يعطيك العافية

السلام عليكم ورحمة الله وبركاته

اولا احب اشكر الاخت اللي حطت الموضوع وحرصها على خدمة بنات وطنها

وثانيا رغم اني مع الاخوة الي يقولوا انو مافي داعي للمشاكل وكثر الكلام وانو الي يبغى يبغى والي مايبغى خلاص لا يرد
كلامكم صحيح وعلى عيني وراسي ودا مبدئي اصلا ودايما ازعل لمن اشوف هجوم على احد منزل وظيفة لان الشي دا بيخلي الناس تهرب من طرح الوظايف بسبب طول اللسان ويروح الصالح في الطالح

لكن ليا تعقيب بسيط على الوظيفة دي بالذات

انا اتصلوا عليا من قبل ماينزل الاعلان هنا في المنتدى يعني من مدة وهو نفس الرقم الي مكتوب في الاعلان عشان لا يجي احد يقولي ايش دراك انهم نفسهم

والله والله انا انسانة مؤمنة ان العمل كله شرف ومافي فرق بين شغلة وشغلة دامها بالحلال
بس والله سيدة الاعمال الي طالبة الاعلان دا بجد ماتبغى توظف احد لسببين :
1 - انها حاطة شروط تعجيزية مقابل عمل انا اعتبره مزري (وحذكر لاحقا ليش)
2 - انها حاطة مواصفات وعارفة ومتأكدة مليون المية انو مافي بنت مهما كان مستواها المعيشي واحتياجها المادي راح تقبلها خاصة لو انها سعودية ( وانا مااتحي هنا للسعوديات ابدا والله لافرق بين عربي ولا اعجمي الا بالتقوى ) ولكن بسبب الوضع الاجتماعي العام والقوانين الرسمية في البلد

وراح اقولكم باختصار ايش صار:

دق الجوال .. رديت والاقيه شخص مصري الجنسية .. بعد السلام وكدة والتأكد من هويتي
قلي حضرتك مقدمة عندنا على وظيفة - وانا طبعا قلتله ايوة لاني مقدمة على وظايف كتير وومكن تكون وحدة فيهم -
المهم قلتله ايش طبيعة العمل المطلوب وايش الوظيفة قالي لمن نعرف احنا الاول انت ايش مؤهلك وخبراتك قلت طيب .. المهم سألنيييييي اسئلة كتير ولمن ناسبه اللي قلته قالي الوظيفة هي سكرتيرة سيدة اعمال .. قلت جميل طيب ايش طبيعة العمل بالزبط وايش المزايا وايش طبيعة الدوام
قالي :
1 - تحتاج وحدة تكون متقنة للطباعة عربي وانجليزي
2 - ان تكوني تتكلمي انجليزي كويس جدا
3 - ان تكوني متفرغة للعمل
وغيره كتييييير من الموصفات الي بتنطلب في السكرتارية ولهنا الموضوع مو غريب
وقلته طيب المزايا وطبيعة الدوام لانها تهمني اكتر من اي شي قال:
الراتب 1800 لمدة 3 شهور ولو اثبتي كفاءتك حتتثبتي رسمي وتاخدي 2000
والمواصلات عليكي (( والمكتب في الناصرية ))
والدوام فترتين كل يوم من 8 - 1 الضهر ومن 4 - 10 الليل كل يوم ماعدا الجمعة بس حيكون الداوم من 3 - 8 المسا
قلتله طيب انا حكون سكرتيرة ايش لزوم اجي الجمعة المكتب؟؟ الجمعة المفروض اجازة حسب قانون مكتب العمل او اي يوم تاني بس المهم يكون يوم كامل
قالي لا انتي الجمعة والخميس حتشتغلي من البيت(بيت سيدة الاعمال) لانك مو سكرتيرة ادارية انتي سكرتيرة خاصة يعني اقرب لمرافقة فسألته يعني ايه مرافقة قالي يعني انتي حتكوني موجودة مع المدام في كل مكان تطلبك تكوني فيه ولو احتاجتك لوقت اطول من وقت الدوام لازم تكوني موجودة والاوفر تايم تتفاهمي معاها عليه ولو احتاجاتك في سفر تكوني جاهزة
قلتله بس انا متزوجة ومااتوقع زوجي يسمحلي بالسفر وحدي
قام عصب عليا وقالي انتي كلامك كتير كدة ليه؟؟ هي دي شروط الوظيفة ولو مش عايزة ماكنتيش قدمتي ..
فطبعا القهر ربط لساني وقلتله بس ... شكرا
((((( لانها بالعربي الفصيح تبغى دادة ولبيسة وخدامة وديل ومرافقة واي شي تاني الا انها تكون سكرتيرة ))))))

قالي عموما فكري ولو موافقة ارسليلنا سيرتك الذاتية بالموافقة على نفس الرقم اللي اكلمك منو

اتمنى من الاخوة اللي معارضين للناس الي رفضوا الموضوع انهم يفكروا لو جات وظيفة مهينة زي دي لاخواتهم ولا لهم ولا لحريمهم او لاي شخص يعز عليهم

واما الاخوة الي رفضوا فكرة اوظيفة دي اقولهم في دي الوظيفة الزعل زبط وطلع معاكم حق لكن في وظيفة تانية لا ... فلازم تاخدوا الامور بروية شوية وتراعوا ظروف الجميع
واشكر صاحبة الموضوع للمرة التانية وجزاها الله كل خير
واشكر كل من قرأ ردي وكل من اخد من كلامي
وربي يوفقنا جميعا لطاعته ورضاه والرزق الحلال.

اختكم عفريتة مكة

فطبعا القهر ربط لساني وقلتله بس ... شكرا
((((( لانها بالعربي الفصيح تبغى دادة ولبيسة وخدامة وديل ومرافقة واي شي تاني الا انها تكون سكرتيرة ))))))




تروح منفوحه ولا الجراديه يا كثر الحبشيات عندنا في الرياض يشتغلون بالساعه اقل تكلفه وتصير خدامتها وسكرتيرتها وكل شي

قريت مرة الإعلان بجريدة الرياض

وأنا حسيت انها تبي شغالة بس متعلمة الحاسب واللغة

ثانكيووووو

لا حول ولا قوة الا بالله

علينا العوض يابنات السعوديه