عنوان تحسونه بالخيال ..

ولو فهمتوا الموضوع .. بيصير الخيال حقيقه ..!

ركزوا معي شوي .. وانشاء الكل بيفهم ..

---
مثال تقريبي :

زي ما انتوا عارفين دايما : في الحارات والجيران والجماعات والاقارب . تصير عمليه تسمى ( جمعيه) وهي انه كل واحد يدفع مبلغ معين كل فتره بحسب عدد الاشخاص وتعطى واحد شهريا ..

يعني مثلا عشرين شخص مشاركين في الجمعيه من 500 ريال شهريا

يدفع كل شخص منهم 500 ريال شهريا

لو قلنا 500×20 شخص = 10,000 ريال سعودي شهريا ..

طبعا شهريا تروح لواحد منهم .. يعني عشرين شهر وكل واحد منهم ماخذ 10.000 ريال

انتم عارفين الفكره بس هاذا الشرح للي موعارفها ..

--

فكرتنا في الدعم :


نسوي جمعيه بين اعضاء المنتدى .. بتقولون كييييييف؟؟ واحنا ما نعرف بعضنا ولا قد تواصلنا؟؟


انا بقولكم كيف ..

انا حاولت اطور فكره الجمعيه ونخليها بين اعضاء منتدانا ويصير كل واحد يدعم الثاني وكل واحد يصير له راس مال ويقدر يسوي مشروعه ..

حلوه الفكره ؟؟

نجي لطريقه التنفيذ:

اول خطوه نقسم الاعضاء اللي بيشاركون على حسب مناطقهم بالمملكه .. لاجل كل واحد يكون قريب من الثاني وعشان الواحد يضمن فلوسه يصير فيه مسؤل يجتمع بالاعضاء ويوقعون بارقام هوياتهم وارقام حساباتم - والنساء بارقام ازواجهم او محارمهم او صوره من كرت العائله او بطاقه الاحوال ..

ثاني خطوه نقسم اصحاب رأس المال .. اللي مثلا يحتاج راس مال الى 30 الف بتكون قطهم عاليه شوي اما اللي حدود 15 الف بيكونون اصحاب القطه البسيطه ..

ثالث خطوه ممكن نسوي اكثر من جمعيه في المنطقه الوحده على اساس يكون الموعد الزمني قليل حدود سنه وشوي بالكثير ..

--


طريقه تقسيم الجمعيه :

من اسباب الاحباط ان الواحد يقول يوووه تجيني بعد 9 شهور ما اقدر انتظر ولا بعد 12 شهر .. فكرت في هالمسأله ووجدت لها حل .

مثلا لو كل واحد في الجمعيه قطته 500 ريال وعندنا عشرين شخص مشارك يعني عشرين شهر ..

بعد تفكير عميق وحسبه لقيت لها طريقه اسرع في التقسيم ..

بعطيكم مثال في بالاسماء :

المشاركين : ( خالد - محمد -عبدالله - عبدالعزيز - احمد -مشاري - ناصر - سلطان ..الخ 20 شخص )

كل واحد دفع 500 ريال وعشرين شخص = 10.000 ريال

في الشهر الواحد مثلا نعطي خالد ومحمد كل واحد 5000 والشهر اللي بعده زيها يصير خلال شهرين كل واحد استفاد ما انتظر وعلى هالحال .. يعني كل شهر تجي اثنين دفعه والشهر الثاني تكمل .. يصير تفيد العضو اكثر ..

--


اخيرا وليس اخرا .. بعض النصائح ودي انبه عليها :

1- اذا عجبتكم الفكره نطورها وماله داعي التجريح انا ماني عالم ومجرد نقاش وابي الفايده لي ولكم
2-اذا تمت الفكره فلتكون بيننا الاخوه والحب اللي وصانا عليه الرسول اللي مثلا مو محتاج هالفتره او مافي باله شئ يخلي غيره ياخذ الهشر هاذا وهو اللي بعده ..
3- مافي شئ مستحيل كلنا عيال ناس وابناء ناس ونخاف من ربنا .. لاتقول ماني واثق في الاعضاء احنا كلنا هدفنا واضح وندور الرزق الحلال .. ولو نبي غير كذا كان بعنا مخدرات وووووو طرق الحرام كثيره ..
4- الدنيا جنه ونار وحساب وعقاب .. لايحسب احدكم انه اذا اخذ مبلغ سرقه او نصب على احد انه بيفلت من العقاب كل شئ مسجل ومكتوب ..





هاذا اللي عندي وانترظ مشاركاتكم وتراني تعبت عالموضوع ولا اوصيكم بالدعاء

ربي يوفقك

والفكرة حلوة منها حتى الي ماعنده مشروع في راسه تفك أزمة من أزماته

ودمت بألف خير أخي الكريم على طرحك

اولا الله يجزاك خير على تعبك

ثانيا الموضوع هذا غير مجدي البته وفيه مشاكل كثيره جدا بين جيران واحيان اخوان واحيان عائله وحده مابالك بمنتدى

والله العظيم اني اعرف شخص عندنا ترى النور في وجه ذاك الرجل..لكن الله المستعان الفلوس تغير النفوس كما قيل....لهف مليون ريال وحط رجله...علما والله انه امام مسجد واعرفه ويعرفه غيري..ولن يخطر على بالنا لحظه انه يفعل كذا..

طبعا مسكوه ...كانت عندي مراجعه قبل فتره للمحكمه..والله اني رايته امام باب مكتب احد القضاه وارجله مكبله بالحديد..

اقول
الله يوفقك ويرزقك

لو انت امين غيرك الشيطان يلعب فيه ما انصح فيها ممكن على الاهل !!

سبحان الله

انواع التحطيم ..

الفكرة مكررة


بالتوفيق

اخوي طيب تضمن كل الاشخاص

يعني واحد اخذ الجمعيه اول واحد وسحب

وش بيصير ؟؟؟

هذي ماتنفع مره قل يتشاركون في مشروع يمكن رغم الصعوبات

بس كلام شبه مستحيل اذا مافيه ضمانات

واسال مجرب . والله يجي الغدر من ناس ماتتوقعهم

بالتوفيق انشاء الله وودي لو تتطلع على هذا الموضوع علي هذا الرابط

https://www.btalah.com/t163388.html

وانشاء الفكره تنفعك

بالتوفيق للجميع