فضفضة اخر الليل...من هو مخترع المروحة؟؟؟

قاصر الشر · #1 (**permalink**) 28-04-2010, 03:17 AM

فضفضة اخر الليل .....من اخترع المروحة؟؟

السلام علاكم
تصدقون لي اسبوعين من يوم دخلت بنتي الشهر الرابع ....وكل يوم تصحى الساعة 1 بعد نص الليل وتطالع في المروحة وتقولها اغيييييه...

ومرة تطالع في اللمبة السهارية وتضحك معها وكل يوم على ذا الحال الين الساعة 4ونص !!!!!

واذا طفيت المروحة زعلت وبكت....واذا شغلتها ضحكت واغييييييه....واذا قالت هغيييييه اعرف انها فايقة ومافي امل تنام الا بعد ساعتين....

واحيانا تصحيني بضحكها مدري وش اللي مضحكها.....الظاهر انها تشوفني وانا منقلب من فوق السرير وتقول امحق من اب ....

اليومين الاخيرة صرت كل ما ابوس فجر تبكي....اكتشفت ان شنبي مضايقها...رحت للمستشفى عشان خدود البنت احمرت قالي الدكتور يابني احنا لازم نشيل شنبك.....قالي شنبك عامل دوشة للبنت وعامل لها وخز في كل بوسة..قلت يرحم والديك كل شي الا الشنب لكن افكر واعطيك خبر....قالي لازم تستعجل ترى الوقت مش في صالحنا....

قلت لام فجر لازم اضحي بشنبي عشان تعيش البنت....وحلقت ابو الشنب....بس تصدقون يوم شفته في المراية قسم كنه كفر كامري مشقوق وطالعه اسلاكه....قلت احلقه والله يعوضني خير .....

السؤال اللي مجنني الحين...من اول من اكتشف المروحة..؟؟

تصبحون على خير

يـرِبــِشٌ · #2 (**permalink**) 28-04-2010, 03:29 AM

مكتشف المروحه ترا في الاصل المكتشف انثى يعني الي اكتشف المروح هي بنتكـ فجر >> ربي يخلهاا لكـ

الموووهيم الي اكتشف المروحه مكتشف المروحة الكهربائية : هويلر 1882 >> بعد مسااعدة عمووو قوووقل

ابوو فجر كيف مزاااجك يوم تكووون ناايم السااعه 3 وتجي فجر تمسك معهااا اخر الليل بكوهـ

مشًاعرخجولهّّ · #3 (**permalink**) 28-04-2010, 03:34 AM

... الله يحفضها لك ويخليها لك ويخليك لها ...

وهي ..السوكره

أُتـرَجة · #4 (**permalink**) 28-04-2010, 03:42 AM

الله يحفظها وتكبر وتصير من أشهر المخترعين

مستقبل جميل إن شاء الله

وصية لأم فجر وأبوها

سموعها كلمات تشجيعيه من صغرها يامخترعة ... يادكتوره ..يامبدعه ..ياشاطرهـ.ياذكيه من هذه الكلمات التحفيزيه ترا الصغير يفهم ..
الله يخليها لكم وهي بصحة وعافية

استاذه مرام · #5 (**permalink**) 28-04-2010, 04:01 AM

الأطفال هذي عوايدهم حتى لو الدنيا مسودة ومافي بصيص نور يناغون
الله يعينك عليها لمدة سنة كاملة تناغي دبان وجهها
الله يحفظها ويصلحها

زيدان · #6 (**permalink**) 28-04-2010, 04:20 AM

الله يعين فجر ويحفظها ويحرسها ..

والحل انك تفكها وترحمها من بوساتك بشنب ولا بدون ..

وترى اول من اخترع المروحه مرسل علي رساله

يقول تكفى لاتعلم حاكم لانه ماله داعي العنف

مردغاتي وتحياتي ..

نجار محترف · #7 (**permalink**) 28-04-2010, 04:24 AM

.
.

المروحه ماهي مثل الثلاجة ... والدفاايه

المروحه عبارة عن حركه دائريه ... وهي حركه تحرك الهواء ...

والحركه الدائريه ناتجه ان في شي ثابت ماسك شي يتحرك بشكل دائري ...

هي عبارة عن فواصل او اذرع او ما يسمى member and joint متجمعه مع بعضها ...

اشياء زي كذا ...

عمومآ ... راح اسئل الدكتور واجيب لك خبر مفصل ...

وراح ادرس العلاقه بين بنتك و المروحه ..

سكرتير عاطل · #8 (**permalink**) 28-04-2010, 04:29 AM

ولد اختي .. دائماً يناظر المروحة ويضحك .. والحين صار يمشي .. ويبيني ارفعه عشان يمسك المروحة.. بس اطفيها وارفعه...

صباحكم ورد

راعي العليا20 · #9 (**permalink**) 28-04-2010, 04:29 AM

الله يحفظها ويخليها لكم

ذكرتني باخوي يوم كان صغير

يحب اي شي لونه احمر ماادري ليه

بس اكيد انه بيطلع حق بر وشبة نار وفلة حجاج >>ابوك يالمحلل السياسي

خخخخخخخخخخخ

خذ نصيحتي وانا اخوك ولاتبوسها الا وانت مشغل المروحه عشان ماتحس بشنبك

خخخخخخخخخخخخخخ

تحياتي