تسمم غذائي +قصة التسمم +علاقة المنتدى بالتسمم + دعواتكم بالشفاء

رمش العيون · #1 (**permalink**) 11-03-2010, 08:17 PM

السلام عليكم

مساكم الله بالخير ,,

اليوم أنا أصبت بتسمم غذائي والسبب أحد أعضاء المنتدى ,

إليكم القصة ..

طلب مني أحد الاعضاء رقم الجوال برسالة خاصة وقال الامر ضروري ,, قالي أنا عندي رأس مال وأبي أفتح مطعم , وأنا عرفت من المنتدى أنه أنت عندك مشروع مطعم شغال عليه , لذلك إذا تقدر تساعدني , قلت أبشر ولا يهمك ما طلبت شيء بس وش نشاط المطعم , قال أنت بالرياض قلت لا أنا من أهل الشمال قال تجي للرياض أنت قلت أيه دايم المهم قال إذا جيت أمانه دق علي , أتصلت عليه أمس , والرجال قال الليله بعزمك على عشاء في مطعم خيالي ودي أسوي زي هالمطعم أحس إنه يمشي وطبخهم نظيف , قلت أوك ولا يهمك

الرجال دعس للبطحاء ,, والله أوجعني قلبي يوم راح للبطحاء بس أستحيت منه , وقلت خلنا نشوف هالمطعم الي يقول , دخلنا مطعم رز برياني حق هنود الي كله بهارات وفلفل ,, قلت يا سلام عز الله كملت , قالي تبي لحم ولا دجاج , قلت ما شاء الله عنده لحم ودجاج ,, خلنا دجاج , ما أضمن اللحم ,

جاب الهندي الطلب , وطبعآ الطلب يبيلك دليل إرشادي علشان تاكل , خبز ورز و يدام فيه سكر و شيء أحمر مدري وشو وزبادي فيه طعم خيار بس ما أشوف خيار , وسبموسه ما أدري وش تبي هالسمبوسه مع الرز ,

خويي ما شاء الله عليه الشهيه مفتوحه , قام ياكل وأنا قعدت فيها , قلت خلني أركز على الرز بس وقمت آكل من الجوع ولا الآكل الله يحفظ النعمه ما أدري وشلون مسوينه ,,

المهم طلعنا من المطعم , وركبنا السيارة وقال بالله وش رايك الحين بوريك الموقع الي بحط فيه المطعم , قلت تبي رأيي قال وش الرأي ,, قلت ذوقك خايس مع كل الإحترام والتقدير .. قال أفا ليش , قلت ياخي تبي تسوي مطعم شف ذوق الغالبية من الناس . قال أنا أبي شيء مميز المهم حوار طويل يالله أقتنع ,, رجعت للشقة حسيت بدوخه ووجع بالبطن رحت لمستوصف أهلي قالوا هذي أعراض تسمم ,وحاس باللوز ملتهبه من هالفلفل ,, لذلك هالعضو يا أنه يجي ويرد على الموضوع يا أني أبي أفضحه هو ومطعمه

والحمد لله على كل حال ,,