لقاء بعد فراق

السلام عليكم

قبل امس التقيت بصديق ابوي الله يحفظهم بعد فراق 23 سنة...
اذكرهم وانا عمري 6 سنوات تقريبا وحنا صغار واذكر ان عندهم ولد في عمري وبنت ماتعدت السنة....

يوم وصلوا السعودية دقوا على عمي وراحوا له ... بعدين جونا البيت....

امهم متصلة على امي تقولها ابي اشوف العيال كلهم وخصوصا محمد....لا وتدلعني حمادة!!!

يوم جو البيت انا كنت نايم بعد المغرب دوامي في النايت شفت وماصحيت الا وابوي يدق جوال ...قم جو الضيوف...

طلعت سلمت على الرجال ....شوي امي تدق على جوالي تقولي تعال سلم على عمتك....قلت لها عمتي مين...؟؟؟ قالت عمتك زوجت عمك اللي عندك..وترى الحرمة مصرة الا تشوفك...قلت لها يمه الله يرحم والديك طلعي لها أي واحد من اخواني وقولي لها هذا هو محمد...تريني استحي مرة...وبعدين اخاف تتهاوش مع ام فجر ....
شوي الحرمة سحبت الجوال من يد امي وتقول ياحمادة تيجي والا اجي...قلت لها اقعدي مكانك انا اجيك...

دخلت المجلس وكانت عمتي وبنتها وام فجر في النص بينهم..ويوم شافتني الضعيفة قالت ياعمري على الصغنطوط (احسبها سبة ) شكلها مبسوطة عشاني بدون شنب و مسكتني بالحضن وبكت من اعماق قلبها تذكرت ايام الطفولة ..انا بكيت معها مدري وش السالفة..تذكرت يوم اني ولدت انا وزجتي في نفس البيت اللي انا ساكن فيه الان.....انا ماتمالكت نفسي وبكيت معها....اذكر يوم كنا نلعب انا وولدها كورة ...واذكر يوم ذلفته في الغسالة وشغالتها وهو فيها....ومرة ربطت رجله في سيارة ابوه وهو مايدري بس الله ستر...(من طفولتي وانا مجرم)...

المهم وهي تبكي كانت تقولي انا بحبك ياحمادة...ام فجر تطالع فينا وهي قافلة ودها تعطيني قسيمة ...قلت لها تحبني زي ولدها ...قالت الحرمة ...لا انت لك مكانه خاصة....قلت للحرمة الله يرحم والديك كل مارقعت كلامك جيتي تخربيها....

بعد ما فكتني جاتني البنت تسلم علي وتقولي ازيك ياحمادة...قلت بيني وبين نفسي الله ياالدنيا ...يوم اني صغير ابوي كان يدلعني حميدان...والحين حمادة قسم بالله لو يدرون ربعي ان ماعاد يمشون معي...

قلت لها انا بخير ومبسوط وهذي زوجتي ام فجر احبها اكثر من روحي وهي كل شي في حياتي ...بس الله يرحم والديك خليكي بعيدة عني شوي...

طلعت ام فجر من الغرفة والحرمة طلعت بقي انا والبنت ...قمت جلست في الزاوية تحسبا لأي طاري....قالت لي انت شغال فين قلت شغال في عملي ...قالت لي طيب وش هوايتك..قلت له جمع اللزق والمراسلة ومحاذفة البنقالية وصيد الوزغان و اعرف اضرب بوية...وعلى فكرة ترين سيارتي غرقت في السيل...وشنبي حلقته عشان بنتي ....وطحت على رجلي...هذي اهم 3 محطات في حياتي

شوية دخلت امي وامها اخذت امي على جنب قلت لها يمه متأكدة انها ما رضعتني وانا صغير؟؟ قالت ايه متأكدة قلت اكيد اكيد قالت ايه اكيد...قلت يمه طيب ما في يوم نسيتيني عندهم والا مرضتي ووديتيني لها عشان ترضعني...تريني اذكر يوم كان عمري 3 شهور كنت في حضنها ....قالت لا ما وديتك لها...قالت لها يمه تأكدي لا يكون هذي امي من الرضاعة ترين مصيبة والله انا ما ابي الا انتي انتي تاج راسي....قالت لي طيب قوم تراك داعس على رجلي

طلعت من الغرفة وانا اتصبب عرق اول مرة اجلس مع حرمة وبنتها لوحدي ...قسم بالله شعور لا يوصف ....كأنك واقف تتفرج في حادث ثمن تجي سيارة الدفاع المدني تصدمك من ورا...ويجي خويك يبي يفزع لك ويطيح فوقك ويغمى عليه وهو بارك فوقك

فمان الله ...أحوكم ابو فجر

وعليكم السلام ورحمة الله وبركاته

الحمدلله على السلامة

اقتباس:

المشاركة الأصلية كتبت بواسطة حاكم بيزنطة وهي تبكي كانت تقولي انا بحبك ياحمادة...ام فجر تطالع فينا وهي قافلة ودها تعطيني قسيمة ...قلت لها تحبني زي ولدها ...قالت الحرمة ...لا انت لك مكانه خاصة....قلت للحرمة الله يرحم والديك كل مارقعت كلامك جيتي تخربيها....

الله يديم المحبة

تحياتي لـ فجر الله يحفظها لوالديها ويجعلها من حفظة كتابة الكريم

بصراحة موقف لاتحسد علية
والحمد لله على السلامة ياآحونا آبو فجر

وشفيكم استلمتوآ الرجال على الـ ح ـآء

تبي الجد لو انا مكانك انحاش من البيت لمده قد تتجاوز الأسبوع

الظاهر ان امهم ناويه عليك وتبي تزوجك بنتها ترى الحرمه لا حبت أحد تأكد ورآها شي يا بتزوجك بنتها يا بنتها

مبروك مقدماً الثآنية ..

والله يعين زوجتك على هالموقف ترى بعض الناس ما عندهم في أحد إيزي يا عزيزي

طب إنته أزيك دلوقتي .. حاكم أنا عرفك خايب من يوم قابتك أومك
ربنا يشيلك من أودامي



تعيش وتاكل غيرها ..
سالفتن طيبه على هـ المغرب (:

خخخخخخخخخخخخخ

مت ضحك وانا اقرا
ربي يعطيك العفايه اخوي