المشاركة الأصلية كتبت بواسطة انسان يتيم

يا شباب شهادة الثانوية العامة ما هي معي وكمان شهادة حسن السيرة والسلوك هل تكفي صورة منها مختومة عليها بالأحمر طبق الأصل أفيدوني لأن في واحد قالي ما تنقبل إلا بالأصل

المشاركة الأصلية كتبت بواسطة انسان يتيم

يا شباب شهادة الثانوية العامة ما هي معي وكمان شهادة حسن السيرة والسلوك هل تكفي صورة منها مختومة عليها بالأحمر طبق الأصل أفيدوني لأن في واحد قالي ما تنقبل إلا بالأصل

المشاركة الأصلية كتبت بواسطة موظف نشيط

الحمد لله اجتزت الإختبار أمس في مركز الطايف سهاله انا وأغلب الموجودين معي وكان سهالة للغاية وبدون أي تعقيدات وإليكم ما حدث:

1- حركت من جده الساعة 12:00ص طبالين في الخط، وصلت على الساعة 02:00ص ورحت للبوابة اللي فيها حاجز وطلع لي العسكري وقالي تروح مع البوابة اللي ورا الساعة 06:00ص تفتح، والله وأديور وألقى بوابة سوده أقوم وأفرش فرشتي قدامها وأحلى نومه لين الساعة 06:00ص.

2- صحيت الساعة 06:00ص ما شفت أحد جا ولا انفكت البوابة استغربت، إلا واحد يمر من عندي راعي كورولا يقول لي: ((انت وش فيك قاعد هنا؟)) قلت له: ((منتظر يفتحون البوابة)) قالي: ((تراى العالم كلها من هناك مو هنا، قم أمش وراي)) والله وأنط أشغل موتري وورا الرجال، طلعت البوابة جوه مره، وقفت موتري ونزلت، كان فيه عسكري على البوابة ما يدخلك إلا بهويتك ولابس ثوب، فيه ناس مساكين جو بملابس رياضة ما دخلوهم.

3- مسكت سرا تقريبا ما يتجاوز 200 متقدم، كان فيه أربع ماصات كل ماصة عليها جندي ورقيب يستلم الملفات يشوف لو فيها نقص يقول لك كمل النقص بسرعة روح وتعال ارجع.

4- يوم جا دوري شيك على الملف حقي وقالي رقمك كذ كذا رح أوقف مع الصف اللي بجمب الجدار.

5- وقفت في الصف لين جا الجندي وقال أمشوا وراي.

6- وصلنا لصالة كبيرة مكيفة كان فيها على داير ما دار ضباط وأفراد قاعدين على ماصات، وفيه رقيب أول عسل ينظم الصفوف، وعليهم معقب نقيب يتابع شغلهم.

7- جلسنا في طابور طويل كل ضابط أو فرد قاعد على ماصته قدامه سرا، ويستلم واحد واحد يشوف شهاداتهم ويطابقها مع الأصل، وعاد شوف اللي ماجاب الأصل واللي مزور أم الشهادات واللي نسى يختم الصور واللي نسي صوره.

8- جا دوري عند جندي أول مطوع الله يجزاه بالخير شاف شهاداتي وقالي خلاص رح ختمها من عند واحد جندي أول أشر لي عليه.

9-والله وأروح عنده قام يدقق في الشهايد، وانا الله يهديها الوالده اللي مقدمتلي عن طريق الموقع نكبتني، زودت الطول وزودت نسبتي في الثانوي وقامت تألف في البيانات، عاد الشيبان ماحولهم أحد مخرفين خلاص خخخخ.

10- قام الجندي أول قالي: ((وش ذا؟! كيف كاتب نسبتك 75% في الثانوي وهي قدامي على الشهادة 64%؟ وكم سنة الدبلوم حقك ذا مو مبين تواريخ؟ تضحك علينا انت؟)) قلت له: ((والله موب انا اللي سجلت البيانات هذي الوالده اللي دخلت الإنترنت وخبصت لي)) قال لي: ((وانت ما تتأكد قبل لا تجينا؟)) قام كلم نقيب الصالة المتابع، قام الضابط قال له: ((عطه مخالفة)) وسجل لي مخالفة إدخال بيانات خاطئة وقالي رح أقعد في آخر الصالة.

11- شوي جو 5 غيري قعدوا معي عطوهم مخالفات طبعاً انا فقدت الأمل إني أكمل خلاص.

12- شوي جا العقيد حق المركز وشاف المخالفين، قام قال للجندي أول خلاص مشيهم كلهم خمسة أنفار.

13- شوي نادوا علينا وكملوا أوراقنا الحمد لله، وقال لنا خلاص اقعدوا في الصالة لين ننادي عليكم عشان الفحص الطبي.

14- والله ونقعد في الصالة 3 ساعات كاملة لين مقاعدنا ورمت خخخخخ.

15- شوي جا جندي الشرطة العسكرية قالنا يلا قوموا الفحص.

16- مشينا لين وصلنا مبنى مكتوب عليه الفحص الطبي، دخلونا داخل وفسخونا الشماغ، وقاسموا الطول والوزن، بس الحمد لله مشوا ناس كثير في الطول، والله إن فيه ناس أقزام مشوهم، بعدين رحنا لدكتور النظر، وراني صور ارقام داخله في بعض زي اللي تجيك يوم تسوي ايميل جديد، بعدها يأشر على عينك بكشاف يشيك حاط عدسات ولا لا، بعدها يقول لك غط عينك بيدك اليسار واقرالي السطر الخامس او السادس عاد اصغر شي، وربي اللي نظره 10 على سته ما يشوفها خخخخخ، المهم هاتك تأليف يا حبيبي اليمين خليته يسار والفوق تحت، بس هو ماهمه تجاوب صح ولا غلط، أهم شي تكون واثق من نفسك وتجاوب صح مو تبلم وتقول ما ادري.

17- الحمد لله عدى النظر على خير ورحنا للمقابلة الشخصية.

18- دخلت داخل انا وواحد ثاني معي نادوا علينا، إلا ضابط ملازم أول قابلني مبتسم قالي: ((استرح))، وقرا ملفي وقال: ((ماشاء الله عليك انت هوايتك الرسم والتصميم والفن التشكيلي صح؟)) قلت ايه طال عمرك، قالي: ((طيب وش يعني الفن التشكيلي؟)) قلت: ((يعني أقدر أرسمك مثل ما انت طال عمرك الحين))، قام عطاني قلم وورقة مسودة وقالي: ((يلا ارسم لي أي رسمه ولا ترتبك خلك عادي)) قمت رسمت له شعار الأمن العام، قام قالي ارسملي كاريكاتير، قمت رسمت له صورة عربجي مفلسع في فمه سجارة خخخخخ، قام ضحك عليها ووراها واحد ضابط لابس ثوب كان قاعد بجمبه قام ضحك وقال له: ((خله يجي عندي جيبه انا بكمل المقابله معه)).

19- رحت للضابط أبو ثوب وقعدت قدامه، قعد يقلب ملفي، وقالي انت معك دبلوم انجليزي؟ قلت ايه طال عمرك، قالي: ((كلمني عن نفسك بالإنجليزي))، عاد أخوكم ما صدق رطنت وتفلسفت شويات، انبسط الضابط، وقالي( ليش رسمت هالرسمة حقت العربجي؟)) قلت: ((لأن التدخين انتشر في العصر هذا حتى الصغر صاروا يدخنون وصار شي عادي وانتشاره يؤدي لحاجات ثانية يمكن للشخص اللي يحب الإستطلاع والفضول ويحب يجرب كل شي قدامه))، قالي: ((طيب لو بتكتب جمله على الرسمه هذي وش تكتب؟)) وعطاني قلم، قمت كتبت على الصورة ((ياما خذيت عزايز))، قال لي: ((وش معنى هالكلام؟)) قلت له: ((معناه إنك يالدخان خذيت مننا أعز الناس من أحباب وأصحاب وقرايب))، انبسط الضابط وقال للملازم أول: ((يابو فلان والله الرجال مكسب لنا، كيف؟)) قال الملازم أول: ((خلاص يبو خالد الرجال عندي انا، انا أكفله)) قالي الضابط: ((يافلان اسمك على مسمى، وتشرفنا بمعرفتك وانت مكسب لنا صراحة ونادراً ما نلقى ناس مثلك نقدر نستفيد منهم، ونتمنى لك التوفيق إن شاء الله وإن شاء الله نشوفك قريب عندنا هنا)) وابتسم وقالي خلاص راجع الموقع علشان تعرف النتيجة، قمت من الكرسي ودقيت تحية عسكرية له، قام ضحك قالي: ((بدري عليها)) قلت: (( من الحين طال عمرك وتشرفت بمعرفتك، سلام عليكم))، طبعاً يوم دخلت المقابلة فيه واحد كان يتهزأ لأنه ما جاب الشماغ خخخخخ وقعدوا يسألونه عن وزير الإعلام ووزير الداخلية وكم عدد الدو العربية وأسئلة عامة والرجال ميييح، بس انا ما سألوني شي واكتفوا بالرطن العنقليزي والرسمه المفقعه خخخخ.

20- عاد من الفرحه أخوكم نسى الشهادات الأصل عند الضابط.

21- وطلعت رحت أصلي الظهر، وعقب الصلاة تذكرت الشهايد، قمت فكيت سبرنت على الضابط، طبعاً جوالي قفلته وخليته بالموتر احتياط، يوم دخلت على الضابط قالي: ((وينك، من أول أدق على جوالك ناسي شهاداتك)) قلتله: ((والله طال عمرك من الفرحه)) قالي يلا بالتوفيق.

22- وطلعت من المركز.

عاد منتظرين النتايج بتاريخ 07/08/1431هـ والله يكتب لنا ما فيه الخير، عاد أكره ما علي الجهل المتعارف عليه اللي يخوفونا منه آبائنا وأجدادنا والمجتمع والإنترنت والفكره المغلوطه عن المباحث العامة، والله تغيرت نظرتي يوم شفت التعامل وعرفت أهمية هذه الجهة في الدولة، وهو أهم جهاز صراحة لأنه يمثل أمن الدولة، وإن شاء الله نكون على قد المسؤولية وننضبط ونرتقي وإياكم للأفضل.

الله يوفقنا وياكم إن شاء الله، بس عاد يقولون باقي فحص الدم بمستشفى قوى الأمن الداخلي علشان يحددون الدورة.
هذا باختصار كل اللي صار معي يوم الإختبار.. في أمان الله ،،،