بسم الله الرحمن الرحيم

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين

اخواني الكرام

في موضوعي هاذا ودي احكي قصتي من البداية

انا كنت طالب مجتهد من ايام الابتدائي والمتوسط درجاتي عالية وتقديراتي ممتازة

لين ما دخلت الثانوية

دفعتي بالمتوسط دخلوا وياي في نفس المدرسة الثانوية

و اكتشفت مع الايام انهم حاسديني على نجاحي و التفوق بالدراسة

كانوا كاتمينها من ايام المتوسط وبصراحة كنت مصدوم فيهم

وكانوا باي طريقة يحاولون اني اصير فاشل مثلهم

وكان من ضمن اللي يبوني افشل دراسيا

واحد من عيال عمي المقربين

اول ما دخلت الثانوية استلمني صار هو المرشد لي في هالمدرسة

كانت الثانوية ثلاث ارباعها فاشلين

مع الايام علمني كل الاشياء اللي يعرفها الشباب طبعا الاشياء السيئة

وكل يوم يزين لي معلومة جديدة

وكنت اقتدي فيه للاسف

في اول سنة رسبت ب 11 مادة

المرشد الطلابي مستغرب من هالرسوب

وقال ما في امل لازم تعيد السنة

الاهل طبعا زعلوا من هالنتيجة

قلت لا لازم اعيد دور ثاني وبكل المواد

وجلست طول الصيف اذاكر واذاكر

لين جت اختبارات الدور الثاني

واختبرت وبتوفيق من الله

نجحت بكل المواد

وخذت تقدير ممتاز

ولد عمي مستغرب شلون نجحت

المدرسة خيروني بين العلمي والادبي

اصدقاء الفشل وولد عمي

حاولوا اني ادخل ادبي

يقولون سهلة وتتخرج وانت ناجح ومن هالكلام

كلهم راحوا للعلمي وانا وولد عمي رحنا للادبي

طبعا ولد عمي اعتبره ابليس مترصد لي

دايم اتبع كلامه وارائه

و انا بصراحة ندمت على كل لحظة سمعت فيها كلامه

عدت ثاني سنة ورسبت بمادة وهو رسب بثلاث مواد

وعدت دور ثاني ونجحت بتقدير جيد جدا

والسنة الثالثة والاخيرة

نجحت بتقدير جيد جدا

بس نسبتي ما تأهل للدراسة بالجامعات

كانت نسبتي 76.53 %

طبعا انا لو ما مشيت مع ولد عمي وسمعت كلامه

كانت نسبتي ما تنزل عن 95 %

هو نجح بس نسبته 65 %

طبعا قدمت على الجامعات

ولا وحدة فيهم قبلتني

رحت قدمت على الكلية التقنية

ودرست فيها سمستر واحد

ورحت قدمت على الكلية الصناعية بالجبيل

مرتين المرة الثانية قبلوني فيها

طبعا ولد عمي وياي قبلوه بالواسطة

درس وياي ومسيرة التحبيط والفشل

مستمرة

درست سنة ونص

وهو درس سنة

وطلع منها

طبعا راح يدور وظيفة عن طريق الواسطة من الاقارب

ولقى له وظيفة

طبعا ما علمني عنها الا يوم خذا خبرة ست شهور

طبعا انا رحت وعن طريق احد الاقارب

و توظفت

طبعا الوظيفة في احد شركات سابك

بس مو وظيفة رسمية

عن طريق مقاول متعاقد مع سابك

طبعا سابك تاخذ دفعات من المقاولين وتوظفهم بوظيفة رسمية

مرت سنة وخذوا دفعة ووظفوهم بسابك

ومن ضمنهم ولد عمي

بيني وبين ولد عمي في الوظيفة ست شهور

هو كمل سنة وخذوه عن طريق الواسطة

وانا ما خذوني

كملت سنة وسنتين

وما جانا الترسيم

كل يوم يوعدونا في ترسيم قريب وما نشوف شي

جلست اربع سنوات ونص

مع هالمقاول

وطلعت منها

وما جابوا لي الا الامراض و عقدوني نفسيا

في خلال هالاربع سنوات ونص

شفت منها

الظلم والقهر والمذلة

راتب ب 2300 ريال شهريا وما يجيك الا في يوم 10 من الشهر الثاني و تستلمه كاش زي البنقالي


تشتغل 8 ساعات مكروف على وجهك وتتعامل معاملة البنقالي

4 ايام راحة بالشهر

21 يوم اجازة سنوية

الدوام دوام شفتات

صباح واول ليل واخر ليل

محروم من الطلعات والوناسة عشان هالوظيفة لا يفصلوني منها

غايب عن المناسبات العائلية والاعراس عشان هالوظيفة

انقطعت عن جميع الصداقات بسبب هالوظيفة والتزمت باصدقاء الدوام

عدم راحة بالنوم بسبب تقلب الدوام

العقد النفسية المتصلة مع بعضها

التفريق بين الموظف الرسمي والمقاول ب 180 درجة

الشماتة من الاقارب بسبب هالوظيفة

صداقات العمل المزيفة اللي تعتمد على المصالح بس

المديونية بسبب الراتب اللي ما يغطي مصاريف الحياة اليومية

كل هاذا والادارة سعودية 100%

الموظفين الرسمين كلهم سعوديين

المقاولين ثلاث ارباعهم سعودين مطبقين نظام السعودة على كلامهم

والربع الباقي اجانب

جلست فيها اربع سنوات ونص

وطلعت منها

وجلست 8 شهور بدون وظيفة

معقد نفسيا لا اروح مكان ولا اجي مكان

وانا ما معي مصروف الطلعة

وفي نفس الوقت ما ابي اصير عالة على احد

الصباح ادور على وظايف

وباقي اليوم في البيت

لان الله قدر لي وظيفة بشركة مرافق

بس مو وظيفة رسمية

عن طريق المقاول

بس افضل مع اللي بسابك

هالوظيفة راتبها 7000 ريال

مع كل البدالات وينزل على اخر اشهر وعلى البنك

8 ايام راحة بالشهر

30 يوم اجازة سنوية

على الاقل احسن من المقاول اللي مع سابك

وتحسن الوضع شوي

ولي معهم ثلاث سنوات

بس اللي يقهر فيها

ان السكرتية ما يكملون سنة ويترسمون

والمشغلين ما يعطونهم حتى خبر

مع انهم هم قلب الشركة وارباحها من هالمشغل المسكين

يوعدونا انشالله قريب وبس

مع الايام جاني خبر ان فيه ترسيم بالشركة اللي كنت اشتغل فيها

ووظفوا كل السعوديين المقاولين فيها

ومن ضمنهم اصدقاء الدوام اللي اعرفهم

بس يوم توظفوا

اكتشفت منهم اشياء

التكبر والتغلي والشماتة

على اييش طيب على وظيفة رسمية

وبعدين بين راتبي وانا مقاول وراتبهم وهم موظفين رسمي

حاليا 1500 ريال

ما فرقت

على الاقل

استلم راتبي وانا مرتاح

وهم يستلمونها وهم يكرفون ال 8 ساعات


بس الصراحة كل القصة اللي سردتها لكم

شوي من الصدمات اللي بقلبي

انا ما كنت احلم اني اصير في هالموقف الصعب

انا كنت احلم ادخل ادرس علمي واتفوق وادرس بالجامعة

واتوظف وظيفة رسمية بدون واسطة

وا تزوج ويصير عندي عايلة زوجة واولاد

واعيش مستقر بحياتي

وبيت يشيلني انا والعايلة

واعيش مستانس مع العالم والناس


بس اللي صار حرق كل احلامي

وصار التعويض صعب

ودي اكمل دراستي الجامعية

ومو قادر

لازم ادرس واشتغل في نفس الوقت

وانا ما عندي حمل اشيل الاثنين

انا فكرت اني عشان اعوض اللي راح

اني اقدم على بعثة وادرس برا على حساب الحكومة

بس مع القرارات الجديدة

ما في مجال ادرس

الا عن طريق حسابي الخاص

وهي دراسة بالمعهد لغة وبعدين

اذا جبت معدل زين يحولونك على حساب الحكومة

وانا حاليا ما اقدر ادرس على حسابي الخاص

والدراسة بالسعودية بالنسبة لي وسط هالهموم والمشاغل

مستحيلة

والكلام يطول حول موضوع البعثة


ترقبوني مع هموم البطالة

في الجزء الثاني