السلام عليكم ورحمة الله وبركاته
كيفكم شباب

شباب انا مقدم على وظيفة فني تكييف طبعا اليوم اختبرت الساعه 1.30 بقولك وش صار ..

طبعا ً اول شي ضيعت المكان لين لقيته وهو مبنى 28 وبعد مالقيت دخلت الاختبار واتفاجئ كل الشباب الي درسوا معي موجودين وشبكم ياهو والله يارجال عطاله وش نسوي وقدمنا وقبلونا , المهم الى ان جاء واحد فك قاعه 104 جلسنا ندقها سواليف ونضحك لإن الوضع كان موجود بالكلية اختبار وقلم وحركات حسيت اني باقي بالكليه , شوي جاني واحد يقول طلعوا بطايقكم عشان اشوفها طبعا الي بطاقته جديده وقديمه ماتفرق عادي يشوفها وخلاص .. وشوي يقومون يقولون لكم خلي كرسي فاضي وكرسي واحد يجلس معه عشان لاحد يغش من الثاني ..

طبعا اختبارنا .. الاسئله عباره عن ممكن 10 الى 15 سؤال من التخصص .. وبعدها خيارات عاديه اعتقد من ضمن الاسئله العاديه جاتني اصغر دولة بالعالم ..

=========

طبعاً أنا جيت لكم للمهم والهم جدا جدا :-

1- انا للاسف والله كنت بالساعه 12 افطر مع الوالد والوالده وسواليف ورحت تركتهم وقلت بروح اختبر وتروني بعد مااختبرت وسلمت الورقة سئلت المراقب قلتله الحين الوظيفة الشاغره الي قاعدين نختبر عليها كم وظيفة وجاوبني وهو مبتسم وظيفة وحده ههههه ,, قلت والله لو قلتوا لي لو ماجيت على قال اني فرطت في سواليف مع الوالد والوالده الله يحفظهم ..

2- انا انسان دائماً عندما اذهب لاي مكان اثير التسائلات . وتسائلي هو انه الي اختبر معنا ممكن اكثر من 200 شخص وبكرة فيه اختبار كمان يعني ممكن يوصلون 400 بالراحه والسؤال هو هل راح يصححون كل هذه الاسئله اذا تحدثنا ان الأسئله هي لا تصحح بالكمبيوتر لانها اسئله عادي كانها باختبار المدرسه زمان اختبر الاجابه الصحيحه .. وبين هذا وهذا الوظيفة هي وحدة يعني ليش يضحكون على الناس ..

3- اختبر معنا خوينا بالكلية واتضح انه شغال بالجامعه ويقول ان راتبه 2500 مدري 3500 ويقولي دوامه من 8 الى 2 ويقول ان هذا الاختبار اذا اجتازه يترسم بالوظيفة وقالنا اصلا انا شغال وطالبين وظيفة وحدة يعني لو اعرف رقمه من بدري لو دقيت عليه الو كيفك كيف الوضع والله ياغالي وظيفة وحده اها شكراً واجلس اكمل سواليف مع الوالد خخخخ ..

4- نصيحتي للي بيطقها مشوار من الرياض والشرقيه ان يعرف كم عدد الوظيفة لانه ممكن يختبر معك 400 شخص والوظيفة الشاغره هي وحدة !! ..

5- اكتشفت ان ادارة الجامعه لعبتها صح لكي يزيلون الشبهه تحط اختبار وترشح الي تبغى هذا اذا ممكن ان المرشح ممكن يكون موجود قبل الاختبار .. يعني بدل مايبقبلون الا واحد واثنين ويقولون واسطات ويسبون فيهم يقولون لاياعمي نقبلهم ونختبرهم عشان نزيل الشبهه ..

انا صدعت والله من اسئلتهم مع انها سهله بس انا كرهت الدراسه والاختبارات ذي وحليت بسرعه وخرجت ورحت البيت وبيني وبينكم والله انا ندمت اني رحت اختبر بس حمدلله على كل حال ..





ادعولي ياشباب ان الله يرزقني بوظيفة

الله يرزقك يارب

وعليكم السلام

اهلا فيك

والله شي يقهر صراحه تتنافسون على وظيفه وفي الاخير يبغون واحد فقط

مثل ما قلت اصلا معروف مين الي بيقبلونه مثلها مثل العسكريه سجل في الموقع وما يقبلون احد
لانه الي بيقبلونهم موجودين عنهم واسطات

ربك يعين


انا منتظر يعطوني موعد الاختبار بعد كلامك هذا حطمتني ومدري اروح ولا لا



وعاشت بلادي

الله المعييين ..

أنا انقبلت لدخول الأمتحان على وظيفه سكرتير خاص .. المرتبه الرابعه ... بعيييده عن تخصصي بس تخصصي كانت وظائفه متاحه للشباب ... يستاهل أروح أنا من الشرقيه؟ شرايك؟

تنصحني اروح ولااستريح لأن الوظيفه المقدم عليها فني مختبر حاسب آلي ومطلوب الدرجة الجامعيه ومعاي جامعيه متوسطة حاسب آلي وانا من الطائف واختباري السبت الصباح ؟؟؟؟؟؟؟


بالتوفيق لكــ..

..الله يكتب لك الخير يارب، انت خذ بالأسباب و توكل على الله..
..الحمد لله على كل حال..

لاحول ولاقوة الا بالله
والله حرام اللي قاعد يسير ياجماعه يعني بيلمو العالم من اخر الدنيا ويجبوهم عشان وظيفه وحده؟ طيب لا يقبلونا من الاول ...
مانقول الا حسبي الله ونعم الوكيل

هي مفهومه هذا شي كذا قدام الناس يعني احنا سوينا مسابقة وترشح عدد كبير

واللي نجح خلاص توظف وكلن وحظه هذا اذا ماكانت خلاص راحت لاقاربهم

والله انه شي يقهر شباب يروح عمرهم في الجري ورا هالوظايف اللي اصلا الواحد يدخل وهو حاط بباله مهو

متوظف والتخصص مو مناسب وشروطهم تعجيزية وبعد هذا كله وظيفة واحده



الله يرزقنا من واسع فضله ويغنينا به عمن سواه

الله لايوفقهم اذا بيتعبون الشباب

والله حرااام
انا بطق مشوار من اخر الدنيا عشان هالاختبار وبعد كلامك اتحطمت بس ما عليه
عشان ما اكسر بخاطر ابوي وامي لاني يوم علمتهم بدخول الاختبار وقبولي سووولي فرح في القريه
كاني معرس لكن الله يعين ما ابي احطمهم وبجرب حظي عسى الله يرزقني بوظيفه
مشكوووووووووور خيو ...