بسم الله الرحمن الرحيم

السلام عليكم ورحمة الله وبركاته

هذي اول مشاركة لي .. اتمنى انكم تشاركوني اراءكم ومقترحاتكم

انا فاتح مشروع له اكثر من سنه ومعاي شريك .. ومن فتحت المشروع وهو فيه مشاكل ..

المشروع هو ( ورشة نجارة ) في الرياض


مايمدينا نطلع من مشكلة الا وجاية الثانية .. وكل المشاكل بالأساس مادية وتسويقيه .. اكثر من مره نمر بفترات مامعنا ريال واحد نقدر نمشي فيه الشغل .. طبعا انا ومعاي شريك ..

يعني ورشتنا مساحتها 650 متر مربع .. وايجارها 70 الف بالسنه
وطلبنا من مكتب العمل فيز عشان نجيب عمالة .. طلبنا 10 عطونا 4 فيز فقط ..

بالله وش يسوون 4 عمال بورشة نجارة متكاملة ؟

اضطرينا نجيب عمال من السوق ومنهم على الراتب ومنهم على القطعه ومنهم على اليوميه



وحنا موظفين في البنك .. يعني دوامنا من الساعه 9 الصباح لين 5 المغرب او اكثر احيان يعني غير متفرغين .. نطلع من الدوام ونروح للورشة .. يعني نهاية دوام اصلا .. بس نشوف وش انتجوا اليوم .. واذا في اجاراءات حكومية اضطر استأذن من دوامي عشان اخلصها

اضطرينا نطلع قروض ونطلع بطاقات فيزا واي وسيلة نقدر نسويها عشان يمشي المشروع سويناها ..


كان معانا واحد مصري .. ومعطينه نسبة وكان هو يروح يجيب شغل ويشغل الورشة .. لكن بعد ست شهور الرجال تغير فوق تحت .. وصار تعاملة مع الزباين جدا سوقي وخسرًنا كثير ..


طلعنا المصري من الورشة وصرنا حنا الي نشغلها ..

رحنا ندور مقاولين .. لقينا مؤسسة وقامت تعطينا مشاريع على قدنا .. اشتغلنا معهم بعدين فتحو هم ورشة ووقفوا من التعامل معنا ..

اضطرينا بعد كذا نوقف عمال عن الشغل وعطيناهم حقوقهم عشان نقلل مصاريف

الحين جا وقت الايجار .. ولاادري وش اسوي !

السوق مليان شغل .. والشغل بهالمجال مربح وجميل وانا احبه بصراحه مع كل هالصعوبات

وماني قادر اتخيل اني بقفل هالمشروع .. وافكر اني اتفرغ لهالمشروع لكن يجي ببالي اني كيف اتفرغ له وهو فيه كل هالمشاكل !

ابيكم تنقذوني بأفكاركم واراءكم .. والله تعبني التفكيييير مافي وسيله الا وسويتها .. ولا ادري وش اسوي


انتظركم

اخوي يعني المشكله بشكل عام هي ماديه بحته

اشوف انك تدور على شريك ثالث
يكون داعم لكم هذا في حاله ان المشكله ماديه ويفضل ان الشريك الثالث يكون شوي متفرغ في دوامه
وبالتوفيق ان شاء الله
وماتضيق الا تنفرج

بنظري انتم محتاجين شخص يمشي هذا المشروع وثقة وسبب كل المشاكل الي انتم فيها هي عدم تفرغ شخص يدير الورشة .

أخي نصيحتي هي البحث عن شخص ولو بنسبة معينه وله خبرة بالسوق وثقة والله يفتح لكم أبواب رزقه .

روح لمكتب العمل وخذ واحد سعودي من عندهم خريج نجارة

ووظفه عندكم براتب 3000ريال

1500 ريال تدفعها الورشة و1500ريال يدفعها صندوق الموارد البشرية

وضربت عصفورين

سعودة + خبرة تخصصة نجارة + مراقب على العمال

والأفضل تدور من الشباب الملتزمين وبشكل صريح لنهم يخافون الله ولن يضرك في شي
اذا ما جاء منه خير ماراح يجيك منه شر

وممكن حل ثاني قريب لكم فاهم بالصنعة ويشرف عليها سوا براتب او نسبة

ابن الهيلا كفيت وفيت

ونعم فيك وفي عتيبه رجل نشيط ابن الهيلا عطاك ياها

شوف اخوي عليك باليمانيه تراهم ناس شغاله

حاول تشوف لك يماني و تعطونه نسبه وصدقني راح يمشي مشروكم ان شالله

واذا تقدر حاول في هذي الفترى تاخذ اجازه و تكون موجود

بالتوفيق

مثل ماقال ابن الهيلا

دور لك واحد يمسك المحل ويديره وانت تشيك معه عن طريق الجوال اذا كنت في العمل ويكون سعودي يفهمك وتفهمه

ياليت افهم في النجارة والله اشتغل معاك