طرائف البطالة ومأسي البطالة [ بوح للجميع ]

بعيد الهقآوي · #1 (**permalink**) 27-02-2010, 06:10 AM

السلام وعليكم ورحمة الله وبركاته

اخواني جميعنا يمر بطرائف بالبطالة وهو يبحث عن العمل

سواء بالمنتدى او بالتقاديم او بالمقابلات الشخصيه

موضوعنا فرفشه وكل واحد يسدح هنا تجاربه الشخصيه

واجمل موقف مر عليه واسوء موقف . ان كان بالمنتدى او بجهة عمل سابقه .

ببدى انا اولكم ,

طبعا انا خريج ثانوية عامه من 4 سنوات ونص

قبل فتره شريت جريده لقيت فيها اعلان عن وظائف مندوبين قلت ياولد الشغل يجيب شغل

قدم واحتك بالعالم واستفيد .

وانا اللي ارسلهم ,

وماصدقت اول مره احد يعبرني ويتصل علي بسرعه

ويوصفون لي موقعهم وادز لهم طيران

الى هنا كل شي طبيعي لاكن المضحك جدا قادم

وصلتهم الساعه 4 العصر مقابله شخصيه

وخفت اول مره مقابله مع 4 خخخ

المهم واثق من نفسي واعجبتهم وقبلوني المضحك جدا قالوا لي لاتروح البيت بعد المغرب تباشر العمل

اقسم بالله ماصدقت فيني ضحكه وكاتمها وبنفس الوقت فرحه

المهم فعلا بنفس اليوم جلست ساعتين وقالو خلاص من بكره تجي من 9 الصباح قلت اوك

بعد تقريبا اسبوعين عرفت ليه اقبلوني

كنت 4 في واحد

مندوب + موظف استقبال + خدمة عملاء + مشرف على المندوبين وانا منهم

المهم قلت ياولد والله منتداك ماتنساه واسالهم ماتبون موظفين قالوا الا وبنزل اعلان ثاني بجريدة ويكلف الاف الاعلان بجريدة مثل الرياض .

المهم قلت واللي يجيبهم لكم ومجانا

قالوا على يدك وتصير احسن موظف > احسن موظف وين اصرفها

احسب فيها مكأفئه اول

المهم نزلت اعلان وقالوا تتحمل مسؤلية من تجيبهم

والمصري والسعودي بدت عيونهم علي واول اختبار حقيقي لي

وانزل اعلان واحد على هالرابط موجود

https://www.btalah.com/t92638.html

كان النك نيم تبعي ولد الهيلا

وهااااات يااتصالات على الهاتف

طبعا انا مكروف ارد على حوالي 4 اجهزة عندي على كل مكتب كان عندهم 5 خطوط

غير الفاكس اللي رحمته بدى يزكم من كثر ماوصله من cv

انهبلوا قال اعلان بجريدة مثل الرياض مايجينا كثر هالاتصالات

المهم واعدت كثير يجون عشان المقابله الشخصيه

وتوظفوا شباب سعودين زي العسل يمكن 6 اكثر لانهم بدور غير اللي انا فيه انا بالدور الثاني
وهم بالثالث

ويوم جو بنات طبعا حددت مقابلتهم الصباح عشان يكونون الموظفين خارج الشركة لان اغلبهم مناديب ومايرجعون الا العصر

ويوم من الايام سمعت صوت الا موكب مع الدرج طالع لنا

طلعوا بنات فشلووووني من قلب مع المدير

< رحت لمكتب اضحك واحط يدي على راسي

وبعد ماراحوا المدير قال لااشوفك تنزل اعلانات

وقعدت 4 شهور تقريبا وهمن قضبوني الباب

واسف على الاطالة مير ذكريات يومني مسؤل

وحبيت تشاركوني فيها

على فكرة اللي توظف من الشباب وتذكر يوم شاف الرابط ياليت يسدح لنا قصته

والله حبيت الشباب اللي جو عن طريق المنتدى وسوالف وفله قبل يطلعون لشغلهم كمناديب

اللي عنده موقف بتقديم ولا بمقابله مضحك يذكره

واسف ع الاطالة ثاني

دمتم بود

الانونه · #2 (**permalink**) 27-02-2010, 08:51 AM

خريجة ثآنوي من 3 سنين ونص <- ماتقلد

وخريجة دبلوم برمجه من 3 شهور

يآلبى الآرقام الفرديه بس

أبدن ترآك ماتنرحم

بس مآشاء الله يجي منك وشخصيتك قويه وتوظفت وسويت اللي عليك
إلييييييين أنكرشت يعني سويت اللي عليك

مير لايهمونك ربي يعوضك بالأحسن

بس أنآ مالي خبرآت من تخرجت خآيفة أتوظف وأدخل عآلم الوظايف
وحآطه رجل على رجل
وأبحث بس بالنت وأدعي ربي يرزقني وظيفه نسائية بحته مع إني أبطي

اسراررر · #3 (**permalink**) 27-02-2010, 09:06 AM

اقتباس:

المشاركة الأصلية كتبت بواسطة بعيد الهقآوي

ويوم جو بنات طبعا حددت مقابلتهم الصباح عشان يكونون الموظفين خارج الشركة لان اغلبهم مناديب ومايرجعون الا العصر

ويوم من الايام سمعت صوت الا موكب مع الدرج طالع لنا

طلعوا بنات فشلووووني من قلب مع المدير

< رحت لمكتب اضحك واحط يدي على راسي

وبعد ماراحوا المدير قال لااشوفك تنزل اعلانات

وقعدت 4 شهور تقريبا وهمن قضبوني الباب

واسف على الاطالة مير ذكريات يومني مسؤل

وحبيت تشاركوني فيها

على فكرة اللي توظف من الشباب وتذكر يوم شاف الرابط ياليت يسدح لنا قصته

والله حبيت الشباب اللي جو عن طريق المنتدى وسوالف وفله قبل يطلعون لشغلهم كمناديب

اللي عنده موقف بتقديم ولا بمقابله مضحك يذكره

واسف ع الاطالة ثاني

دمتم بود

ههههههههههههههههههههه
يعني الوظايف اللي وضعت في المنتدى كل التقدمين عليه بنات

بصراحه ماي تجارب في الوظائف

<<حديثه التخرج

بكالريوس انجلش · #4 (**permalink**) 27-02-2010, 10:01 AM

غدا يوم آخر · #5 (**permalink**) 27-02-2010, 04:23 PM

أكيد المواقف كثيرة بعضها يضحك
وكثير منها يبكي

أكثر شي يقهر يوم تروح وتقدم على وظيفه وتلاقي إللي قدامك حتى مايرد السلام
عليك سبحان الله كانك جاي تاخذ مكانه
مقهوره من سكرتيره قابلتها ... بس الله يسامحها

وعلى العكس منها سكرتيره ثانيه ربي يسعدها وين ماكانت
والله مافيه زي الأخلاق تحبب الناس فيك

بس المواقف تزيدنا إصرار على تحقيق احلامنا

موضوع ذو شجون... مشكور اخوي

Dreamliner · #6 (**permalink**) 27-02-2010, 06:55 PM

كلمه لها وقع خاص في الخاطر (بعد العيد بشويه)ههههههههه قلها بالمصري راح تحس بنصب المحاسب حق الشركه مصري

واقع قصة هالكلمة مضحك جدا بالنسبه لي لا ني عايشت الموقف من قبل سنه بوعود بعيدة الامد على اساس رفع الراتب 100 ريال لان راتبي وقتها 1810 ريال يعني انا والفلبيني واحد وان اروح المطار كل يوم من بيتي حول 35 كيلو 6 ايام في الاسبوع 8 ساعات دوام يعني راتب مايكفي بنزين السياره الى 13 الشهر شوف عزة النفس

قلنا يمكن يصير في امل لما نخليها اوفرتايم طلعت نفس الراتب ما يتغير اللهم 3 ايام اوف فالاسبوع للفله .. بعد العيد وبعد ما خذنا خبره سنتين بالمطار انا وبعض الطيبين الله يذكرهم بخير هم حول 6 ادركت اني غبي واني ضحية نصب واحتيال تدار من قبل مصري نصاب واعوانه من حزب ابليس ولازالت هذه الشركه تواصل الضحك على الدقون حتى يومنا هذا وهي في الراكه (في وحده من عماير الراكه ولا لها لوحه تدل انها شركة مقاولات متعاقده مع شركه ذات صيت ولها وزنها وثقلها في المملكه ومديرها المصري اسمه يبدأ بحرف الجيم وينتهي بالهاء وسيارته كامري 2004 لون كشميري (راعي هجوله)

فضحته وربي دوروه بحي الراكه ما في غيره نصاب بين عيوني وشبيه لعادل امام بعض الشيئ بس يلبس ثوب,,المهم الادهى من ذلك اليوم 13/3/1431هــ والله ثم والله اني رايح مكتب العمل بعد انقطاع عنهم دام سنتين رايح ووجهي ادور وظيفه في مكتب العمل بالخبر قال اسمك مسجل عندنا.. كيف ؟؟؟ يا فلان انا مسجل اني طلعت من الوظيفه من مكتب الدمام قال الدمام غير الخبر ( المنشأه مسجله لدى مكتب عمل الخبر) مع اني سائل بمكتب الدمام قبل سنتين قال اسمك غير وارد يعني لست مسجل بعد الوظيفه والاستقاله يعني فنش من مجاميعوه (ولا انسى يوم خذت ورقة وزارة العمل من الموظف وقال لي اصبر 24 مدري يومها يقصد 24 ساع ولا قرن الله اعلم ونطلعك من السيستم قلت فرقاهم عيد كلها يوم طلعت سنتين) المشكله السيستم في الدوائر الحكوميه واحد وكلها اجهزه مترابطه

؟؟؟ هذا اول موقف خخخخخخ طويل صح على كبره 4 سنين , سنتين بطاله مقنعه والاخرى بطاله ابا عن جد , الموقف الثاني ايضا حدث لي اليوم بعد ما خلصت اموري من مكتب العمل في سنغافوره (الخبر) ذهبت لمصلحة الارصاد وحماية البيئة كانو طالبين وظائف اليوم بادي التسجيل عليها لذلك جرى التنويه ياللي بتقدم رحت لهم في الراكه على امل انهم ما يطالعون الا شهادة الثانويه خل دبلوم الهندسه حقي يخيس واشرب ماه (على وظيفة مراقب بيئي والثانيه مراقب جوي اتوقع بالمرتبتين السادسه والخامسه) موجود اعلان عنها بالمنتدى المهم رحت وكلي شموخ عندي الثانويه اللي هم طالبينها وزود دبلوم فني سنتين مع خبره هع

قابلني عسكري وجه سمح قالي لاتعب نفسك ماراح يقبلونك قام يطالع فيني ويبتسم ويقول شكلك مانت مصدق قال ادخل وشوف قبلك اربعين واحد دخل وطلع ما استفاد قال والله مالي مصلحه اقطع رزق احد ماصدقته ودخلت قابلنا واحد داخل المبنى ملتوي دلني على زعيم الملتوين حق التوظيف الاخر

ويطالع فيني ويقول هذا جاي مندفع ماهب شايف حد

قال وش شهادتك قلت له دبلوم قال دبلوم وشهو قلت دبلوم فني وكنه يقول بخاطره وش هالحنفيه اللي تطلع الما بالقطاره قلت له انتوا اعلنتوا عن وظائف وشروطكم تبون ثانويه بس قال stop احنا اشترطنا على الثانويه الخبره قلت كيف ولم اراها ....(عجبا)؟؟؟ قال احنا اضفنا شروط (يا سبحان الله بين ليله وضحاها)

قال انت ما قريت من الشروط برنامج اعدادي بعد الثانويه قلت نعم قال هذه المقصود فيها خبره ...قلت على حد علمي ان البرنامج الاعدادي مسؤولية الرئاسه العامه لتدريب الكوادر لأعدادها للعمل وليس خبره تحصلها من اي مكان مثلا في البقالات قال من قال لك في ارامكو وشركات خاصه اخرى عندها برنامج اعدادي واللي نعده خبره (قلت في نفسي حد ضفنا بوظيفه على شان نجيب لك الخبره منين نجبيها من البقاله يا بن اللذين..؟؟) او انك تكون خريج هندسه جغرافيه بكالريوس او بيئه اهاااااا الحين فهمت عشم القرد بحديقة الحيوان

.... وقتها بس اتضح لي ان الشركات او المؤسسات تحاول اللعب بالاشتراطات والبنود للمصالح الشخصيه فقط تعرفني اعرفك .. زي الاتصالات يوم غيرت رسالة عزيزي العميل خلتها عميلنا العزيز فاتورتك... وهم قامو يطورون بدل ما تقول الشركات خبره سنتين في نفس المجال تقول برنامج اعدادي لمدة سنتين او سنه بنفس التخصص
(((همسة حب ووفاء وولاء))) ...
والله احب ديرتي وهواها واعز ترابها واسعى لخدمتها لكن في ناس من الاجانب بكرا راح يودع الديره بعد ما حشى جيبه الاف او حتى الملايين وصدرها للخارج وبأخرها يتفل علينا ولا يعبر ديرتن احتظنته وراعت حقوقه او حتى المسؤلين من بني جلدتنا يحاربك انت ياولد ديرته لا غراض شخصيه لا يعلم بها الا الله ؟؟؟ لكن الامور من ردي لاأردى والسبب الفساد الفساد الفساد الله يصلح الحال يا رب العالمين وتصير نسبة العطاله 0% وقله او ندره في عدد الاجانب

كاسر البطالة · #7 (**permalink**) 27-02-2010, 07:16 PM

السلام عليكم ورحم الله وبركاته

المواقف والقصص عن البطالة كثيررررررررررررررررررررررررررررررررر

بس بأختصار قدمت على وزارة المواصلات وكل شيئ اوكي المؤهل الخ

اخر شيء بعد المقابلات دخلت على احد المسؤلين هناك

انتبه لهذا المشهد المضحك المحبط

خلاص روح حط ملفك على الطاولة يوجد طاولتين يمين ويسار عدد كبير من الملفات فوق بعض

طيب وين قال انت في اليمين يعنى على المحرقة ابغاه ما ينتبه ابي احطها في اليسار

خفت يحطوني سواق تراله في المواصلات

هههههههههههههههههههههههههههههههههه

والف شكر على الموضوع اكثر من رائع محبكم كاسر البطالة

سألوني الناس · #8 (**permalink**) 28-02-2010, 06:03 AM

انا متخرجة صآر لي شهر و 8 ايآم

ولآباررك الله فيهم مآ فرحوني بتخرجي
تخرجت منهآ وقالو عليكم أختبار هيئة من هنآآآ

الموقف الوحيد اللي تذكره

قبل شوي صآر
جيت بقدم بالديوآن كتبت اسمي وسجل المدني وكل شي تمآم
جيت على (صندوق البريد ) و (الرمز البريدي ) مآ عرفته وقفلت الصفحة كلهآ < أنآ إذآ عصبت مآ ارحم

من اولهآ تعقيد < اييييييييييييه وهذآ وآنآ لسى بأول درجة

الله يعين

اما موقفك فلللللللللللللله

يالله انت سويت اللي عليك وأكثر ومآ قصرت

الله يعوضك باللي احسن منهآ

مقهوره · #9 (**permalink**) 28-02-2010, 06:31 AM

أجل طرائف
>> من جد شر البليه مايضحك [IMG]http://www.h22k.com/vb/images/icons/i****.gif[/IMG]

وش أقول وأخلي ووش أخلي

مابحثت عن وظيفه بمعهد حاسب وقدر الله أن الزوله المديره تجي لحد بيتنا وتقولي أبشري بالوظيفه
ثم بعد كم شهر تقل فص ملح ودااااااااااااب

اللي حزني ليتها ما أملتني بوظيفه .. وكيف أني غبيه علقت آمالي بزوله [IMG]http://www.h22k.com/vb/images/icons/i****.gif[/IMG]

وإلا أتكلم عن واحد من أقاربي دق صدره بفزع وبجيب لك تعاقد بالأخير مهوب ذنبه غرق بمصايب ماعاد دور فيها أحد

وإلا أقولكم عن صديقتي كلمتني العصر تقول ناقصنا مرشده اجتماعيه بدار تحفيظ القرآن العصر وكان أسمك من ضمن الأسماء اللي أخترناها وش رايك
>>من الفهاوه اللي براسي على طول قلت لا ياشيخه هذي أمانه وأنا ماعندي خلفيه كيف أكون مرشده أجتماعيه ولا هوب تخصصي ..
بعدين أنا أبي أشتغل الصبح مع المسلمين مابي العصريه >> ولك عين تشرطين
عموما الوظيفه في الدار مو محرزه مادياً بس أهو كان مسمى وظيفه لو قبلت>> ماعندي وقت بنفس المكالمه رديت لها خبر..

بعيد الهقاوي وجميع الإخوان والأخوات الله يكتب لكم الخيره بأمركم و يعوضكم بوظائف خير من اللي راحت ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

طرائف البطالة ومأسي البطالة [ بوح للجميع ]

إستراحة الأعضـاء

السلام وعليكم ورحمة الله وبركاته اخواني جميعنا يمر بطرائف بالبطالة وهو يبحث عن العمل سواء بالمنتدى او بالتقاديم او بالمقابلات الشخصيه موضوعنا فرفشه...

طرائف البطالة ومأسي البطالة [ بوح للجميع ]

تسجيل الدخول

طرائف البطالة ومأسي البطالة [ بوح للجميع ]

إستراحة الأعضـاء

السلام وعليكم ورحمة الله وبركاته اخواني جميعنا يمر بطرائف بالبطالة وهو يبحث عن العمل سواء بالمنتدى او بالتقاديم او بالمقابلات الشخصيه موضوعنا فرفشه...

طرائف البطالة ومأسي البطالة [ بوح للجميع ]