بسم الله الرحمن الرحيم - السلام عليكم

تصدقون بعد اربعة سنوات من البطالة و اللف والدوران في شركات ابو ريالين - اخيرا جاء الفرج والقبول المبدئي في امن المنشئات .

لكن ظهرت لي مشاكل مدري من وين طلعت - سبحان الله والحمد لله على كل حال

ــــــــــــــــــــــــــــــــــــــــــــــــــ ــــــــــ

السالفة من البداية :

انا خريج الكلية التقنية بالدمام عام 2005 ( انا من اهل الدمام واهلي هناك )....و بعد اللف والدوران لقيت وظيفة في شركة خاصة في جدة ....ومازلت فيها موظف للاسف وراتبها عادي جدا ومايسوى المجهود اللي ابذله تجاههم للاسف . وهذه لعنة القطاع الخاص ....يمصوك مص ويعطوك فضلات ارباحهم . ولكن على قولتهم احسن من الجلسة بالبيت

المهم تزوجت الحمد لله بعد ماتوظفت بسنة وعندي بنوته والحمد لله وساكن بالإيجار .

صار تقديم في امن المنشئات قبل شهرين تقريبا وقدمت مع العالم عن طريق الموقع ...

و بعد نهاية التقديم ظهرت النتائج و ادخلت رقم طلبي وطلعت النتيجة ( نأسف لعدم قبول الطلب )

افا ياذا العلم !!!!!

جاني احباط غير طبيعي وقتها .....ومت من القهر ...

ــــــــــــــــــــــــــــــــــــــــــــــــــ ــــــــــــ

الموووهيم امس الخميس المغرب وانا منهمك في عملي الله لا يبلاكم فيه - جاتني رسالة و يوم فتحتها الا ومكتوب فيها : ( تم قبولك مبدئيا في قوات امن المنشئات وعليك الرجوع للموقع )

انصعقت وماصدقت .........كيف كذا ؟؟؟ امس مرفوض والحين مقبول !!!!!

طيب ليه ماقالوا ذاك اليوم اني مرفوض مؤقتا ؟!!!

المهم دخلت الموقع وطلع اني لازم اروح للمقابلة في مركز امن المنشئات بالدمام ( طريق الدمام الخبر ) وموعد المقابلة يوم الأحد القادم !!!!!!!!!!!!

ــــــــــــــــــــــــــــــــــــــــــــــــــ ــــــــــــ

المشكلة الحقيقية :

ان زوجتي وبنتي حاليا مريضتين الله يشفيهم ....... الظاهر فيهم فيروس او بكتيريا في المعدة ..... وكل شوي يستفرغون - الله يعزكم

يعني ما اقدر اسافر بالسيارة مع اهلي لانهم تعبانين وماراح يستحملوا ...

ثاني شيء رحت المطار امس آخر الليل ومالقيت حجوزات للدمام كلها فللللللللللللل حتى انتظار مافيه !!

يعني لا بر ولا جو !!!

ــــــــــــــــــــــــــــــــــــــــــــــــــ ـــــــــــــ

من جد انا في حيرة من امري

فكرت اني اكلم اخو المدام اللي ساكن بالجنوب عشان يجي لجدة و يقعد مع اخته وانا اروح برا للدمام

بس والله انه مشوار عليه ( ست ساعات ) !!!!!

ــــــــــــــــــــــــــــــــــــــــــــــــــ ـــــــــــــ

اخيرا قررت اني اكلمهم يوم السبت بكرة و احاول انه يتأجل الموعد الى ان القى حجوزات بالطيارة

وصراحة مدري هل بيوافقون على التأجيل

و الا النظام العسكري مافيه تاجيل !

ــــــــــــــــــــــــــــــــــــــــــــــــــ ــــــــــــــ

والله اني جالس ابكي واضحك

يعني يوم ان الله فرجها وتم قبولي مبدئيا .... تواجهني هالمشاكل ...... مافيه حجوزات بالمطار !! واهلي تعبانين وما اقدر اسافر بر !!!!!!

الحمد لله على كل حال

لايفوتك الموعد حط في بالك انك لازم تحضر
او تروح عليك فرصة انت محتاج لها

اترك جميع الظروف وركز على هدف واحد حضور الموعد

والله يعينك وكل شي بالنهاية مكتوب ومقدر وخاصة الرزق

ان شاء الله .الله يرزقكـ ويوفقكـ ...

ياخوي لو يحصل تشيل عيونك وتخليها يم أهلك في جده خلها ورح الدمام بدون ماتشاور أحد.

حاول بقدر الإمكان تخلي أحد يجلس عند أهلك ورح الدمام صدقني رواتب أمن المنشآت راح تنسيك تعب الشركات.

يارجال روح ياخوي روح.
لو تاخذ اهلك بالسياره وتمشي على مهلك وتريح كل شوي . اهم شي لاتتكاسل ويطير رزقك .
وحط براسك ياخوي [ بكره بتكبر بنتك الله يحفظها لك وبيرزقك الله بغيرها من اولاد وبتزيد عليك المصاريف ]
وماتقدر تسوي شي وقتها تحصل العمر راح والوظائف ماتقبلك وكل شيء يتقفل بوجهك .
خلي نظرتك دائماً مستقبلياً . وماتدري يمكن هلوظيفه الي جاتك رزق مع رزق البنوته الي جاتك الله يحفظها لك.
ياتجيب اهل زوجتك عندها وتروح انت للدمام .
يالله يعينك خذهم معك بالسياره وعلى مهلك وريحو بالطريق الين توصلون .
وعسى الله يوفقك ويرزقك ويسهلها عليك ان شاء الله.
تحيتي

اسمحلي انت مجنون رسمي الحين تنقبل نبدئي وماتبي تروح وش تنتظر


تنتظر يوظفونك وانت جالس في بيتك


ياخي لازم تروح وتروح غصب لا اجي اخطفك واوديك بنفسي <<< الحين يجلدك

لازم تروح ياخوي

ياخوي وش الي مشوار ست ساعات لاخو زوجتك صدقني لو تقوله ان يجيك عادي وبعدين انا من ابها وتبعد ست ساعات صدقني لو انا في وضع اخو مرتك لاروح جده عادي ياخي اتصـــل عليه قوله يجيك جده اذا تستحي الى هذي الدرجه انك تكلمه وتقوله يجيك احجز له طيران وخله يجي على جده اهم شي لا يروح عليك الموووووعد لااااااااااااااااااااااايرووووح الى متى وانت في شرررركه ياخي فكر فيها

< يحس انه انفعل خخخ

خيــــــــــــــــــــــــــــرهـ عسـى أن تكرهو شـئ وهو خيــر لكم


لاتسمع ولا تطيع انا عسـكري ومتبهدل والله انى اتمنى وظيفة بـ 3000 الالف ريال بس تكون مدنية والله انى صـادق

ومتزوج ولله الحمد طعني خلك مدني وبيني وبينك وش المشكلة انك من بعد نهاية دوامك يحفظك ربي تريح لك سـاعتين وبعدين تطلع بسيارتك تكد ( تكسي ) والله انا كنت اشتغلها ذهب والله ياخوي وداخل جده صدقني يوميتك بتكون مصروف البيت وللبنت الى عندك الله يحفظها لك والله ياخي لا تستعجل فكر في كلامي وان كنت من النوع الحياوي تراا عادي مره وحده شفلك واحد يأشر وركبه معك وشف الحلاوة يوم يعطيك حسـابك صدقني بتكون في نعمه وخلك مستمر على الشغله ذي فقط ست شهور وشوف حياتك كيف تتغير ...



دعواتك لناااا ....

شوف وانا اخوك اذا تعرف ناس عندها مقابلة بعد اليوم الي انت فيه (يعني اليوم التالي) فانك تقدر تروك بعد يوم من يوم موعدك ، لاني يوم رحت ذيك المرة طلع عندهم ورقتين ورقة للي ما قدروا يخلصوهم اليوم الي قبلة وورقة لليوم الي انا فيه
روح واعقلها يوم الاثنين اذا فيه مقابلة لناس اخرين

متى موعدك وانت اتصل عليهم وقلهم هل ممكن اراجعهم بمكة لان لهم مر بمكة وانا بعد انقبلت مبدئي