مساحه حره (( جمال الذائقه )) . . !

راعي العليا20 · #**161** (**permalink**) 29-04-2010, 05:17 AM

،؛، عقبال مية عام ،؛،

عقبال ياماخذ فـؤادي ميـة عـام ..
.. ضيعتني منك وانـا مـا اهتديتـك

لا ..ما نسيتك كيف بانساك مـا دام ..
.. ذكرى الفراق تهزني لـو نسيتـك

حبك قدر وانا على ديـن الاسـلام ..
.. مكتوب في وجه الجبين ورضيتـك

لك في الضمير الود والحشمه اتوام ..
.. ولي في ضميرك مثل ما انا بغيتـك

ولك منزلٍ في نايف القلـب وخيـام ..
.. وذود الغـلا ترعـاه ولا شكيـتـك

يفطر عليك القلب وان فارقك صـام ..
.. والله لونك شـوك سـدره كليتـك

القلب طيرٍ لادعـي للهـوى حـام ..
.. والا انت وكره من كثـر ماهويتـك

كن العيون من النظر عقبـك ايتـام ..
.. وكني ماريت الا انت من يوم ريتك

وكنك معي وانا فقدتك مـن اعـوام ..
.. مـع الخيـال القـاك كنـي لقيتـك

من صعب وصلك ما تهنيتك احـلام ..
.. وان جابتك فزيت شـوق ومحيتـك

يعني وصالك صعب واهدافي اوهـام ..
.. يعنـي زرعتـك للقـدر ماجنيتـك

صبرك يقولون العرب كـل الايـام ..
.. يوم عليـك ويـوم لاجـاك جيتـك

ويا قلب ياللي ورثك اجـروح وآلام ..
.. بليتنـي ماهـو بانـا اللـي بليتـك

ولعتني من عادني في الهوى خـام ..
.. واسرفت بي وانا خطامـك عطيتـك

طعتك وزبدة طاعتـك هـم وهيـام ..
.. مالله كتب لي واستخرت وعصيتـك

لوللقلـوب اسـواق بايـع وسـوام ..
.. لاابدلـك وان جيتنـي ماشريـتـك

والا انت ياللي جيش عينيك مقـدام ..
.. لا اقنعت منـك والرجـا مارجيتـك

كني سجين بين..افـراج ..واعـدام ..
.. وكنك سجن وانـا بنفسـي بنيتـك

تنبيك عن حالي محاصيـل الالهـام ..
.. وتخبرك نظراتـي نهـار التقيتـك

عقب الوصال اللي على عين من لام ..
.. قدهو يكفيني عن الوصـل صيتـك

وقدني الى مريت بالشـارع العـام ..
.. لديت من ما في الضميـر ودعيتـك

ادري ان صوتي ماقطع عشرة اقدام ..
.. وادري بي اعود الى مـن نصيتـك

ياشينهـا يامحنـيٍ راس الابـهـام ..
.. ماقدر على شوفك وانا عنـد بيتـك

الاعمار ما تضمن وانا اخاف الاحكام ..
.. ارثيك خـاف اودعـك مـا رثيتـك

الشاعر محمد بن حمد بن فطيس

راعي العليا20 · #**162** (**permalink**) 29-04-2010, 05:19 AM

يمه اذنبت ونزحت من العشيره
وان تمنو توبتي مانيب تايب

مابي لدنيا الغنادير اي سيره
طايح من عام الاول في مصايب

يمه اللي حب له طفله صغيره
ويش يسوي لاغدا فيها طلايب

طفلة ماكانت بحبي جديره
بس كانت غير عن كل الحبايب

كنت اسميها العنود المستذيره
ليت اهلها العام سموها عجايب

كنت اجيها مثل الامطار الغزيره
كنت اضيع بجوها مثل الهبايب

وادعي الله هي متى تصبح كبيره
تفهم اشلون المكان يصير ذايب

ان تغنت تصبح الطرقه قصيره
وان تغلت تصبح جروحي عطايب

صنتها مثل البحر لابعد جزيره
ماتركت علومها لاهل الركايب

ديرة ماهي بها ماهيب ديره
لو ثراها عشب واعلاها سحايب

يمه اتحبين طايلة الضفيره
اه والله ياعليها اشقر ذوايب

قالت ان جا الراس شايب فيه خيره
قلت يابنت الحلال الراس شايب

قالت الا الحب وشهو وش مصيره
قلت انا استاهل وانا كل السبايب

ماجزا اللي حب له طفله صغيره
غير قبر و ضحكها فوقه نصايب

الشاعر ناصر القحطاني

راعي العليا20 · #**163** (**permalink**) 29-04-2010, 05:31 AM

الذهب

ياكثر ما رافقت خلان واحباب
ويا كثر ما في شدتي هملوني
على كثر ماأعدهم ستر وحجاب
على كثر مااحتجتهم واتركوني
من صارت الخوه ثمن حفنة تراب
نفس الوجيه اللي نصوني..نسوني
من غيرذكرعروق,وفروق،وأنساب
كانوا ثلاثة..والثلاثةجفوني
علمتهم وشلون الأهداف تنصاب
ولماسواعدهم قوت..صوبوني
عشاني أصغرهم عمر صارواأحزاب
عشاني اصدقهم قصيداظلموني
اللي نجاح اسمي زرع فيهم أنياب
حتى النصيحة مابغوا ينصحوني
دام العطايا عندهم دين وأتعاب
والله لوأطلب ذنبهم ماعطوني
طالب نصيحة، كني مطالب أرقاب
وهي نصيحة؟!كيف لو زوجوني؟
كنت أكتب لنفسي مشاريه وعتاب
ولاادري إن اللي قروني..قروني
تضاربت من دوني عقول وألباب
واجد بغواغيري..وواجد بغونى
أقفل هدب... تسهرعلى شعري أهداب
كني حبست إرقادهم في جفوني
لو شفتهم واحد..يشوفوني اسراب
من وين مالدوا نظرهم لقوني
أثري وجودي بينهم محرق أعصاب
ومزعل بعضهم من بعض لو طروني
يا كبري بعيني وأناتوني شاب
واهم كتاب الشعر حاربوني
حتى ولو يهوي على نجمي شهاب
يكفيني إن إسمي كبير بعيوني
قدقال ابوي: ان هبتهم قول: ماهاب
لو يقدرونك قول: ماتقدروني
ومادام قبري محتضن راس مرقاب
على كثر ماتقدرون ادفنوني
لو ماني بذيب إنهشت عظمي ذياب
لو ماقدرت اثبت وجودي لغوني
لو ما سكنت وجيههم مت بغياب
لو ماعرفت أمحي ورقهم محوني
أصبحت الأصعب لأنهم كانوااصعاب
جننتهم مثل ما جننوني
ماجيت أبدبل كبدهم شعر وخطاب
لين أدبلوا كبدالذي خلفوني
يا ويل وجهي كن للدمع مخلاب
ماجف ماه ولا استحى من طعوني
كل ما طرالي منظرمريب وأرتاب
كان الوحيداللي يحرك شجوني
قبلة صلاة،وذكر، وخشوع، وكتاب
وأمي على سجادة النور دوني
تدعي لي الله يفتح بوجهي أبواب
تتوسله بالشده يكون عوني
من كثر ماخفاقهابالدعاء ذاب
صارت تحس إن زملاي اكرهوني
بشرتها: يمه معي ربع وأصحاب
ماني لحالي واجداللي يبوني
من يوم ماحاز قلمي كل الالقاب
قلطتهم في دفتري واحفظوني
الله وهبنيهم بني عم وأجناب
من يوم جيت اعجبتهم واعجبوني
واعجابهم فيني ماهو بأيه اعجاب
باسلوبي، بشرحي،بطرحي،بلوني
لوقلت عن نفسي(بشر)..صرت كذاب
لو قلتدمي من ذهب)صدقوني
لو بيدهم كان ازرعوا دربي أعشاب
لوبكيفهم يتشبهون اشبهوني
من كثر ما صاروا من طبوعي اقراب
حتى بلبسة شمغهم قلدوني
واجد دعوني واغلقوا دوني الباب
واكثار ناس أبكي لهم ما بكوني
لوطالوا لهدمي مناسيب وأطناب
كانواوغلاتك من زمان اهدموني
مدام حطوا فيني عيوب وأسباب
جنبت عنهم مثل ماجنبوني
أصلا لو إن بخوتي شي ينعاب
ذبحت نفسي قبل لايذبحوني
أنا يدي لو ماكست متني ثياب
نذرعلى لقطع يدي من متوني
موعيب أجي مدعو ولا أشوف ترحاب
العيب لوإني رجعت إن دعوني
مادمت اجي ولا يحسبون لى حساب
حرمت اروح اذا يبوني يجوني

لــلــشــاعـــر حـــــامـــــد زيــــــــــد

راعي العليا20 · #**164** (**permalink**) 29-04-2010, 05:39 AM

من قصائد رثاء الزوجات وأظنها للشاعر الكبير بن لعبون رحمه الله(منقول)

ياونتي منها ظلوعي حطاما = على عشيرٍ بالهـوى مـات مغبـون
شالوه من دار الحيا للعداما = ومن الحصى وتـراب قامـوا يكبـّــون
من عقب مالفوه بقماش خاما = قاموا على بيض النصايب ينصـّـــون
مات الحبيب ولا لحق له مراما = وبالله ياللي تدفنونه علـى الهـون
حطوا نفق له عن سواد الظلاما = ودي ازوره مثل ناس يـزورون
و أعايده نهار عيد الصيامـا = وأقابلـه وأرضـي عيـون يحنـون
عسي اليا سلمت رد السلاما = وأهل الهـوى والحـب لازم يـردون
إحساسهم يصدق بليا كلامـا = وغرامهـم يبقـى ولوهـم يموتـون
ابي اتطوى عند قبره اعواما = وش عاد لو قال الملاصار مجنـون
شبيه خلي فوق كف النشاما = حر مـن اللـي بالمقانيـص يهـدون
جنسه قليل وغير خلي حراما = لا علهـم عقـب الحبيـب يولـون
من أول أكتم حزين الهياما = واليوم بـاح السـد ياللـي تعذلـون
ويلاه كيف الدود يمحى العظاما = ياكل جسد مضنون عيني وترضون
ارموا بجسمي مع وفي الغراما = هذا العزا ياللـي بموتـه تعـزون
يا راحل لدار الرضى والكراما = قل له عشاشيقك من البعد يبكـون
قل له عيون صويحبك ماتناما = يسهر وخلـق الله بقربـه ينامـون
اما حياة في هنـا والتئامـا = والا ممـات اثنيـن بالعهـد يوفـون
هيض عذابي ناحيات الحماما = ظنـي لهـم خـل بفقـده ينوحـون
حياتنا غطى عليها الغماما = واجد اليا عشنـا مـع اللـي يعيشـون
لا وحسافه غاب بدر التماما = تحت التراب احبيــّــب الـروح مدفـون

راعي العليا20 · #**165** (**permalink**) 29-04-2010, 05:42 AM

وصية الشاعر فيصل الرياحي

يابدر خـذ وصيـه واعتبرهـا وديعـه

الله اعلم متـى يابـوك يـوم الوداعـي
يجري العمر والايـام تجـري سريعـه
سرها قبل رمـي اسهومهـا مايذاعـي
يابـدر نحمـد الله ماعلينـا هزيـعـه
رغم بعض العواصف رافعين الشراعي
نطلـب الله يوفقنـا دروب الشريـعـه
ما ندور على دروب الغوى والضياعي
ونطلب الله يجنبنـا الامـور الشنيعـه
لاتعـاوى علينـا ضاريـات السباعـي
يابدر ماجنيتـك مـن بيـوت الدنيعـه
النفوس الضعيفـه والقلـوب الوجاعـي
يابدر مركزك بين الحصـون المنيعـه
اخذ منا ومن جـدك حميـد المساعـي
يابدر من يحـاول هزعتـك لاتطيعـه
الجبال الشوامـخ ترفـض الانهزاعـي
ومن قطع رفقتك قلـه يامـال القطيعـه
يارفيق المذلـه مـال رفقتـك داعـي
وكان بعض الرفاقه جاك منهم وجيعـه
قد يكون الفراق افضل من الاجتماعـي
لاترافـق خبيثيـن النبـا والطبيـعـه
سقط ناس سوالفهم تجيـب الصداعـي
يلبسون اقنعه فوق الوجيـه الوضيعـه
وعن وجيه الردا لا زام يطيح القناعـي
واجد الطيبيـن ولا تضيـق الوسيعـه
دور اهل الوفا واهل الصدور الوساعي
والصديق الصدوق المحتـرم لا تبيعـه
احتفض به وخلـك للمواثيـق راعـي
واحذر الضحكه الصفرا من اهل الخديعه
حلل افكارهم في مختبـر فكـر واعـي
بعضهم يتخذ من كـل حاجـه ذريعـه
يكرهـون البنـا ويفضلـون التداعـي
ولاتضلي خلاف النـاس مثـل التبيعـه
كلمة النعم جاهـد وانتزعهـا انتزاعـي
لاتاخـر جـوادك خلـهـا فالطليـعـه
خذ مكانك مع اهل المجـد والاطلاعـي
المذمه علـى الانـذال ماهـي بديعـه
والمدايح يحصلهـا طويـل الذراعـي
والتزم فـي حبـال الله بـم تستطيعـه
من تمسك بدينه جا بو جهـه شعاعـي
والصبر له عواقـب طيبـه لاتضيعـه
قدر الصبر والله معك وامـره مطاعـي
كم صبرنا على بعض الامور الفضيعـه
نعتبرها مـن التافـه وسقـط المتاعـي
وكم لي اصارع الدنيا بنفس(ن) شجيعـه
واجتهادي يحقق لي نتيجـة اصراعـي
اتفاول بخيـر ودم وجهـي مـا ابيعـه
كـل شـي يبـاع الا الحيـا مايباعـي
اعشق العـز واحـب الحيـاه الرفيعـه
واكره الارتخايه وارغـب الارتفاعـي
واتواضع لسمحيـن الوجيـه النصيعـه
واترفع عن اهل الزيف واهل الخداعـي
يابـدر لاتلفـت للعـقـول الخليـعـه
قدر الراس قـدره لاتحسـب الكراعـي
كم سمحنا وسامحنـا خطـات الخميعـه
حشمـة الطيبيـن وقصـرة للنزاعـي
ما عرضنا لحمنـا للوحـوش المجيعـه
لو شربنا من الحنضل وسـم الافاعـي
ولن وردنا خصومة حـق والا نزبعـه
عضمنا ما يلين نكيل صاعن بصاعـي

رحمك الله يا ابا بدر اااامين

راعي العليا20 · #**166** (**permalink**) 29-04-2010, 05:53 AM

الشاعر محمد البلاهدي(شاعر القوات المسلحه)

كتب هذه القصيده عام 1416 وللمعلوميه هو مدرب في مدرسة سلاح الاشاره في الطايف

والكثير من الناس لايعرفون انه هو صاحب القصيده التي انتشرت بشكل واسع

غابت ثمان سنين حـلّ وترحـال
غابـت ثمـان ٍ كلهـا مدلهـمّـة

سألت عنها سنين وشهـور وليـال
ولافيه قطر غيـر وجهـت يمّـه

وعقب الثمان اللي تعبها برى الحال
جاب الزمـان الكارثـة والمطمّـة

جاني ولدها مبتسم بيـن الأطفـال
ومن بسمته ذكرت أنا بسمـة أمّـه

شفته وصاحت داخلي كل الآمـال
بصوت ٍ عجزت بكتم الأنفاس ألمّه

ركضت له ودمعي على الخد همّال
ومن كثر شوقي قمت بالحيل أضمّه

لحظة حضنته والطفل في يدي مال
شميت ريحتها على اطراف كمـه

وأستلهمت نفسي مقادير الأهـوال
تمّ الضّيـاع وأكّـدت لـي متمّـه

واليوم بنت الناس في بيت رجّـال
وحب على غير الشرف لي مذمّـه

لازم أعود وأشتكي لكـل الأجيـال
بنفـس حزينـة كائبـه مستهمّـه

بأرجع غريب ٍسكّته شوك ورمـال
يموت يحيـى يندفـن مـا يهمّـه

راعي العليا20 · #**167** (**permalink**) 29-04-2010, 08:13 AM

ابيات غزليه رائعه وللاسف لا اعرف قائلها

كانـت الدنيـا ضـلام=
ويوم اقبلت دربي ضوى
وشلون يوفيهـا الكـلام=
عذب القصيد وما حـوى
لو تجتمـع شعـار يـام=
وهذيل وعتيبـه سـوى
مايوصفون احلى الانـام=
الوصف من دونـه ذوى
فيها من اوصاف النعـام=
مايذكرونـه فـالـروى
وفي عينها من كل سـام=
وفي ثغرها كل الجـوى
ولو شافها عنتر وهـام=
ياعبلتـه مالـك لـوى
لبيـه يامعنـى الهيـام=
عـداد مالقلـب انكـوى
لبيه عـامٍ عقـب عـام=
من الوصال الى النـوى
بلغــو اهـل الحسـام=
اهل العزيمـه والقـوى
قولوا لهم ذبحـه حـرام=
لو هو على ذبحي نـوى
ان حن قام الحـظ قـام=
وأزهر ربيعك يالهـوى
وإن جار مالحقته مـلام=
وياصبر موسى في طوى

راعي العليا20 · #**168** (**permalink**) 29-04-2010, 08:17 AM

الان جاء دور الابيات القصيره

7
7
7

راعي العليا20 · #**169** (**permalink**) 29-04-2010, 08:18 AM

سفر .. سفر.. لليل.. للجرح القديم

للذكريات وللسهر..

للبرد.. للثلج المطر..

خذني إذا ودك تروح

محتاج بالحيل لسفر..

الدمعة بعيوني جواز...

وجروحي تأشيرة سفر!!

راعي العليا20 · #**170** (**permalink**) 29-04-2010, 08:20 AM

فــي غيبـتـك قلـبـي فـقـد مــن يسـلـيـه

مــن كـثـر حـبـك حـالـف مــا يخـونـك

فــي غيبـتـك قـلـبـي تـحـطـم امـانـيـة

كـرهـت أنــا العـالـم و حبـيـت كـونــك

فــي داخـلـي إحـسـاس اجـهـل معـانـيـه

بـس الأكـيـد ان المشـاعـر يبـونـك