السلام عليكم ورحمة الله وبركاته

اليوم سويت المقابلة الشخصية وبعطيكم الي صار بالتفصييل

المقابلة الشخصية الاولى :

السلام عليكم ، وعليكم السلام ،
العسكري : انت شرعي ولا علمي ، انا : شرعي ، العسكري : ماهي اركان الاحسان ؟
انا : والله ياطويل العمر اعرف اركان الايمان واركان الاسلام اركان الاحسان اعرفها بس ما اذكرها
العسكري : طيب عطني اركان الايمان وكم عددها ،
انا : عددها سته وهي ان تؤمن بالله وملائكته وكتبه ورسله وباليوم الاخر وبالقدر خيره وشره
العسكري : طيب وش هي اركان الاسلام ، انا : شهادة الا اله الا الله وان محمداً رسول الله واقامة الصلاة وايتاء الزكاة وصوم رمضان والحج الى بيت الله الحرام لمن استطاع اليه سبيلآ العسكري : طيب حاول تتذكر انا متاكد انك تعرف اركان الاحسان ، انا : والله حاولت بس انت قرب لي
العسكري هو ركن واحد وهو ان تعبد الله كانك تراه .. كمل ؟
انا : ان تعبد الله كانك تراه فـان لم تكن تراه فانه يراك ،
العسكري : أحسنت < طبعاً هو مطوع
العسكري : ماحكم قراءة الفاتحة في الصلاة ؟
انا : واجبة قال لا ماهي واجبه ، ابغى اقول ركن بس راحت عن بالي نهائياً الكلمة واحاول اتذكرها بس للاسف
العسكري : طيب لو حصل ان واحد صلى ونسى مايقرا الفاتحه وش يسوي
انا : كيف ينسى ؟ يعني معقول فيه احد ينسى الفاتحه في الصلاه كلها
العسكري : لو قلنا انه نساها في ركعه وحده بس وش الحكم ؟
انا : يعيد الصلاه ، العسكري : ليششششششششششش يعيد الصلاة ؟؟؟
انا : ولله الحمد نقزت المعلومه الى براسي بشكل مفاجئ وقلت لانها ركن يعني مثلها مثل الوضوء مايجي صلاة من غير وضوء قال احسنت والابتسامه تشق وجهه ووجهي في نفس الوقت
العسكري : من امير الرياض ؟ انا : الامير سلمان بن عبدالعزيز
العسكري : خلاص الله يستر عليك بالتوفيق

المقابلة الشخصية الثانية :

طبعاً صفطت انا وناس معي من الساعه 11 ونص الى قبل اذان العصر بـ شوي بعدين دخلنا على الضابط رتبته رائد

الرائد : قول النشيد الوطني ؟
انا : سارعي للمجد والعلياء مجدي لخالق السماء وارفعي الخفاق الاخضر يحمل النور المسطر رددي الله اكبر ياموطني موطني قد عشت فخر المسلمين
بعدها كلجت
قال الي اعرفه ان نهاية النشيد الوطني عاش الملك للعلم والوطن
قلت طيب بـ اعيده قال لا الله يستر عليك خلاص قلت كيف قال راسب
لا شعورياً قلت سلامات عسى ماشر يعني بعد ما تلطعوني من 7 الصبح الى الحين تقولي راسب وانا جاي من ابها وتوي واصل ومتعب عمري عشان نسيت كلمتين تقولي رااسب؟
فتح على النموذج وحط عليه × قال خلاص اذا حفظت النشيد الوطني زيين قدم مره ثانيه

انا : طيب طيب < اطالع في وجهه زيـن عشان احفظه نآوي اصدمه اول مايطلع من المبنى

طلعت من عنده شوي اسمعه ينادي احمـــــــد تعال تعال وارجع له قلت هلا قعد يضحك شوي بعدين طلع النموذج ومسح الاكس وحط عليه صح وقال بس ابغى اشوف ردة فعلك يعني بتدعي علي وانت خارج ولا لا وترى كان اختبار نفسي نشوف كيف اعصابك تتحمل ولا لا قلت يعني خلاص الحين نجحت في المقابلة قال خلاص مبروك وان شاء الله نشوفك وانت بالبدله ، انا : طيب الله لا يهينك يعطيك الف عافيه < من غير نفس لانه مرتفع الضغط

وطلعت من عنده ويأذن العصر قالوا تعالوا في الدور الثالث صلوا بعدين تاخذون الدفتر رحنا صلينا وبعد الصلاه اعطوني الدفتر والخطاب للادله الجنائية قال وين تبغى تسوي البصمات قلت في ابها وحطه لي في ابها

اتمنى اكون وفقت في طرح مشواري لـ هذا اليوووم وان شاء الله يستفيدون الي باقي ماخلصوا المقابلة


بالتووووفيق للجميـع