بسم الله الرحمن الرحيم
الحمد لله رب العالمين
والصلاه والسلام على اشرف الانبياء والمرسلين
سيدنا محمد بن عبدالله الامين
اخواني اعضاء منتديات البطاله
انا هنا بينكم لأبث حزني ويأسي وان كنت قد صغة موضوعي بأسلوب هزلي
ولكن الله يعلم بما تحوي الصدور
باختصار اسمع يا من لك ايام او شهور او حتى سنه اوسنتين او ثلاث او اربع
انا لي سبع سنين متخرج من الثانويه عملي بتقدير جيدجداً مرتفع مالقيت لي وظيفه
تخرجت من الثانويه مامعاي شنب
اللي يشوفني يقول وش يقرب لك وائل كفوري:o
واللحين الشنب اظفره ظفاير لا وازيدكم من الشعر بيتين اقلص فيه السياره 
والوجه بعد ما كان مورد:o نشف ويبس
مافيه فندق ولا غرف مفروشه في الرياض وجده والشرقيه الا وتعزبت فيها كله علشان المراجعات
لأجل اكسب لقمت عيشي <<< وش دعوه يا سيبويه
جميع القطاعات العسكريه فريتها
كان طموحي بعد الثانويه ادخل الكليه العسكريه
وكانت عيني على الامنيه 
واذا عدمت وطاح حظي خشيت كلية الملك خالد العسكريه
بعد سنه خف الطموح وصرت ادور وكيل رقيب
وبعد سنه خف وخف اكثر واكثر وصرت ادور على جندي 
مع العلم ان جميع شروط القبول العسكري متوفره فيني
بعدها قلت مالك في الطيب نصيب ندور على وظائف مدنيه
ولا دائره الا رابطت فيها ولا قسم شؤون موظفين الا حضرت عنده
ولا لك امل
رحت لمكاتب التوظيف وبعد تجربه وتجربتين
عرفت انهم لصوص حراميه سرسريه ولا يبون الا ينفضون جيوب الشباب
نرجع لمحور الحديث
الشايب مل مني
الاخوان يا الله يأكلون عيالهم
اشتغلت بكباين
اشتغلت بمقاهي انترنت
اشتغلت سواق في شركة مقاولات
اشتغلت مراقب عمال في شركة مقاولات
اشتغلت في استقبال شقق مفروشه
كل هذي الوظايف رواتبها ما تتعدى 1700ريال 
ابي اكمل نص ديني <<< اي زواج وخرابيط انت امل بطنك بعدها فكر في العرس:o
مؤهلاتي
1/ ثانويه عامه علمي 1420 هـ
2/ لدي القدره على الحوار (لباقه - ذووق - وسامه والصورة الرمزيه خير برهان - مفتل العضلات أصلح حمال )
3/ اشرب الشاهي في كوب جبن
4/ لدي مهاره ركوب الهوصاان
5/ خفة في اليد <<< حرامي بس ما استثمر هالخصله (اخاف من الله)
6/ قوي حجه وبرهان واركب الزبون البضاعه اللي ما تمشي في المحل 
7/ اكتب باليمين واليسار واذا لزم الامر اكتب بصابع رجولي (اصلح كاتب عدل وان عدمت كاتب ضبط )
8/تستهويني قراءة الاخبار (اصلح نقال كلام )
9/ احب الالوان الفسفوريه ليش ما ادري
7/ عندي مهاره في قيادة جميع انواع السيارات والدبابات والسياكل ابو كفرين وابو ثلاث كفرات بجميع المقاسات
يا جماعة الخير سبع سنين ورب الكعبه ظلم وقهر 
وش اسوي ابي منكم نصيحه
اسرق / تنقطع يدي
اهرب/ يطير راسي
ابيع سموم (حلوه سموم ) آكل هوا
شر البليه ما يضحك
انا عندي احساس
اني اذا توظفت بينزل تقاعدي بعد ما اباشر العمل بشهر << تجاوز السن القانوني
....................
..........
وظيفه بسيطه تمنع بلاوي كتيره
عموماً
الحمد لله على كل حال
تحياتي للجميع
21-07-2007, 05:20 AM
العرض المتطور
