13-04-2010, 02:33 AM
|
|
Guest
|
|
تاريخ التسجيل: Feb 2009
الدولة: خميس مشيط حاليا
المشاركات: 6,889
معدل تقييم المستوى: 0
|
|
|
احلى طيحة..+ الوداااع...
السلام عليكم ورحمة الله وبركاته....
بالله بعمركم شفتم واحد يطيح على ورا؟؟؟
هذا اللي حصل لي يوم الاثنين الماضي ليلة الثلاثاء الموافق الخامس من شهر ابريل من عام عشرة وألفين بعد المئة...
هذاك اليوم كانت ماسكة معي على النظافة غسلت البيت والمطبخ والابواب وكل شي وبعد ماخلصت غسلت سيارتي وسيارات الحي كلها واخذت اولاد اخواني وروشتهم ولما خلصت رحت لفجر الله يحفظها وروشتها وغسلت عزبة هنود ساكنين جنبنا.....وبعد ما قضيت جيت وطلعت من باب الشارع قلت ما بقي الا الدرج ما غسلته....
جبت مويه وغسلته وخلصت ولما خلصت جيت ابوطي رجلي اليمين ....لفت علي واطيح على ظهري ويجي حملي كله على يدي اليسار....85,45 كيلو جرام كلها جات على يدي اليسار....عاد انا قمت بسرعة زي الذيب خايف لايشوفني احد الملاقيف ويصورني وتصير علومن ماهيب طيبة ابد....
قمت وانا دايخ واطيح مرة ثانية على وجهي ....مدري وش فيني هذاك اليوم ....فيه ناس يقولون انها عين ماصلت على النبي...مع اني ما ني حلو بالحيل....بس عندي شعر احسن من بعض الناس اللي راسه مافيه ولا شعره وتشوف القمل بالعين المجردة يتمشى في راسه وماخذ راحته....
دخلت البيت وانا حايس وثوبي مليان تراب وحالتي حالة يوم شافني ابوية يحسبني تهاوشت مع احد....وامي تحسب اني سويت حادث...واختي تحسب اني مضيع مفتاح البيت وناط من الحوش....
جلست القرفصاء في الصالة وتحديدا فوق السفرة...ابوي يقول لامي قسم بالله ماهوب صاحي الولد هذا....قلت له يبه انت تقول اذا ماعقلت بتزوجني الثانية ....والظاهر ان ما بيعقلني الا الثانية....بس بعد اذن ام فجر....قمت من فوق السفرة لوحدي
وانا اصلا مدري وش مدخلني بيت اهلي المفروض اروح عند ام فجر تداويني ....
يوم وصلت جلست القرفصاء مرة ثانية في نص الصالة....قلت لام فجر رجلي زحلطن وزحلط جسمي فوق يدي والدنيا كلها زحلطن في زحلطن....
رحت الدوام في حالة يرثى لها ....اعرج ويدي في حظني...طلعت على المستشفى....سوا لي رباط في رجلي اليمين ويدي اليسار....رحت البيت وكل شويه ناط لي واحد يقول هذا هو حد الحرابة في الدنيا...تقطع ايديهم وارجلهم من خلاف....ولهم في الاخرة عذاب اليم....والثاني يقولي احمد ربك جاتك العقوبة خفيفة والا المفروض تقطع ايديك وارجلك من خلاف...شوي واحد حشرني تحت مكيف يقول انت قاطع طريق ؟؟؟ اعترف فقد فضحك الله في الدنيا ولا داعي للمراوغة....قلت له انقلع والا ترى قسم بالله امردغك في التراب....ترى لما اعصب ما عندي يمه ارحميني...
(من خلاف يعني اليد اليمني والرجل اليسرى او اليد اليسرى والرجل اليمني...زي ماحصل لي بالضبط)
يوم الجمعه كملها الامام خطب عن الحرابة في الاسلام...وهو يطالع فيني ويقول : ان الحرابة هي جريمة وفيها سلب للضروريات الخمس....ويجب علينا ان نتصدى لاعداء الامة...(احسها كلمة الصباح اللي في الاذاعة المدرسية) والمصلين يطالعون فيني ومصدومين......
ماعلي منهم.....
راجعت كذا مستشفى....وطلعت نتيجة الفحص التواء شديد في مفصل الكف الايسر ويبي لي راحة تامة لمدة لاتقل عن اسبوعين....احد الدكاترة حذرني من الكتابة على الكيبورد ...ممكن تسبب لي مضاعفات وتأخر مدة الشفاء ....المشكلة ان كل المصايب ماتجي الا في يدي اليسار....واخرها تقفل باب السيارة على يدي اليسار يوم غرقت في السيل .....واولها في حصة الرياضة في خامس ابتدائي ....ومابينهما اشين من اولها واخرها....
ابي اغيب عنكم اسبوعين وانشاء الله ابي ارجع القى زيدان ماخذ باند ووزير البطالة هو وكفراته المستعملة في قسم الارشيف...وكبتن عتيبة معلق بشماغه في الصفحة الرئيسية بجوار تسجيل الدخول.....طبعا هذولي الثلاثة اعز اعضاء عندي ولايهونوا البقية ....ولا تنسون المثل اللي يقول من ضربك حبك وعلقك من خشمك
واحب اقول لزيدان وكبتن عتيبة ووزير البطالة ومبرمبج رمانه والى كل من شارك في رحلة الفضاء ومصر ....والى كل من اخطأت في حقه....تراك باقي ماشفت شي..خخخخخخخخ امزح
وصدقوني كانت احسن وافضل لحظات حياتي يوم اكون متواجد في المنتدى...ويوم تردون على مواضيعي وارد على مواضيعكم ....ونتبادل النقاشات والارآء....
احبكم كلكم في الله والحب في الله ما يشترط اني اشوفكم وجها لوجه....يكفي الاحساس بالاخوة والاهتمام باطروحات بعضنا...
استأذنكم الان واطلب منكم العفو والسموحة على أي خطأ او زلة بسبب او بدون سبب واللي غلط علي اقوله مسامحك ولا يكثر.... واشوفكم انشاء الله بعد اسبوعين
فمان الله ابو فجر
|
العرض العادي
