06-04-2010, 02:49 PM
|
عضو متواصل
|
|
تاريخ التسجيل: Dec 2009
المشاركات: 76
معدل تقييم المستوى: 81
|
|
ما حصل معي بالامن العام
بسم الله الرحمن الرحيم \
الحمدلله والصلاة والسلام على رسول الله وعلى آله وصحبه أجمعين
هذي ثاني مشاركه لي بالمنتدى وبصراحه ما اعرف للمقدمات
ولكن عالعموم
توني جاي من مستشفى قوى الامن بمكه المكرمه وهذا الي حصل معي ...
اول شي جيت لهم تقريبا الساعه 7 وربع . حصلت الرقيب يدعي بالاسامي
دعا بأسمي رحت له اخذت الاستماره حقت الكشف وعليها كم سبه لاني متأخر . لكن طنج زي ما هو . يسب براحته عالعموم اخذت الاستماره ودخل للحوش في المستشفى . وصفونا ثلاث طوابير . وانتظرنا الى ان اكتمل العدد (تقريبا 200 نفر)
بعدها دخلنا للمستشفى وحطونا بالا ستراحه . ولطعه بعدها تقريبا ساعه . بعدها جا دكتور الاذن و الحنجره كشف علينا (الحمد لله الجميع سليمين )
وبعدها ردونا للاستراحه , وكالعاده يلطعونا ساعه كمان .
بعدها رحنا للطول والوزن . بصراحه سوو فينا نذاله . تخيلو الميزان ناقص 2 سانتي . المهم انا طولي 172 سم . طلع عندهم 170 سم .
بعدها تصف سرا عند غرفة الجراحه . تخش على الدكتور باكستاني الجنسيه , يقول لك نزل ملابسك كلها ( يفحص جسمك بالنظر دون اللمس)وهذا اهم شي.
المهم بعدها تروح تصف سرا عند غرفة الباطنيه .الدكتور مصري الجنسيه. يفحص التنفس وضغط الدم وغيرها..
بعدها ردونا للاستراحه ولطعه ساعه تقريبا . بعدها فحص النظر ... وعمى الالوان . بصراحه الكتور طيب مره ..يعني ما يدقق واجد .
بعدها ردونا للاستراحه, وكانت هناك اللطعه الكبرى ساعتين تقريبا . وكلها في انتظار سعادة الدكتور المصري/ابو طعميه . لفحص الاسنان
المهم جا بعد طول انتظار . وسوينا فحص الاسنان
المهم والاهم من هذا كله ان الدنيا سهـــــــــــــــالات
بصراحه اعجبني رقيب هناك زهراني (يا لب الزهارين) يطرد الواحد وبعدين يرجع يرده .ويقول لعاد تعيدها ’’’ كررها تقريبا عشرين مره .يطرد وبعدين يرجع يردك
الله يوفقه دنيا وآخره
هذا ما حصل معي وآسف على الاطاله ,, بس حبيت اكون واضح في كل شي
والسلام مسك الختام
|
العرض العادي
