من طرائف القصص والعلوم اللي صارت لساجر الرفدي مع رجل اسمه خليف والسالفه ، أن خليف رجال مشؤوم وماهوب موفق وكرهوه جماعته وشد عنهم هو وامه وجاوروا الشيخ ساجر الرفدي وكان شهر رمضان هاك الوقت ، الوكاد وطلعوا للمقناص والشيخ ساجر عنده طير اسمه حطاب وكلب سلوقي تكرمون اسمه خطاف ويوم انه يراهي الشيخ ساجر لها الارنب وهو يهد الطير عليه ويحده يمين شمال وياكود خليف يقمز ويزهب بندقه وهو يرمي الارنب الا هو مصوب الطير وغدى ميت ، ويسكت ساجر شوي ويكتم زعله ، الوكاد ويراعيله ارنب ثاني ويهد السلوقي عليه وهو بعد يحده والا خليف يرمي هالارنب الا هو مصوب السلوقي واذبحه وزعل الشيخ ساجر وخلى المقناص وعوّد ، ويم رجع خليف لامه سولف عليها باللي صار له مع الشيخ ساجر وتشور امه عليه وقالت له ياوليدي ياخليف رح وحب راس الشيخ ساجر وتعذر منه ، الوكاد وينصى خليف الشيخ ساجر ويم جاه لقاه شاب ناره ومقلطن دلاله ومزهبن السبيل العظم اللي يمزون به التتن ، وكان الشيخ ساجر متحرين الفطور لانه بشهر رمضان ، وقاله خليف أنه ماكان بنيته يصير هالشيء وانه يبي يعتذر وسامحه ساجر والا خليف جا بيحب راس ساجر والا هو ياطا على التتن ويكسره وعفره بالتراب وزودن عليها ينشب البشت بالدلال ويقلبها على النار ، وعقبها ساجر انجن والشيخ ساجر شيخ وولد حموله وماتطلع الكلمة الشينه منه ، الوكاد قال لخليف يا خليف خذ ماتبي من البل وشد عني تراه ازين لي وازين لك ، وضاع على الشيخ ساجر حطاب وخطاف وتتنه ودلاله وعقب ماشد خليف من يمه وهو يقصد الشيخ ساجرالرفدي قصيدته :


البارحة يا خليف عزي لحالــــــي
،،،،،،،،،،،،،،،،،،،،،،،،،مضيت أن ليلي حزين ومحتـــــــار
أمر جرى ما مثله جرالــــــــــي
،،،،،،،،،،،،،،،،،،،،،،،،،يا تقل توقد بالضماير لهب نـــار
تعوكست ياخليف باول وتالـــــــي
،،،،،،،،،،،،،،،،،،،،،،،،،من خلقت البدوان ما مثلها صـــار
من خلقتي ما شفتها بالليالـــــي
،،،،،،،،،،،،،،،،،،،،،،،،،اربع مصايب خايبه لوعني من الجار
الاوله حطاب يسوى العيالــــــــي
،،،،،،،،،،،،،،،،،،،،،،،،،اشقر ديم لابرق الريش نثـــــــار
والثانيه خطاف ماله مثالـــــــي
،،،،،،،،،،،،،،،،،،،،،،،،،شره على تيس الجميلة الى نــــار
والثالثه سويت بصقر الدلالــــــي
،،،،،،،،،،،،،،،،،،،،،،،،،وقصرتها وفاحت علي بن وبهـــــار
والرابعة بالعظم تتن الشمالــــي
،،،،،،،،،،،،،،،،،،،،،،،،،وافلست منهن عند حزات الافطــــار
لز كان جتني قوم وافنت حلالـــــي
،،،،،،،،،،،،،،،،،،،،،،،،،اصبر على مر الليالي والاعــــزار
من صرت أنا مهزابة للرجالــــــي
،،،،،،،،،،،،،،،،،،،،،،،،،وياما كسبت من العدا جل وابكــار
والعمر يفنا وآخـره للزوالـــــي
،،،،،،،،،،،،،،،،،،،،،،،،،والحظ يلقى عند حصات الاوبـــــار

قصة جميلة وتدل على كرم الشيخ ساجر وحلمه وحق الجوار ولا هو غريب على ساجر ولا قبيلته لانهم محل لهذا العلم .
والقصيدة فصلت الموقف وحاكته .

الفدعاني ربي يسلمك ويعافيك,,
على هذا الطرائف....
والعمر يفنا وآخـره للزوالـــــي
،،،،،،،،،،،،،،،،،،،،،،،،،والحظ يلقى عند حصات الاوبـــــار

صح لسان من قالها...

صح لسن الشاعر وتسلم على النقل

صح لسان الشاعر