السلام عليكم ورحمة الله وبركاته

اول شي أسعد الله اوقاتكم جميعا وصراحة انا ماسجلت في المنتدى الا لما شفت الاخوة
والتعاون بين الاعضاء وحب المساعدة جعلها الله في ميزان حسناتكم ووفقكم لما يحبه ويرضاه

وأنا واعوذ بالله من كلمة انا نويت اتوكل على الله أنا وصاحبي ونبداء في تجارة الغنم وفيه واحد من الاخوان شغال فيها من زمان قال انا اروح للقصيم واشتري الغنم من هناك على 700 تقريبا اذا تبغون اشتري لكم معي واخذ على الراس الواحد 50 ريال واجيبها للرياض وبعدين اروح معكم للسوق واعلمكم كيف طريقة السوق الين تتعلمون كيف الطريقة لان اهم شي السوق تكون مفتح وبعد فترة احنا نتصرف المهم بتقولون ليش كاتب موضوع اجل دام الرجال قالكم بيروح معكم للسوق وبعلمكم كل شي اجل ليش مسوي زحمة والشارع فاضي أنا اقولكم بصراحة قلت خلني اشوف الاخوان في المنتدى يمكن احد جزاه الله خير يعطيني معلومات افضل يعني يدلني على سوق ارخص من القصيم ويعطيني نصايح في الشراء والبيع وعلى فكرة انا ماانا ناوي اربي ناوي ان شاء الله اشتري وابيع علطول بس مدري هل اذا شريت ب700 يطلع غالي علي والارخيص والخمسين الي بياخذها الرجال على كل راس كثير والا حقه وكيف السوق في الرياض لو جيت ببيع طبعا المبلغ الي معي تقريبا 8000ريال ويعطيكم العافية...............

ربي يوفقك ..

الغنم شي جميل

بس سعر 700 رخيص والله لو تجي الرياض تبيعه الحين الوقت هذا 900 ريال او اكثررر

اما لو تخليه باشهر 7 رح تصفق بالرياض حول 1000 ريال واكثر لن كثرت العزايم والعروس ..


واتمنا الشباب يفيدونك

اخوي انتبه لايكون ب700 الغنم عمرها كبير اكون نعجه كذا ماتستفيد

اذا ب700 جذعه او خروف رخيص

انتظر اخوي عاد مرض حمى الوادي المتصدع والخبر في جريده الوطن

حلووووووووووووووووووووووووووووووووووو جدا

فكرة الغنم مرررررره حلووووه


وأحس فيها بركه غير طبيعيه ،،،


وهذي الفكرة براسي من زمان


بس للأسف ماأفهم فيها ونفسي أتعلمها ،،،


أسأل الله التوفيق لك .........

اخوي ربي يوفقك في هذي التجارة بس خذها نصيحه مني
انا ترا كم مره نزلت سوق الغنم ولا قيت الشريطية يلعبون في السووق لعب
يعني يووم يرفعونه ويوم نزلونه على كيفهم
بس اذا جيت تبي تشري غنم خذ جمله احسن من الفرد فيها
بالجمله تطلع لك ارخص من التفريد في الغنم
واقلولك فية سوق غنم في
الشملي جهة حائل وبعدين سوقهم حلو ورخيص بالجملة
اذا اخذت تيوس وجفار حلو
اا الخرفان خذها جملة تطلع لك احلى تطلعلك الجملة 320 او 430 على حسب تعاملك مع الشخص
والجمله للمعلومية ........
هي مجموعه من الغنم فيها الزين والردي وانت وحظك في البيع
الردي تلاقيه مو سمين بس لما يكون عندك اكله شوي وراح تبيعه باقل شي 800
وبالتوفيق وان شاء الله اني اعطيتك معلومات كافية

بالتوفيق انشاء الله وماهي مشكله الخمسين اذايعلمك المهنه

أنا من القصيم وعندنا كل يوم سوق بديره معينه وكل سوق يختلف عن الثاني من ناحيه الاسعار ونوعية الجلب اللي فيه

لكن اللي 700 ماحدد لك وشي

هل هي تيوس أو بهم نعيم أو نجد
أو شياه حيل أم ماذا ؟

أما بالنسبه للخمسين فأعتقد الشريطه نفسهم مايحصلون 50 ريال بالطرف الواحد بالنسبه للتيوس أما الخرفان ماأدري ؟


عموما أنا بايع تيوس 5 شهور سمان بالمره على 710 الخميس اللي طاف

وأقول غاليات بالمره لكن شوف الشريطي ما أخذهن إلا هو عارف كم مكسبهن

لكن وين يبي يودي ما أدري ؟ يمكن الحجاز ويمكن الرياض

أتمنى تنزل السوق بنفسك قبل كل شي وتشوف الأسعار قبل لاتخوض التجربه ..

فشف أسعار الجمله والتفريد بالنسبه للبهم النجدي والنعيمي والتيوس ...


وبعدها قرر ..