الله يرحم زمان اول...

السلام عليكم

طاب صباحكم ومساؤكم

قبل امس في الليل جيت انا وامي من السوق وانا طالع البيت محمل اغراض قسم لو تشوفوني تقولون هذا دينا ماهوب ادمي...ماتعرفون وجهي من قفاي

المهم امي قالت لي قفل الباب لا تدخل الفيران....صراحة زمااااان عن هالكلمة وحشتني تذكرني بأيام العزوبية يوم اجي قبل بزوغ الصباح ...

كانت تقولي امي اذا دخلت قفل الباب عن البساس....وابوية يقولي قفل الباب عن الحرامية....واخوية الكبير يقولي قفل الباب عن عيال خالي اذونا يبون يلعبون بلاي ستيشن....هذاك زمان كان القطو له كلمة والعري يوم تشوفه يمشي في الشارع ماتلقى ولا قطو يقدر يرفع عينه في عين العري...زمان كان كل بس له منطقته والقطو اللي في امه خير يروح منطقه ماهي له....

زمان كانت البساس رشيقة اذكر وانا في اولى ابتدائي حذفت بس من فوق السطوح الى الارض وماجاه ولا شي....لقيته اليوم الثاني عند الباب يطالع فيني ويقول مياو مياو...

الحين البساس عندها تخمة ويالله تقدر تمشي...واستغنت عن اكل الفيران....الله يالدنيا....نسيوا يوم يدورون على ذنب فار وماهم محصلينه..

البركة في الزبايل (كرمتم) الواحد يشتري حبتين دجاج هو وخويه والباقي يرميه ....واخر الليل مافيه الا مهاوشة بساس عند الزبايل ...
نص ميزانية البيت تروح في الزبايل....ونص الاكل الموجود في البيوت يروح للزبايل....!!!!!
قبل فترة لقيت بس ساحب له حبة دجاجة من الزبالة مع الرز والسلطة والبيبسي رماه الظاهر انه مو عاجبه ما يبي بيبسي حار...وقاعد ياكل هو وفار على كبوت سيارتي....شغلت السيارة ولسه ماتحركوا....عرابجة مخربين امها

شفت فار يمكن وزنه فوق العشرة كيلو ومو قادر يمشي وانا جالس في السيارة اذا ولعت النور العالي يوقف مسوي نفسه ميت واذا وطيت النور مشي ...يستهبل هالفار....وكل يوم على هذا الموال....الين جيت يوم من الايام والاخلاق قافله واطلع حرتي فيه... واولع النور العالي ...وهو يوقف ....هو عارفني وانا عارفه ذنبه مقطوع من النص واخبره يوم ولد كان نايم فوق الرديتر حق الفورد يدور الدفى الاخ وجيت شغلت السيارة وانقطع ذيله...المهم خليت النور العالي شغال وانزل بالعربية حق فجر الله يحفظها واصكها في نص راسه......قاعد يدور في مكانه وجيت كملت عليه بالسيارة...
يلعن ابوهم عيال كلب قرفوني في حياتي... اجي اخر الليل القاهم منتشرين في الحارة ...وعارفين سيارتي ولا يخافون مني ما يخافون الا من اللي خلقهم...

زمان كنت اقوله هششششش ويشرد...الحين والله لو تقولهم بــــع والا بــــــــــــخ والله لو تعلق على الشفت مع التاء لبكرة انهم ما يتحركون....ماكلين من زبايلنا والحين قاموا يتكبرون علينا ويكسرون كلامنا....

الاسبوع الماضي اخذت لي دجاجة وحطيت فيها سم عشان الفيران جيت الصباح لقيت ثلاثة بساس ميتة.....صدمة مروعة راح ضحيتها ثلاث بساس بريئة
الحين البس اذا شاف له فار قاله مياو مياو مرتين ثلاثة ويروح ويخليه....هو ضامن انه ما بينام بدون عشا....لو تشوفون البساس ماسكه سرا عند الزبايل بانتظام....والفيران في الجهة الثانية وتنظيم ماحد يسقط على احد والاناث تقعد معززة مكرمة في بيتها ويجيها المقسوم الين البيت عاد انتم عارفين اهل الخير ما ينسونها جناح والا رجل والا كتف الجود من الموجود....

احنا اللي ربينا هالفيران بعاداتنا الدنيئة وقصر النظر ....الواحد اذا جاع يحسب انه ما يشبع...واذا شبع يحسب انه ما بيجوع!!!!وانت ماشي...(نحن قوم لانأكل حتى نجوع واذا اكلنا لانشبع)

المفترض ان الواحد ياكل اقل من حاجته بشي بسيط

احيانا اطلع انا وام فجر في اخر الليل ادور جو رومنسي على البحر... انا اطلع قبلها من البيت استكشف المنطقة اذا فيه فيران قلت لها في واحد مقفل على سيارتي...تخيلوا يوم تشوفني اشرد خايف من الفيران وش بتكون ردة فعلها..؟؟؟ كنت اقولها ايام الملكة اني قاتل الفيران ...وكنت احكي لها عن مغامراتي معهم وان الفيران ما تقدر تمر من قدامي!!!!!

الحين خلاص ماعاد لي هيبة من عقب طيحتي الاخير عند الباب ...خصوصا بعد ما انقطعت نعالي (تكرمون) خلاص ...كانت اشد عليهم من الار بي جي...كنت اقنصهم من على بعد امتار....وما تدري الا وفار مسدوح قدامك....

اذا شفت فار ميت ومبطوح على ظهره اعرف اني مريت من هالشارع....الان خلاص...يالله اقدر امشي..مافيني للمطاردات

ارحمونا من الفيران....الحين البس ما يرضى ياكل زي زمان ...زمان يالله يلقى له صرصور له ثلاثة ايام ميت ...والا فار مدعوس ريحته واصله لاخر الشارع ....الحين صار البس ماياكل الا دجاج مع التبع حقه ويكون حق اليوم...يعني لو تجيب له حق امس بيعرف ...ويرميه في وجهك...

كثرت الحشرات بشكل غير طبيعي والسبب احنا واسرافنا ...اي شي يزيد عن حاجتنا نرميه والمفترض اقل شي نعطيه لواحد ياكله وناخذ فيه اجر....
الحشرات مدري وش تاكل
الفيران تاكل حشرات
والبساس تاكل فيران
والسيارت تدعس البساس

هذي هي دورت الحياة

احنا خربنا هالدورة
صارت
الحشرات تاكل من الزبايل
والفيران تاكل من الزبايل
والبساس تاكل من الزبايل
السيارات توقف جنب الزبايل
!!!
علامة تعجب كبر صلعة زيدان تنتظر اجابة
......الله يرحم حالكم شوفوا لنا حل!!!!

اخوكم ابو فجر.. مروض الفيران....كتبت هالموضوع وانا مربط يدي اليسار ورجلي اليمين من اثر الطيحة
....وترون قلب المملكة خويي ...يعني اللي بيغلط علي ابكلمه يصكه باند

فمان الله ...ودعواتكم لي بالشفاء العاجل ...الظاهر رجلي بتطبي وهي ماطابت

الله يعطيك العافيه
وسلامات
ضحكتني
الله يوفقك
كلامك جميل
بس باقي <<<<<<<<<<<<<<<<<<<محلق الشنب<<<<واعيباه<<خخخخ

خخخخخخخخخخخخخخخخخخخخخ


الله يسعدك ياابو فجر


والله اني استانس يوم اشوف مواضيعك وسوالفك

مفروض يفتحون قسم في الواحه ويسمونه واحة البيزنطي >>متعوب على الاسم


اتمنى ان لاتحرمنا من جديدك


تحياتي

صدق الله يرحم زمان أول
الفيران والبساس تعلمت الشبعه
اول كانت تاكل اي شيء
تصدق عاد مره شفت فيران في العمارة اللي جنبنا تصرق منها اسمنت شكلها عندها مشاريع
اما العري هذاااااااا ماتوقعت احد يعرفه غيري يازين أيام الحاره
حاكم
امتعتنا بطرحك الظريف
مع تمنياتي لك بالشفاء العاجل

ههههههههههههههههههههههههههههه

الله يجعل الضحكه ماتفارقك