السلام عليكم
اخواني حبيت اسئل عن مستشفى الحرس الوطني

كيف المقابله وطيب لو الواحد مر الحمدلله متى يدقون عليه عشان التوقيع ؟؟

والله ما عندي علم عن مستشفى الحرس
بس ما حبيت ادخل و ما ارد وان شاء الله الاخوان ما يقصرون
و بالتوفيق ان شاء الله

المقابله في مستشفى الحرس وفي كل الأمكان تقريباً نفس الشي وهذا من خلال تجربه

يعني عملت مقابلات في أكثر من مكان سواء بنوك او مستشفيات أو شركات

تقريباً يركزون على اللغة هذي أولاً
بيقولون تكلم عن نفسك بالانجليزي .. وبيسألونك عن تخصصك ودراستك بالإنجليزي
نصيحتي لك اذا كانت لغته نص ونص أنك تكتب كل شي عن نفسك بالعربي يعني اسمك وعمرك ودراستك وهواياتك وليه تبغى تتوظف عندهم وهالاشياء
وتترجمه وتحفظ هالترجمه صم وإذا قال تكلم عن نفسك عاد لا تقصر قول كل شي


ثانياَ بيركزون على طريقتك في الكلام وأسلوبك شلون وجلستك ويمكن يسألونك أسأله ما تتوقعها زي مثلاً في واحد من مقابلاتي اللي عملتها سألني المسئول عن التوظيف عن أسم الموظفه اللي كلمتني .. مع انه عارف من هي بس يبغى يشوف أنا ذهينه أو لا
وسألوني مره ليه ما انقبلتي في الأماكن اللي قدمتي لها .. وتوهقت وقلت لهم لانهم يطلبون خبرات وشهادات علياء
ومره تعمدو يتناقشون قدامي مسئول التوظيف ومعه وحده من الموظفات عن الرواتب وعمل الأجانب وسألوني عن رأيي عاد أنا تحمست وجبت العيد
يعني بيحاولون يستفزونك شوي

بعدين يبغون يشوفون هل انت تتحمل ضغوط العمل او لا
مره في وحده من الشركات لما وصلت لنفس المبنى حقهم ودقيت عليهم على اساس اسألهم عن موقعهم بالضبط قال لي الموظف آسفين تم تأجيل مقابلتك ليوم ثاني
وهذا الشي لاحظته في كثيررر من مقابلاتي أنهم يلغونها لما اكون قريبه منهم أوأكون عندهم
وعرفت ان القصد أنهم يحاولون يستفزونك ويشوفون ردة فعلك وهل انت شخص تتحمل الضغوط أو متسرع وعلى طول تعصب وتتنرفز

ثالثاً راح يسألونك أسأله عن تخصصك أو الدورات والخبرات اللي معك .. يعني بيحط السي في قدامه وبيسألك أسأله من خلال السي في

رابعاً وفي مستشفى الحرس الوطني بالذات ومن تجربه سابقه لي عندهم .. راح يحاولون يكرهونك في الوظيفه ..
زي مثلاً لما رحت لهم كانت الوظيفه اللي انا مقدمه عليها (مساعده مرضى)
عملت معي المقابله وحده بريطانيه وفلبينيه وبوجود مسئوله التوظيف السعوديه
قالو لي ممكن تنظفين المكاتب وتمسحين الأرض ويمكن تغسلين المريض اذا توسخ و و و
قلت اوكي ما فيه مشكله ( هذي توصيات مسئوله التوظيف قالت اذا قالو لك شي قولي ما عندي مانع )
قالو لي رئيسك راح يكون رجال ومعك بنفس القسم خمس رجال فلبيني وصومالي وسعوديين
قلت ما فيه مانع
قالو لي لبسك راح يكون بنطلون وإجباري .. يعني يمكن توصل للفصل من العمل لو ما ألتزمت فيه او لو حاولت ألبس بالطو طويل عليه
عاد هنا حاولت أني اتناقش معهم وبعدين لما شفتهم جادات بكلامهم رفضت وقلت لا مو ممكن

لما جيت أطلع وألبس النقاب قالو لي بتلبسين هذا بالشغل قلت ايه
قالو ما تتخلين عنه قلت لا مستحيل ولا اعرف وش كان قصدهم من هذا السؤال مع انه مسئوله التوظيف السعوديه كانت منقبه


ممممممممممم

تقريباً هذي الأشياء اللي تحضرني الآن

أيه قبل أنسى خليك ريلاكس وانت تعمل المقابله ... ولا تجاوب بسرعه .. يعني لو سألوك سؤال اجلس ثواني بعدين جاوب ويكون جوابك على قد السؤال يعني لا تكثر بالكلام
وبعد إذا جيت تطلع .. حاول انك تسلم على المسئول وقول له فرصه سعيده أني قابلك ومن هالكلام ^_^

وبالتوفيق ان شاء الله

الف شكر على المرور اه القهر
بس سؤال هل هناك احد توظف بالحرس الوظني بالمستشفى بواسطه؟ او الى يجتاز كل شئ ومعه الله قبل كل شئ ثم الخبرات ينجح؟

صراحة ما اعرف عنهم حاجة ما اقول إلا الله يوفقك يا رب

كل المقابلات لها شي أساسي اللى هو ..

طريقة كلامك ... وأسلوبك في التعبير ... وسلامة مخارج الحروف ... والهدوء
وحسن المظهر .

وعاد البقية تعتمد على تخصصـك

أهم شي الهدوء . والدقة في الجواب

الله يجبلك الخير ياسيدي

مشكورين

موفقين يارب