السلام عليكم ورحمة الله وبركاته

الله يصبحك بالخير ياللي تقرا الماضوع في الصباح ويمسيك بالخير ان كان قريته بعد غروب الشفق الأحمر.....

ياجماعة الربع قسم بالله اني لا شفت فاكهة الافوكادو أن قلبي يخفق يخفق يخفق الى مالا نهاية...ما ادري وش اسوي بها ؟؟

يالربع علموني هالفاكهة وشهي من لحية ؟ هي فاكهة والا خضرة والا يضحكون علي اللي في حلقة الخضار؟؟

ماعرفت من وين تنوكل ولا كيف ومتى وليش ؟؟ اول مرة شريتها في تاريخ 23نوفمبر 2009 واللي باعها لي قالي ترى لسه ما استوت قلت انت حرامي صغير (سمول) تبيعني شي لسه ما استوى لكن الله يجزاك خير....ليت كل الحرامية مثلك ...ليت الحرامي اللي باعني الجمس قالي المكينة مخبطة....

وللعلم الى الان موجودة في الثلاجة وما استوت!!!!!من تاريخ الشراء الى لحظات كتابة هذه السطور..!!!

مرة اخذت وحدة وعطيتها جارنا قلت له هذي هدية من الديرة جانا ولد بن عايض وجاب عسل وافوكادو (ديرتنا مافيها الا حطب وثلاثة ارباعها نصابين والعسل نصه ميرندا) انا كنت ابيه ياكلها قدامي اخذها وقال جزاك الله (حنيت عليه احسبه شحات) ودخل البيت ...

بقيت معي ثلاث حبات....عطيت اخوي وحدة وسحب علي ماقال لي وشلون تنوكل....والثانية اخذتها وقشرتها وماطلعت بنتيجة....والثالثة باقي موجودة للحين مدري وش اسوي بها؟؟

قبل كم يوم كنت معزوم عند واحدن من الربع وبعد العشا جاب صحب فيه فاكهة كثيرة قالي لي خويي يا بو فجر مد يدك وخذ لك حبة افوكادو انا حسيت ان خويي هذا عميل في الموساد الاسرائيلي من يوم ألح علي بالافوكادو ...وانا قمت ابكحلها عميتها قلت له شكرا انا صايم...!!!

وشوي يجني ورع يناقز ومعه افوكادو يقول لي ياعم كيف اكلها قلت له عمى يعميك مالقيت الا انا تسألني هالسؤال والمجلس فيه 16 رجال شروه من يقرا ومن خيرة شباب القبيلة وفيهم طالب العلم وفيهم البروفيسور وفيهم سواق السطحة رح وأسألهم...


المهم يالربع تروني عجزت واللي بيده الحل لا يبخل علانا

فمان الله ....

المعذب ابو فجر (اخص يالداشر)