السلام عليكم اخواني انا مبتدئ ولا عندي خبره بالسيارت

الحين ابي اعرف كيف اصحاب المعارض يربحون بالسيارات وكم ربحهم بالسياره الوحده

وهل انا اذا ابي اتاجر اشتري من معارض السيارات وانزلها الحراج بفرق ثلاثه الالف ريال ولا اشتريها من بره وابيعها هنا

ممكن تعطوني معلومات وخاصه انه المبلغ اللي عندي 100 الف ريال لو اشتري سياره وابيها واربح من وراها ثلاثه او اربع نعمه بس ابي كيف ابدأ

الله ييسر لك واكيد بتقول بنت وش عرفها بالسيارات بس انا اعرف ان اخوي يقول من برى مثل دول الخليج وخصوصا دبي ارخص واهو يبيعها هنا اغلى قلت له ابي اصير شريكة معكم ماعبرني واكيد هنا الاخوان مابيقصروا ماشاء الله عليهم . بالتوفيق مرة اخرى

لدي خبرة بسارات لكن بسيطة
اذا ماعندك معرض راح تتعب عشان تبيع سيارتك

لكن عليك بشغل الشرطية وتصيد السيارات النظيفة والمرغوبة ولا زم تاخذ كورس في اسعار السيارات

وبعض السيارت تخصر

بالعربي تبغى تكسب خليك على الوانيت والفورد والتايوتا بصفة عامة
تشتري الماني لو كان نظيف محد يقولك بكم

ولا تستعجل ابدا في شراء سيارة ولا تترردد كثير

شغلة يبغالها خبرة ومعرفة بسيارات ومكاسر
وتعرف كيف تصرف سياراتك
والله يوفقك في البيعة ويرزقك

الشراء من الحراجات وترقب النظيف
ولكن يلزمك أن تكون متفق مع صاحب
أي معرض لإيقاف سيارتك عندهم في المعرض
وتحدد السعر ويبيعونها لك بفوائد
وهذا أفضل من عرضها مرة أخرى بالحراجات
وفيها خير كثير
الصدق والأمانة ضرورية هنا
أحسبك كذلك والله يوفقك وييسر أمرك

السلام عليكم
جزاك الله خير على هالموضوع، يوجد موضوع لأحد الاخوان هنا يتكلم عن نفس فكرتك وبتفصيل لكن للاسف مالقيته
الحاصل وكما سمعت من الكثير ان معارض السيارات بالشفا اسعارها ارخص من مثيلها بالنسيم.
لو تتخصص بنوع واحد من السيارات ويفضل تكون السيارة التي تملكها الآن لسبب انك تكون ملم باعطالها ومشاكلها (انا بالنسبة لي عندي كابرس 92 وقبلها كابرس 91 وصرت اسمع الصوت واقدر اخمن من وين العطل للأسف)..
لو تشتري من الشفا وتسوي شوية تصليحات وتعديلات وتلميع وتغليف لا أكثر. ويكون هامش الربح مناسب.

فكر في السطر الأخير وربنا يوفقك...

واذكرك بالآية الكريمة : (فَأَوْفُواْ الْكَيْلَ وَالْمِيزَانَ وَلاَ تَبْخَسُواْ النَّاسَ أَشْيَاءهُمْ وَلاَ تُفْسِدُواْ فِي الأَرْضِ بَعْدَ إِصْلاَحِهَا ذَلِكُمْ خَيْرٌ لَّكُمْ إِن كُنتُم مُّؤْمِنِينَ)...

وحديث المصطفى صلى الله عليه وسلم: (رحم الله عبداً سمحاً إذا باع، سمحاً إذا اشترى، سمحاً إذا اقتضى).

لو اتبعت هالنصيحة، ربك بيوفقك وييسر لك رزقك.

اسف على الإطالة
الله يوفقك

اذا تبي تشتري من معرض وتبيع في الساحة اسمح لي اقولك خسران
لازم تتصيد السيارات من مواقع ولا من الساحة وتبيعها في الساحة بعد

^^
كلام سليم
كفيت ووفيت
بس انصحك تبعد عن السيارات الامريكيه والالمانيه
ركز على التايوتا اول ماتبدا
واذا اكتسبت خبرات تقدر تشوف الماركات الثانيه
والسياراه لاتشتريها من معرض لانها فوق قيمتها بالف وحتى 5 الاف
تصيد في الساحات والحراج
انا اعرف واحد شرا سياره من الحراج ووقفها في الساحه وباعها بمكسب 6 الاف ريال بنفس الساعه الي شرا فيها السياره
الله يرزق الجميع

والله هالشغلة تدووووووخ ويبيلها واحد بايع ذمتة

أخوي شرى سيارتيـــــــن من الحراج وتورط بالاولى ليــــــن ماأفتك منها ولاتاب جاب بعدها سيارة ثانيـــــــة واللحين بلشان فيها..

ماشاء الله على ابن هديبان ماقصر الله يعطية العافية