بسم الله الرحمن الرحيم

السلام عليكم ورحمة الله وبركاته ...

اشكر كل القائمين على هذا المنتدى الرائع والمميز الذي يخدم شريحه كبيره من الشباب والفتياة بالسعودية وله بصمات جميلة في خدمة العاطلين عن العمل الله ييسر امورهم وامرني معهم ،،،


بالحقيقه أنا موضوعي يحير ومتعبني من سنتين أنا شاب مريض بالفشل الكلوي وعاطل عن العمل ولدي اسرة اقوم برعايتها من خلال الــ 850 ريال من الضمان الإجتماعي طبعاً مراح اتكلم عن هذا المبلغ الحمدلله على كل حال المحزن يا أخواني انني لا املك منزل ولا دخل شهري يعيني ويعين اسرتي المكونه من 8 اشخاص الوالده والأولاد والأب والأخوان كلهم في بيت صغير بالإيجار
وأنا اعاني مراره المرض والفقر والحزن على حال أهلي ووضعهم الصعب ابسط الطلبات لانستطيع توفيرها المدرسه اخواني يدرسون ثلاث مرات بالاسبوع ومرتين غياب والسبب المصروف ونظرة
باقي الأصدقاء في حالهم وهذا يشكل هم وقلق لي يضاف على همي الأول والإبتلاء بالمرض ،،،

ماخليت باب ماطقيته إلا وتم الرفض حبيت ارجول المسؤولين ولا فيه أمل بكيت عند المشهورين والاعبين حتى ياسر القحطاني اقسم بالله كلمته ولا نظر في حالي أنا اعذره يمكن يكون مشغول ونسى موضوعي وربي الكعبه ماخليت شي مافيه مسؤول جمعية إلا ورحت لها ولا قدمو لي اي شي غير روح إلين نتصل عليك ،،،،،،، ااااخ مدري شقول بعدها قال لي صاحبي
روح قدم على الديوان الملكي عبر ارسال برقية لخادم الحرمين الشريفين ارسلت برقيه
للملك الله يحفظه واتصل على مندوب من الملك بعد شهر من ارسال البرقيه قال لي الملك يقول وش يبي الولد يطلب اللي يبيه ونفذو له اللي يبي المهم شرحت له معاناتي كاملة وكنت سعيد جداً
وفرحان بالخبر الحلو وادعي للملك حتى في منامني المهم حلت الصدمه الكبيره عطاني المندوب رقم البرقيه وقال خلاص راجع الديوان الملكي المهم رحت طيران وركظ للديوان الملكي وقابلت الموظف قال لي مافيه امر لك من الملك المعاملة تحت العرض انتظر إلين يأمر عليها
قلت كيف ؟؟؟ حرام عليكم المندوب اتصل على وقال لي اطلب اللي تبي والملك يقول شخصياً وش يبي الولد حققو له وساعدوه ااااه سنتين اركظ ورى المعاملة هذي وللحين تحت العرض

رحت وارسلت برقية للأمير عبدالعزيز بن فهد حفظه الله وجاني الرد بأني اروح اراجع وزارة المالية راجعت وزارة المالية وتعبوني 7 شهور اركظ من مكان إلى مكان اجيب لهم اثباتات من الغرفه التجاريه وزارة الزراعة والبنك العقاري والضمان والشؤون الإجتماعية والمدارس لأخواني وارواق تقاعد الوالد واثباتات ان ابو مديون واجار البيت اورااااق كثير

كملت الملف إلين صار كأنه شنطة ملابس من الاوراق ورحت سلمتها المسؤول عن بحث الحالات الإجتماعية بوزارة المالية قالي الموظف الحين اوقع عليها وتروح لوزير المالية للنظر والشهاده على المعاملة انني استحق المساعدة للحصول على سكن وقع الوزير عليها ويقولون لايمكن نقولك وش شرح عليها روح راجع ديوان سمو الأمير بالرقم اللي معك عطوني رقم المعاملة
ورحت اراجع الديوان مره ثانيه وللأسف لي 8 شهور الأن والمعاملة تحت العرض


ياناااااس ليش كل هالعذاب ليش تحت العرض وانا ماخليت شي إلا سويته
شاب شعري وقلبي يعورني والمرض زاد على والفقر هد حيلي وحالة اهلي تبكيني



ااااخ ليش تكفون جاوبوني لاني وربي ابكي من التعب والمرض والهم ولا لقيت اي جواب
الديوان جوابه الوحيد تحت العرض إلى متى تحت العرض

الإدارة العزيزه الرجاء عدم حذف موضوعي ارجووووكم

لا حـــول ولا قــو ة إلا بالله

الله يفرجـــهـــا عليــك

والله مدري وش اقوووول لاحــول ولا قوة إلا بالله

لاحولا ولاقوة الا بالله ربي يشفيك ويفرجها عليك

.
.
((لا تعليق))
عجزت عن الكلام وما ادري وش اقول
.
((( ما يصيب المؤمن من وصب ولا نصب، ولا سقم ولا حزن - حتى الهم يهمه - إلا كفر به من سيئاته )))
.
الله يفرجها لك ويعوضك الخير كله في الدنيا والاخره
.
ياليت بيدي شي اقدر اساعدك فيه
.
.

الله يسر لك امرك ويشفيك يارب شي يقهر بس الشكوئ لله

الله يفرجها لك....والله قصتك تضيق الصدر...

لو بيدي شي والله ماأقصر معك...الله يعينك يارب..

أكثر ياأخوي من هالدعاء وربي يفرجها لك إن شاء الله من أوسع أبوابه..

((اللهم اكفني بحلالك عن حرامك واغنني بفضلك عمن سواك
اللهم اني اعوذ بك من الهم والحزن والكسل والبخل وضلع الدين وغلبة الرجال.
اللهم ارزقني رزقا لاتجعل لاحد فيه منَه ولا في الاخرة عليه تبعه برحمتك ياارحم الراحمين .
اللهم صب علينا الخير صبا صبا ولا تجعل عيشنا كدا كدا .
اللهم ان كان رزقي في السماء فانزله وان كان في بطن الارض فاخرجه وان كان بعيدا فقربه وان كان عسيرا فيسره وان كان قليلا فاكثره وبارك فيه برحمتك ياارحم الراحمين .))