السلام عليكم ورحمة الله وبركاته


انا حابة اسوي مشروع وخاصة اني راح استلم رواتبي المتأخرة دفعة وحدة صحيح المبلغ مو كبير بس ما ابغاه يضيع هباءاا منثورا وابي استثمرها بس انا ما اعرف فهالمجال كثير وابي منكم تفهموني سالفة المشاريع وشروطها وقوانينها حبة حبة


ابقولكم الي عندي وانتم فيدوني هل راح تنجح او لا وعطوني اقتراحاتكم

(1)
انا فالبداية كنت افكر اشتري ارض لانها ماراح تضرني عجبني موقع ارض بس لقيتها دبل المبلغ الي معي وللحين عيني عليها بس ما ادري كيف ادبر باقي المبلغ هل بنك التسليف ممكن يعطوني والا لاني بنت وعاطلة حالياا عن العمل راح يرفضوا؟؟؟
وشركة عبداللطيف ممكن تعطيني او لا لاني سمعت ان لهم شرووط وهيك شغلات
ولان هالحلم لسى بدري عليه على كلام اهلي كنسلت هالحلم حاليا وابغى شي يدبل المبلغ الي معي ويضاعفة بإذن الله عشان احقق حلمي الأكبر(عمارة سكنية:> متفائلة صح

(2)
وفيه ارض بنفس المبلغ الي معي او اقل بس اراضي استراحات واخواني قالولي اشتري ارض عند استراحات الشباب وأ سوي استراحات شباب أاجرهم يقولون تكسب لانهم دايماا لما يدوروا مايلاقوا وحدة فاضية
الفكرة عاجبتني بس مترددة للحين
بس بشكل عام لو شريت ارض اقدر اطلب قرض مستقبلاا زي الشباب عشان ابنيهاوالا لأ

(3)
حبيت فكرة الدكان الصغير الي نشتري منه واحنا فالسيارة بدون ماننزل الي على الطرق بس ما اعرف اذا هي فكرة ناجحة او لا و كوني فالقصيم ما اعرف فأي منطقة واي موقع راح يكون مناسب عشان اقدر افتح لي واحد
وما اعرف شروطها ولا ايش الي لازم اسويه كخطوة اولى

(4)
فيه واحد من عائلتنا فاتح مؤسسة وعنده عمال ومسكنهم فبيت خاص حابة استفيد من هالشئ وافيده بس للحين مافي طريقة جاية فبالي عجبتني فكرة الجبس واعمال الديكور بس كيف راح اعرض عليه الفكرة وأنا مافي شي محدد في بالي
انتوا تشوفوا انها فكرة ناجحة وتستحق المغامرة؟؟!!

(5)
أنا اليوم جاتني فكرة وابتديت بتنفيذها الي هي اسوي اعلان لنفسي كمدرسة خصوصية او اسوي تراجم وملخصات وبحوث وزميلاتي ما قصروا ابتدوا اعلانات وتقديم خدمات وافكار

استفسارات عامة:

دراسة الجدوى فيه ناس يصلحونها والا كيف طريقتها والا الشخص يسويها



مين الي يدعموا المشاريع فالقصيم
وايش شروطهم

ومين غير بك التسليف يعطي قروض مالية لهدف شراء اراضي او بنائها
واقدر اقدم وانا عاطلة ويكون ابوي كفيلي براتبة

ايش اكبر مبلغ اقدر اتحصل عليه من المؤسسات الي داعمة للمشاريع وايش اقلهم ولو كنت اباخذ بحدود 30 الف كيف نظام التسديد وكم راح ياخذوا فالشهر وهم على اي اساس يقدموا هالمبالغ

اذا عندكم اي فكرة اقدر استثمر فيه المبلغ بطريقة رابحة بإذن الله
أسئلة كثيرة تدور فبالي ومالي من بعد الله الاانتم
المبلغ بين 30-40 ألف وممكن اذا مشروع موثوق فيه استلف وازيد المبلغ


انا اتحمست لهالأشياء من منتداكم وفيه افكار حلوة كثير بس ماتناسبني لاني في منطقة صغيرة فالقصيم ومافي مجال ابيع واشتري



منتظرة ردودكم وتعاونكم
وجزاكم الله خيرآآآآ