الله وبركاته

أول مره أكتب موضوع هنا و إن شاءالله يكون بالقسم المناسب ..

أنا خريجة الكليه التقنيه / دبلوم حاسب ألي - دعم فني
ماعندي خبره هالسنه تخرجت ( خبرتي فتره تدريب ميداني في مدرسة 3 شهور )
كل يوم و انا في رحله بحث عن وظيفة

الاسبوع اللي راح أتصلت علي مديره روضة وطلبت مقابلتي
رحت لهم و اجرت المقابله و قالت بنجربك أسبوع وبعدها نقرر تستمرين معانا ولا لا
قلت طيب مو مشكله ..
طبعا انواع الكرف و التسلط ( ياصبر الارض على المساعده اللي عندها )
شغلهم محيوس وملفاتهم انواع الحوسه و كأنهم جابوني اضبط لهم امورهم ..

- مدخل بيانات + تنسيق جداول .. الخ
- ترتيب ملفات و سجلات
- محاسبة
-استقبل طلبات التسجيل للمستجدين

كل هذي الاعمال انا مكلفه فيها مع ان اللي اعرفه ان لكل عمل من هذي الاعمال موظفة
لكن قلت يابنت مو مشكلة أهم شي الوظيفه

أمس كملت الأسبوع وقلت لها / أنا مستمره معاكم ولا لا عشان اعرف اكمل ولا اروح ادور لي على وظيفة ثانيه ..

قالت لا انتي ان شاءالله مستمره معانا وعجبني شغلك وذكائك وفاهم بكل شي ماشاءالله ومن هالكلام .. قلت الحمدلله أجل نوقع عقد ولا اشلون !
قالت ايه نوقع العقد بكره وراتبك ( 1000 ) ريال .. أنا وجهي صار كذا ( )
قلت 1000 ريال غريبه اللي اعرفه بالمدارس الأهلية وبحكم اني تدربت 3 شهور
بمدرسة اهليه وكنت مطلعه على رواتبهم مافي راتب 1000 ريال
السكرتيره اللي كانت ترد على المكالمات تاخذ 1500 .. مدخله بيانات تاخذ 1800 - 2000
قالت مااقدر اعطيك اكثر من 1000 قلت بس مو معقوله اشتغل أكثر من وظيفه و بالأخير 1000
قالت ترى البنات مكدسين بالبيوت ويتمنون الوظيفه قلت / ياعزيزتي اعرف هالشي وانا اولهم ابي الوظيفة بس ألقى بالأخير راتب يناسب مجهودي و تعبي ..
أنتي مكلفتني بأكثر من وظيفه و بالأخير 1000

قالت / بدخل اسمك بالموارد .. قلت لها الموارد من شهر 6 / 2009
نظامهم الرواتب تكون 3000 ريال ( 1500 من صاحب العمل و 1500 من الموارد )
وانتي بتعطيني 1000 .. طبعا اعرف انه فتره 3 شهور التدريب قبل توقيع عقد الموارد يكون الراتب على حسب
اللي تعطيني بس بعدها هي مجبره تعطيني 1500 والموارد 1500

هل انا غلطانه ياجماعه

المهم قالت انا ماعندي الا اعطيك 1000 وانتي فكري وشغلنا مو كثير
قلت في نفسي هين موب كثير كل هالمهام اللي مكلفتني فيها و تقولين موب كثير
انا اللي قاعده اكرف و مساعدتها متربعه على المكتب
لا شغله ولا مشغله حتى لو تبي ورقه من المكتب اللي
جنبها قالت لي يافلانه قومي جيبيها لي

هذي مشكلتي اللي حبيت اشارككم فيها
كل اللي أٌقدر اقوله حسبي الله ونعم الوكيل في كل من يهضم حق أخوه المسلم
او يبي يستغله يعني مو معقول هي مابترضاها على نفسها ...
صح الواحد يحمد ربه ويقول الحمدلله ويرضى بالقليل يرسل له الله الكثير
بس مو بهذي الطريقه هذا يسمى استغلال ..

يعني ممكن اقبل 1000 ريال لو كنت مدخله بيانات فقط اما تعطيني اكثر من وظيفه وتقولي هالراتب مو حرام عليها

وقتها رجعت البيت ورسلت رساله على جوالها قلت :
( سعيده بمعرفتكم والله يوفقكم .. انا من بكره مااقدر أداوم لان مو معقوله اشتغل كل هالأعمال بهذا الراتب وشكرا لك )


شكراً لكم .. اتمنى تعطوني رأيكم و مشورتكم و دعواتكم ..