للــــــــــــرفع

مرحبااا شباب
انا بتكلم من واقع تجربه شخصيه
اول ما تدخل الدورهـ واول مرحله واصعب مرحله اللي هي 45
يوم وبالمرحله هذي تبدأ تتغير حياتك من المدنيه الى العسكريه
بشكل سريع وراح تتعلم الصبر وتكون حليم وما تغضب بسرعه
وتتعلم الانضباط وحاجات كثيررهـ من الناحيه النفسيه
والشخصيه هذا غير الناحيه العمليه مستقبلاً
في بداية الايام راح تحس انك في عالم ثاني وراح تنقطع عن
العالم الخارجي نهائيا وتتعب نفسياً شوي لانك ما تعودت وهذا
شي طبيعي ومع الايام راح تنسجم مع باقي المجموعه كلها لا اراديا بحكم
الحجز والمكان الضيق وتواجدكم مع بعض في تدريباتكم واكلكم
وشربكم ونومكم وكل شي والانقطاع عن العالم الخارجي وهذا
شي طبيعي وراح توقفون مع بعض وتصبرون بعض حتى اذا
اخطاء واحد وفي اغلب الاحيان يكون العقاب جماعي وهذا الشي
يحسسك بالمسؤليه اكثر وتتحمل ذنب المجموعه كلها اذا
اخطيت وطبعاً الضحك والروح المرحه في الاوقات الصعبه مثل
الجزوات او التدريبات الشاقه راح تخفف عليكم كثير
وراح تمر عليكم مواقف صعبه وانا اذكر من بعض المواقف هذي كنا مجموعه صغيره واخذونا للميدان
على شان يطبقون علينا جزاء او عقاب والكلام هذا كان الساعه 11
بالليل وطبعا حنا صاحين من قبل صلاة الفجر بساعه اجباري
الجميع وتعبانين وحالتنا حاله نبي ننام بس ,المهم طلبوا من كل واحد مننا يرفع بلكه (طابوقه ) ما
ادري وش يسمونها عند بعض المناطق المهم كل واحد يمسكها
بيدينه ويرفعها فوق راسه ويبقى واقف وافتحوا لنا البوابه
الرئيسيه وكانت قدامنا وقالوا اللي مو عاجبه او ما يقد ر يتحمل
يمسك الباب حنا ما نجبر احد انه يجلس وجلسنا على حال هذا
اكثر من ثلاث ساعات في بعضنا ما تحملوا ونزل البلك واطلعوا
من الباب وكان هذا اصعب موقف مر علي وكان اختبار حقيقي
لقوة التحمل والاصرار والعزيمه0
وطبعا بعد ما تخلص الدورهـ راح تكون كسبت اخوان لك
واصدقاء
من مختلف المناطق وبعد ما تطلعون وكل واحد يروح يباشر
عمله بمنطقته راح تتذكر ايام الدوره والتعب اللي فيها وتتذكر
يوم كنت تفكر وتقول متى تخلص الدورهـ بس ويوم خلصت
الدوره اشتقت لايامكم في الدوره ولاخوانك واخوياك اللي عشت معهم فتره طويله
وجلست معهم اكثر من جلساتك مع اهلك نفسهم وما راح
تنساهم ابد وابي انصحكم بحاجتين ^_^
الحاجه الاولى في بداية الدورهـ راح يختارون منكم لكل سريه عريف ويكون مسؤل عنكم
ويقدر يطبق عليك عقوبه او جزاء ويبلغ عن اي خطاء منك وبالمقابل يكون العريف مرتاح حتى اذا صار جزاء عمومي للافراد هو يوقف على جنب وما يتجازى معكم
وهذي ميزه حلوه بس بنفس الوقت راح تخسر اخوياك وراح يكرهونك بسبب عملك ومراقبتك لهم والاظطرار الى التبليغ عنهم الا راح تتحمل المسؤليه كامله
ونصيحتي ابعدوا عن الشي هذا وخلوكم مع اخوياكم على الحلوه والمرهـ
الحاجه الثانيه واللي متندم عليها الى يومنا هذا هههههههههههههههههه وهي اختيار السرير في الفصيل او الثكنه وانا اذكر اول يوم الناس تركض على شان يحجزون سراير بمواقع حلوه
وانا اتمشى ويوم وصلت ما حصلت الا اول سرير عند الباب وتعالوا شوفوا الحاله الواحد ما يقدر ينام من اللي داخل وخارج ويوم يجي المدرب الفجر يجلس يضرب الباب بقووهـ ويصارخ وانت اقرب واحد
وانتم عارفين اذا الواحد صحى على الازعاج هذا كيف راح يكون مزاجه ^_^
والله يوفقكم وتنقبلون وتدخلون الدورهـ وكل واحد تتغير حياته
وتتغير نظرته للدنيا ويتحمل مسؤليات وواجبات ما كان يفكر
فيها ولا كانت على باله
هذا باختصار مع تمنياتي للجميع بالتوفيق

يسلموووووووووووو

وناسة الموضوع للتثبيت

يمديني ادخل جوالي ولا ممنوع

طيب اللي له خبره عن دورة الامن العام

شكرا على المعلومات

الله يوفقكم شباب بصراحه موضوع حلو
وان شا الله الكل يشارك اللي عنده خبره
وشكر خاص لخوي احلامي ضايعه والله افادنا كثير ولك احلى تقييم يبعدي