آخر موعد للتسجيل الخميس 16 / 4

لا إله إلا أنت سبحانك إني كنت من الظالمين

اجراءات القبول بالتفصيل منقولة من موضوع سابق لاحدى الدورات

السلااام عليكمـ جميعـآ ياضبـاط
أول شيء أهنيء نفسي وأهني جميع المقبولين مبدئيا بالكليه الأمنيه ...
ثانيا أتصل علي شخص يقول إنهـم أرسلو رساله لجواله إنهم أقبلوه .. بالمجموعه السادسه ولو نظرنا للمجموعات مافيه مجموعه سادسه .. ففكرت قليلا أنـا < وش عندوه خخخخ إنه بعد مااشفت من عدم قبول ناس من مجموعتي بالطول والوزن < وطبعا مشددين على الطول والوزن يعني طولك لازم يكون فوق الـ 168 ويكون وزنك متوافق حسب المعادله اللي كاتبينه هـم << ابحثو عنهاا
وأي شخص اقبلـوه ويقول إن وزني وطولي تمـام يروووح...لأنه أجراءاتهم عاديه جـدا جدا لأحد يخاف من شيء .. بس يزود ثقه بنفسه شويه ويكون أحسن النـاس ...
بالنسبه لي أنــا الحمد لله عديت من الطول الوزن .. لكن أحب اقول معلومه هنـا ترا قالو لنـأ تجردو من ملابـسكم هههه طبعا اكيد راح يكون عليك السروال < لكن هذي بحد ذاته جديده علينـا .. لذلك حطه براسك لا تستغرب ههههه
بعد ماتجتااز الطول والوزن ترتفع معنوياتك حبتين لأنك لاحظت إن العدد تقلـص قليلـا
وبعد ذلك تذهب إلى المقابله الشخصيه << تمشيء طابور مع الطبيب وبعدين تنزلون لأسفل ويصفونكمـ بالمدرجات ويآخذون منكم الأوراق بحيث يتم الفرز للمستندات والصور ... إلخ
بعد ماتعدي من المرحله هذي يعطونـك نموذج تلصق فيه اوراقكـ وصورك وتجاوب على كم سؤال < - اسئله عاديه مثلا هل لكـ قريب مصاب نفسيـا وهلـم جراا ..
وبعد ماتخلص كتابه النموذج .. تعطيه اللي بالطاوله جالس وبعدين يختم عليه ومن هنا تبدأ رحلتك مع الكشف الطبي 1 وهو عباره عن فحص للعيون وأيضا فحص للأذن والأنف والحنجره والأسنـان ويآخذون عينه دم وآخير أكرمكم الله عينه من البـول < وهذي آخر مرحلـه بالنسبه للكشف الطبي 1 .. وبعد ذلك يعطونكم ملـف كبير تآخذونه وترجعون للأسفل عشان يختمون عليه بعد ماتلصقون صوركمـ .. بالنسبه للصور بالموقع قايلين 6 صور لكن بالواقع هـم يبوون ثمان صور يعني خوذو حسابكمـ
وآخيرا يقولون لكم روحو للأشعه طبعا الأشعه تطلعون من المبنى وتركبون بااص ويآخذكممم لمبني ثاني اللي هو فيه الأشعه وعلى حسب ارقامكم بالملفات الكبيره تدخلون الأشعه يآخذون لصدرك ولظهرك أشعه .... وبهذا نكون انتهينا من اليوم الأول

لكن ملاحظه أول ماتدخلون يجلسونكم بصااله بعدين يرحبون فيكمـ وأي شخص طابع الطلب من الموقع غلـط يخلونه آخر واحد لأأن اللي طابعينه صح راح يقولون لهم روحو اركبو بالباص وبعدين يآخذونهم للصاله الرياضيه اللي فيها قياس الوزن والطول وأيضا المقابله الشخصيه اللي سبق وقلته فووق ...
نصائحي :
1- أفطر قبل تدخل لأنك ماراح تروح لمطعمهـ .. تخاف يآخذون مكانك بالسـرا ..
2 - حـاول تكـون أول النـاس ... يعني خلك عند السواق بالباص وإذا نزلت من الباص خلك سريع عشان تآخذ اول مكان بالمدرجاات .


تمنياتي للجميع بالتوفيــق.. بالنسبه لليوم الثاني يتبـع ..

تابع

بعـد ماترجع لشقتـك متعبا من اليـوم الأول .. تآخذ قسطا من الراحـه .. وبعدين ( البقيه خاصه للكاتب ) خخخخخ .. بعـد ماتزقزق العصافير في سماء الرياض معلنـة بزوغ فجـر يوم جـديد << لا عمرك تجتهد هههه .. تستفتح يومك بصلاه الفجـر .. وعندما تكون الساعه التاسعه والنصـف تستعد للذهاب إلى كلية الملك فهد الأمنيه .. لبداية إجراءات اليوم الثاني الذي يبدأ في تمام الساعه العاشـره تمـأمـا .. كالعاده أفطر قبل أن تأتي .. وبعد دخولك إلى المبنى تجـد الباص بانتظارك وبعد ذلك يآخذكم إلى الصاله الرياضيه وعند دخولكم تتوجهون إلى مكان الانتظـار للطبي 2 .. هناا اريد أن أنوه بإنه سوف يتم تقسيم المجموعه إلى لجان لجنه أولى ولجنه ثانيه .. بحيث مثلا تكون اللجنه الأولى هي التي تبدأ بالكشف الطبي 2 واللجنه الثانيه هي التي تبدأ بالمقابلات الشخصيه ( مقابله شخصيه 1 ومقابله شخصيه 2 ) .. المهم نفرض إنك مع اللجنه الأولى وذهبت للكشف الطبي 2 .. طبعا المكان بجوار الطبي 1 < يعني راح تعرفون مكانه من اليوم الأول..
الكشف الطبي 2 هو عباره عن الحاله النفسيه للشخص << يسألونه كم سؤال عادي تراا لا أحد يخاف وأيضا فحص للباطنيه للشخص << طبعا كالعاده يقولون لكم تجردو من ملابسـكم هالمره هذي قاسيين شوي يقولون خل عليك بس سروالك الصغيـر وطبعا أحراج للشخص لذلك أنـا اقول لأي واحد عنده كشف طبي 2 يضبط أموره ويخلي عليه سروال قصـيـر سااتـر ويكون وسيع قليلا عشان الواحد ماينحرج ..
المهم الباطنيه عادي يشوف بطنـك وأنت واقف عنده إذا فيه عمليات سابقه او شيء شيء .. وبعدها تنتقل للمرحله الأصعب على كل شخص وهي الجراحه .. بحيث تدخل على دكتور مصري وطبعا يقولك أخلع يالـه << عاد أنتم افهمـوهـا مانب مصرح أنـأ
وبكذا نكون أنتهينـا من الكشف الطبي 2 .........
بعد ماتخلص يوقعون على الورقـه اللي معاك << طبعا نسيت اقولكمم اليوم الثاني فقط تجيب معك الورقه اللي فيهاا (صورتك وتوقيعات الكشف الطبي 1 )ولا تنسى تجيب معك صوره زياده علشان البصمـات اللي راح اقولكم عليه بعد قليل ...
===============================================
الآن بعد ماوقعو لك بالورقه اللي معاك بكذا تكون انهيت الكشف الطبي 2 بقي لك المقابله الشخصيه الأولى وهي بعد ماتجيء من الكشف الطبي 2 تعطي اللي جالس بالطاوله الورقه عشان يآخذ رقم طلبـك ويحط عليه علاامه صح ويآخذ الورقه وتجلس حتى ينادو على اسمــك فلان بن فلان الفلاني << ياحبيلهم يكرروون الاسم
نفرض إن اللي بالطاوله نادا على اسمـك يقولك رح للمكان هذا تروح وتمسك سرا .. وبعدين تلاحظ إن المقابله الشخصيه الأولى ماتطول ولما يجيء دورك تدخل ..
بعض الشبااب يقولون لي إنهم يخلونك تختار ورقه وتجاوب على اللي فيها ...
وبعضهم قاللي إنهم يسألونك بتخصصك مثلا تخصص لغه عربيه يخلونك تعرب جمله من القرآن <<= طبعا ماشاء الله عليهم طلاب اللغه بلابل بالإعراب ..
وبعض الشبااب عادي سألهم كم سؤال وقالهم تفضلـو ..
أهم شيء يشوفون قدرتك على الكلام .. تناسق جسمك العلوي مع السفلي .. إلخ
وبعد ماتخلص تروح لشخص اللي بالطاوله آعطاك الورقه عشان يختم علي الورقه بإنك اجتزت المقابله الشخصيه الأولى .. وبعد ذلك تنتقل للمقابله الشخصيه الثانيه .. يعطونك رقـم ونموذج تكتب فيه اسم مدرستك الابتدائيه والمتوسطه والثانويه وتوقع وتنتظر دورك بالسـرا << يعني لازم يكون معـك قلـم هنــاا
وبعد ماتدخل فيه رئيس لجنه يوجهك لأي شخص تذهب لمـه عشان يقابل معـك وبعد مايوجهـك تجلس ومن الأسئله بالمقابله الشخصيه الثانيه ...
يسألك كم سؤال عن نفسك .. او يقول تحدث عن نفسـك .. وبعضهم يقولك كم حافظ من القرأن .. ويخليـك تقرأ من القرآن حفظ طبعـا ... وبعضهم لا أحد يستغرب لا تناظرونن ترا ماقالولي أنـا يخليك تقـول لا أحد يضحك تكفون ههه يخليك تقول النشيد الوطني سارعي للمجد والعلياا .. إلخ << وناسه أحسن لك قلها باللحن مثل اللي يجيء بالتلفزيون عشان ماتغلط فيه هههههههههههههه
وبعد ماتخلص المقابله الشخصيه الثانيه تخلي اللي بالطاوله يوقع لكـ << لازم توقع كل شيء تعديه لأني شفت ناس رجعوهم لأنهم ماوقعو اوراقهـم
بعد ماتخلص يبقى لك البصمات تآخذ نموذج وتكتب فيه معلومات عنك وبعدين يمسكونكم سرا عشان البصمات يمسكون إيدك اليمنى ويبدأ اصبع إصبع بصمات بالورقه وبالأخير يآخذ إيدك ومن ثم إصابعك كلهن يآخذ بصماتهن تغدي إيدك سودا
ولما تخلص اليد اليمنى يبدأ باليد اليسرى ولما تخلص من إيديك يبدأون برجلينك < طبعا رجلينك من عندي هذي ههههههههه لا أحد يصدق :o
بعد ماتخلص بصمـات ..... تنتظر للطامه الكبرى اللي اشوفه عاديه أنا لكن بكلام الشباب إنه طامه كبـرى وهي اللياقه البدنيه ...
طبعا يخلونكم إلى الساعه 4 عصرا .. وهو عباره عن اختبارين أختبار مرونه << سهل يخلون رجلينك بوسط صندوق بحيث ماترفع رجولك عن الأرض ومن ثم تنحني بحيث ماتحرك ركبتـك ويشوفون يعني كيف الإطالات معاك << لا أحد يفكر بهذا كثير لأأني مااعرف اشرح لكمم لازم صوره وتراه سهل مره مره وهذا الاختبار عليه عشر درجات ..وبعده يخلونكم مجموعات كل 30 أو 29 شخص مجموعه عشان الجــري
الجـــــري تآخذ لفتين على الملعب 800 م يعطونكم طبعا تعليمات إنه اول 400 متر خلك هروله خفيف وبعدين آخر 200 متر اجري بأقصى سرعه عندك المهـ،م إن الو1حد اللي عنده لياقه يجري من أول شيء إلى آخـر شيء ترا 800 م مهيب شيء ياعيـال سهله :o وبكذا يقولون لك خلاص إنتهى اليوم الثاني ويحددون لك متى تجيب دفتـر عطوك إياه باليوم الأول تعبيئه وتجيبوه لهم على حسب مجموعتك محددين لكم اليوم ..... ويقوولون لكم إن فيه اختبار قيااس ...

أتمنى إن أكون وفقت بنقل الصوره لكم من الحدث واسمحولي ع القصـوور :o
وتمنياتي للجميع بالتوفيق وأدعو لي إني اقبل نهائي :o


[align=center]
منقول
[/align]

مشكور فتى الباحه لكن نبي نتعمق اكثر في حاجتين وهي
1-المقابلة الشخصية1و2واسئلتهم
2-اللياقة البدنية

أخوي فتى الباحة تسلم ماقصرت على المعلومات

اقتباس:

المشاركة الأصلية كتبت بواسطة السحا مشكور فتى الباحه لكن نبي نتعمق اكثر في حاجتين وهي 1-المقابلة الشخصية1و2واسئلتهم 2-اللياقة البدنية

مشكوووووور أخوي بس اللي أختبر اختبار المعلمين ما يكفي ؟؟؟؟