السلام عليكم ورحمة الله وبركاته

زي ماوعدتكم اعلمكم بالي صار معاي بالجوازات
اليوم موعدي بالمعهد
طبعاً الحضور الساعه 6 صباحاً

اول شي جب معاك قلم حبر ناشف ابو ريال
او تشتريه من داخل المعهد بس زحمه وقروشه افضل لك اشتره من برا قبل لاتجيهم

اول شي تسويه تمسك طابور مع هالعالم لحد ماتدخل المسرح عند باب المسرح

فيه وكيل رقيب يسجل الاسامي ويتاكد من وجود اسمك تجيه ويقولك كم رقم التسجيل تقول كذا وكذا يدوربالاوراق الي عنده لحد مايحصل اسمك ثم يقول خلاص ادخل

اذا دخلت تروح لاول المسرح عند الطاوله تاخذ 3 اوراق وحده لونها اخضر والثنتين بيض

ثم تروح تجلس على اي كرسي ويفضل الجهه الاماميه

بعد كذا تنتظر لحد مايدخلون العالم ويتكلم الضابط ويعطي التعليمات ثم يقول عبو البيانات بالاوراق الي اخذتوها



بعدين يوزعون اوراق الاختبار التحريري 3 اوراق تقريباً الساعه 7وربع يوزعونهن

نوعيه الاختبار

الورقه الاولى الرئيسية مخصصه للاجبابات فقط

الورقه الي بعدها ثقافه اسلاميه 10 اسئله
الي بعدها اسئله عامه 10 اسئله
الي بعدها اسئله انجليزي 10 اسئله

طريقة الاجابه يعلمونك هم وسهله الاسئله والطريقة بس يبي له تفكير بذكاء

تخلص الاختبار تنتظر ينادون الاسامي ممكن تخلص الساعه 9 وممكن تخلص الساعه 2 زيي << انا وواحد اختبرنا سوا وطلع 9 وانا لطعوني ل2 !!

المهم اذا نادو على اسمك تروح للجنه الاولى تحت المسرح مباشره بالوسط توقف عنده يركب الورق ويقولك كم رقم التسجيل ؟ ويسجله على الملف
بعدين يقول لك رح اجلس بمكانك

بعدها تنتظر ينادون اسمك مره ثانيه وتروح يم العسكري الي نادى اسمك ويودي ملفك للجنه الثانيه الي بجنب الاولى تقيس طولك ووزنك فيها

بعدها يقول رح اجلس واذا ناديناك تجي

تنتظر ينادون اسمك تروح لهم عند الضابط الي يصادق على الدورات التدريبيه والكلية التقنيه اذا معاك توريه صورة الاصل وهي معاك وخلاص تروح للي بجنبه ويشوف طبق الاصل من شهادة الثانويه ويعطي الي بجنبه صفه الضباط عميد وعقيد ولواء ومدير معهد الجوازات بنفسه يسئلونكط عن اسمك ومن وين انت ومن هالاسئله ويقولون لك يالله مع السلامه لاجاء تاريخ 25/3/1431هـ خش عالموقع وشف نتائج القبول الثاني


موفقين جميعاً