محل نجاره ... لفك وتركيب الاثاث ... آرائكم تهمني ..

نجار محترف · #1 (**permalink**) 20-04-2010, 04:05 PM

بسم الله الرحمن الرحيم

اليوم كنت ابوقع العقد حق المحل .. بس قلت لازم اسوي كل شي قبل لا ابدا بالمشروع ..

عقدت القيران على محل نجاره

... وعملت الاتي :

1- اخترت محل مناسب جدآ .. عبارة عن فتحه وحده .. تقريب 30 متر في 15 ..مناسب .. بس الى الحين ما وقعت العقد معه ..

2- رحت للبلديه عشان اشوف عليه رخصه ولا لا ... طلع كل شي تمام من جهة المحل ..

اللي راح يصير ان شاء الله .. ان بكرا ابوقع العقد .. وابروح للبلديه بعدين ابطلع رخصة محل.. . بعدين لمكتب العمل .. عشان اطلع فيزه .. والعامل يبيله شهر لما يجي ..

.
.
.

ومن جهة دراسة جدوى للمشروع مسويها بشكل دقيق جدآ ... صدق ان المشروع ما يسوى .. بس انا عندي مبدأ بحياتي ... الاتقان في كل شي <<< احم احم ..

طبعآ .. انا راسم لي طريق الى مالانهايه من جهة المشروع وسلسلة التطور اللي راح يصير عليها ...

بس حبيت اشوف اقتراحاتكم ... والنصائح .. وخبراتكم كذالك ..

وتأكد ان كل كلمة تقولها راح اخذها بعين الاعتبار ...

وللمعلوميه انا من سكان القصيم - بريدة

وشكرآ

بالانتظار

هولكو · #2 (**permalink**) 20-04-2010, 04:20 PM

العامل يطول ياليت شهر
بالقليل ثلاث شهور
هو يخلص اوراق هناك ويتاخرون لنهم عارفين انهم ظمون الوظيفه وهنا متغربين عن اهلهم
كم شهر تفيدهم

تسونامي · #3 (**permalink**) 20-04-2010, 04:32 PM

اعجبني حماسك وتفائلك
ياليت اقدر افيدك بشي
موفق اخوي والى الامام دائما

رجل نشيط · #4 (**permalink**) 20-04-2010, 04:44 PM

محل نجارة لفك وتركيب الاثاث ...

يعني بتصنع اثاث وكنب وغرف نوم ؟؟
ولا بس بتفك وتركب ؟
ترى مايكفي عامل واحد ..
تعرف وش الاشياء المطلوبه .. المعدات حق النجارة ؟

طيب ليه ماتفكر تاخذ ورشه ؟

وين موقع المحل ؟ من تتوقع راح يجيك للمحل ؟ ايش مستوى الجوده الي متوقعه من شغلك وعمالتك ..

هذي الاسئله جاوبها بينك وبين نفسك ..

المشروع كفكره حلو .. بس حاول تكون عناصرة الاساسيه موجودة قبل ماتسوي شي ..

فالك التوفيق

تفكير · #5 (**permalink**) 20-04-2010, 04:58 PM

مشروع النجاره فن وابداع وتصميم بلا حدود اذا اتقنت

المهنة بالشكل الصحيح

وهو مشروع ناجح ويدر على اصحاب هذه المهنة

الملايين بعد توفيق الله

واقترح عليك ان تهتم بغرف النوم للكبار والاطفال

بأشكال رائعة والوان جذابه

اغلب الناس سارو يتجهون للتفصيل حاول انك تكسب

الزبون من ناحية السعر وجودة الشغل

في بعض الناس صراحه مايعرف انواع الخشب فيجب عليك

انك تعرفه على انواع الخشب

من ناحية سعره وجودته حتى تكون لك مصداقيه في

عملك اتمنى لك التوفيق

نجار محترف · #6 (**permalink**) 20-04-2010, 05:21 PM

مساء الخير اخوي هولكو ...

اقتباس:

العامل يطول ياليت شهر
بالقليل ثلاث شهور
هو يخلص اوراق هناك ويتاخرون لنهم عارفين انهم ظمون الوظيفه وهنا متغربين عن اهلهم
كم شهر تفيدهم

بشكل عام .. راح اقدم .. ومتى ما جاء , يجي بس اللي قالو لي انه يبيله شهر .. شهر ولا ثلاثه مو مشكله اهم شي بالموضوع انك تبدأ صح وحتى لو تاخرت عليك الامور اشوي ..

تبي تقولي طبعآ ... طيب والمحل بيروح عليك 3 شهور تأجير وغير كذا لما يجي العامل يبي يتعلم عربي 3 شهور ... يعني بيروح عليك دراهم ..؟

وانا ارد عليك بكل تفائل وتخطيط من قبل ....

تعتبر هذي من الخسائر ... اي يجب ان نضمها الى الخسائر .. واللي اشوفه انا من خطتي الاقتصاديه ان اقدر ارجع هذا المبلغ خلال سنة

فالحمدلله على كل حال

مرورك رهيب جدآ ورائع .. ويسعدني انك تكون اول من يرد على موضوعي

.
.
.

تـــسونـــامي

اقتباس:

اعجبني حماسك وتفائلك
ياليت اقدر افيدك بشي
موفق اخوي والى الامام دائما

اهلآ وسهلآ ... شرفت موضوعي وشكرآ على الاطراء ..

زودت حماسي الله يزوجك قل امين ...بمهر قليل

وعلى فكرة انت افتني بطريقه غير مباشره ... رفعك للمعنويات , شي جميل جدآ

نشوفك بأحدى المواضيع ...

نجار محترف · #7 (**permalink**) 20-04-2010, 05:35 PM

.
.
.
.

رجل نشيط ...

نك نيم رائع

اقتباس:

محل نجارة لفك وتركيب الاثاث ...

يعني بتصنع اثاث وكنب وغرف نوم ؟؟
ولا بس بتفك وتركب ؟
ترى مايكفي عامل واحد ..
تعرف وش الاشياء المطلوبه .. المعدات حق النجارة ؟

طيب ليه ماتفكر تاخذ ورشه ؟

وين موقع المحل ؟ من تتوقع راح يجيك للمحل ؟ ايش مستوى الجوده الي متوقعه من شغلك وعمالتك ..

هذي الاسئله جاوبها بينك وبين نفسك ..

المشروع كفكره حلو .. بس حاول تكون عناصرة الاساسيه موجودة قبل ماتسوي شي ..

فالك التوفيق

التخطيط المبدئي ... هو اني افتح محل واجيب عامل .. يتعلم لغتنا القصمنجيه البحته

.. وهذا المده تستغرق تقريبآ 6 شهور ..

بالفتره هذي اكون عملت نماذج .. من دولاب وكرسي .. واعمال تعديل للزباين .. ومن غير الاقارب والاهل يعني ابشوف كيف هي خبرة العامل .. وهل يستحق ان يكون مرافق لي في مسيرة ألف ميل

وبعد هذا الفترة راح يتم عمل تصنيع الاثاث .. بلمسات النجار المحترف .. ومن خلال الخطة القصمنجيه الاقتصاديه ... سوف يكون فترة افتتاح معرض للاثاث .. خلال سنة من بداية المشروع او سنة ونص على حسب الوضع ..

بحسب جولتي التفقديه ... اكتشفت ان محل النجاره موب لازم يكون بموقع مهم .. يعني المحل يكون معقول جدآ ..

معرض العرض هو اللي لازم يكون موقعه استراتيجي .. لان هذا الموقع بيكون انتاج وعصارت افكاري وبما ان افكاري رائعه يجب ان تكون بمكان رائع ..

ومن جهة المعدات لشخصين .. تكلف 5000 ريال فقط لا غير << بحسب جولة التفقديه كذالك ..

واخيرآ ..

استمتعت كثيرآ وانا اتبادل الحديث معك ...

شكرآ جدآ ..

نجار محترف · #8 (**permalink**) 20-04-2010, 05:54 PM

.
.
.

تفكير ..

اقتباس:

مشروع النجاره فن وابداع وتصميم بلا حدود اذا اتقنت

المهنة بالشكل الصحيح

وهو مشروع ناجح ويدر على اصحاب هذه المهنة

الملايين بعد توفيق الله

واقترح عليك ان تهتم بغرف النوم للكبار والاطفال

بأشكال رائعة والوان جذابه

اغلب الناس سارو يتجهون للتفصيل حاول انك تكسب

الزبون من ناحية السعر وجودة الشغل

في بعض الناس صراحه مايعرف انواع الخشب فيجب عليك

انك تعرفه على انواع الخشب

من ناحية سعره وجودته حتى تكون لك مصداقيه في

عملك اتمنى لك التوفيق

من الاسباب الرئيسةاللي خلتني افتح هذا المحل , هو انه فيه فن وابداع وتصميم ...

وكذالك من الاسباب .. نفس ما قلت اخوي ان الناس صارت تتجه للتفصيل .. ووجدت انها تدر مكاسب جيده جدآ ..

من ناحية الزبون ... لقد وضعت قسم خاص في ملف الجدوى القصمنجيه الاقتصاديه عن خدمة العملاء ..طبعآ هذا موب الحين سوف يتفعل .. ولكن نظرآ لخطتي المستقبليه سوف تكون بعد سنة ونص وهي بالاصح سوف تواكب افتتاح المعرض ..

ومن خلال تعلقي بمثلي الاعلى الانسان العظيم المبدع المتواضع " الدكتور:طارق السويدان" ..

تعلمت منه ما احتاج لكي افيد مشروعي الصغير .. وخاصتآ تعاملي مع الزبائن ..

واذكر ان طارق وضع معادلة بحيث كيف تبيع المنتج .. لها طريقة حساب .. يعني مثلآ ..<< طبعآ بالقياس ..

سعر الماده الخام +الجهد المبذول +سعر الادوات اللي وضعت على المنتج " من مسمار والخ .. "

يطلع لك سعر معقول جدآ ومناسب للزبون ان شاء الله ..

ومن جهة الخشب ... انا حاليآ اعمل دراسة سريعه بالنسبه للخشب وخاصتآ المتواجد في السوق ..

ورحت لم اكبر المحلات الموجوده هنا ... واصغرها .. عشان اقيم نوعية الخشب الموجوده ..

اشكر لك وقتك الثمين .. واتمنى لك التوفيق

تحياتي

تسونامي · #9 (**permalink**) 20-04-2010, 07:54 PM

نجار محترف انا بنت مو ولد هههههه
الاسم حقي بلشه الكل يحسبني ولد
كنت معصبه مالقيت الا هو
شكرا لكلامك الله يوفقك

نجار محترف · #10 (**permalink**) 20-04-2010, 09:01 PM

اقتباس:

المشاركة الأصلية كتبت بواسطة تسونامي

نجار محترف انا بنت مو ولد هههههه

اقتباس:

المشاركة الأصلية كتبت بواسطة تسونامي

الاسم حقي بلشه الكل يحسبني ولد
كنت معصبه مالقيت الا هو
شكرا لكلامك الله يوفقك

ههههههههههههههههههههههههههه

وانا اقوووول وش هالأدب هذا ... ما توقعتها على تمساااااح

بس بصراحه نيك نيم غريب جدآ ...

وبنفس الوقت حلوه العلاقه بين العصبيه والنيك نيم , احسها طالعه من قلب ... لان الاسم يعتبر زلزال او هزات بركانيه وهيك ... شكلك كنت معصبه على الاخر

وعقبال الرجل الصالح ... والمهر الغالي

تحياتي