موضوعي صار له يومين والله وأنا وزوجي قاعدين نضرب أخماس بأسداس

وماحنا عارفين هل هو حلم وألا علم إللي صار لنا .. وأيش ذنبنا أساساً

والله إننا ناس حالها بشأنها مالنا دخل في أحد زوجي من دوامه للبيت للمسجد وإن

طلع .. يطلع بالسنة حسنة وبالنسبة لي والله إني إنسانة ماتحب الطلعات كثير ولا

وين راح فلان ووين راح علان .. نحترم إللي يحترمنا وإللي يأذينا نصد عنه مالنا دخل فيه

لكن من يومين صار معنا شئ من صاحب العمارة وماأقول إلا حسبي الله ونعم الوكيل


سمعت صوت ناس عند الدرج يتكلمون وكلامهم مرة كان جدي يعني مو سواليف عادية وفجأة

دقوا علينا الباب بقوووة ويدقون ورى بعض .. زوجي كان بالدوام يداوم حتى

الساعه أربعه ونص وأنا طبعاً مافتحت

خفت كثير ونزلوا كملوا دقهم من تحت من عند الباب وكانوا بيحرقوا الجرس .. وطبعاً

مارديت وعلى طول كلمت زوجي ناس يدقون الباب حقنا بطريقة جنونية تعال شوف الحكاية

وهو إستغرب ودق على جارنا اللي يرجع من دوامه 3 تقريباً والسالفه صارت الساعه

4 العصر .. وقاله هذا راعي العمارة معاه واحد لابس مدني وشرطي ..!

وقال لي اقولك إنك تدفع أربعة شهور إللي عليك وتخلي البيت بعد عشرة أيام ..

زوجي كلمه قاله ليش تسوي كذا ترى مالك حق أنا دفعت الإيجار حق ستة

شهور عند المكتب وعندي وصل من المكتب يثبت صحه كلامي ..

رد عليه صاحب العمارة يقول إنت أعطيت الموظف حق المكتب وهو سوداني وألحين

السوداني هرب وماأعطى المكتب ولا ريال والسوداني مو على كفالة المكتب .. ويقول

الموضوع خرج من يده وإذا عند عندك شئ تفاهم مع المباحث ..؟

راح زوجي بالوصل يستفسر عن السالفه عند صاحب عقار ثاني ووراه السند .. وقاله

السند مو سليم للأنه مو مختوم بختم المكتب والتوقيع مايكفي ؟؟؟


ألحين زوجي مرة متخوف من سالفة التوقيف للأنه مرة توقف يوم واحد وبغى ينجن

من إللي شافه .. غير كذا صاحب العمارة ماأعطانا إنذار بالسداد من قبل أو أستدعاء

من الشرطة على طول جابهم ودقوا بابنا ..! هل لهم حق ؟

طول الأربعة شهور ماوصلنا أي إنذار ..حتى نتفاهم عالموضوع ونعرف اشلون

ماوصل لهم الإيجار ؟

وهل السند سليم بدون ختم ..؟

وتخيلوا إنه مو بس طردنا طرد حتى جيراننا واحد باقي على عقده أسبوع قاعد

يتكلم عليه بطريقة خبيثة حتى خلاه ينقل بنفس اليوم إللي جانا فيها وسكن عند زوج أخته

والثالث مسافر قال نقوله باقي على عقده عشرة أيام ترى ماراح أجدد له لو طلب تجديد العقد ؟

بلييييييييييز وشلوون نتصرف .. والله كرهنا البيت من بعد هذي السالفة

للأن صاحب العمارة قال أطلعوا كلكم ماأبي أحد عندي بالعمارة هنا ..

والله يشهد علي إننا كلنا الثلاث دافعين له الإيجارات بوقتها

باين من كلامك ان صاحب العماره مايبي يجدد العقد لاحد لانك تقولين طرد جميع السكان ورفض يجدد


يمكن يبي يبيع عمارته ولا جاه مستاجرين جدد وبيدفعوا اكثر من اللي تدفعونه له

وبالنسبه للايجار >>زوجك غلطان انه ماتاكد من الختم والمفروض انه اعطى صاحب العماره الفلوس في يده

لانها حق سته شهور


ماادري ايش اقول بس


الله ينصركم على من ظلمكم ويرزقكم من حيث لاتحتسبون

طيب انا اقترح انكم تطلعون لن صاحب العمارة واضح انة طلع الكل ؟؟؟ بس تاكدوا ان السوداني فعلا هرب لايكون حركة متعودين يسوونها للحتيال على الناس واخذ اموالهم والله ياختي الواحد صار يدفع البلاء عنة وعن اهلة اتركوا المكان عشان لاتكبر المشكلة والله يعوضكم خير بس اهم شي سلامة النفس .. من ان زوجك يبتلي باحد منهم سوو زي جيرانكم اعتقد انهم اختارو الحل المناسب الله يعوضكم حاولو تسكنوا عن ناس يعني تستاجرو عن صاحب بيت افضل من المجمعات السكنية اللي يكثر فيها الاحتيال موفقين ان شاء الله

حسبي الله ونعم الوكيل
الله ينصركم ليش ماتكلم من قبل عشان تتفاهمون مع اللي كتب العقد
طيب مافي شهود وقت كتابة العقد
واذا ضاقت عليكم وماطلع لكم حق عوضكم على الله
الله مايضيعكم

لاحول ولا قوة الا بالله

الله يكون بالعون
وغريبة انسان زي هذا تستاجرون عندة المفروض شفتو تصرفاتة كدا سحبتو علية

لاتعليق ......

حسبنا الله ونعم الوكيل الله يكون بعونكم ويفرج همكم

الادمي ذا شكله جايه سوم في عمارته ومالقى الا ذا الطريقة اما شغلة السوداني ذي ماهي راضية تدخل في راسي وين صاحب المكتب عنه وكيف يخلي الفلوس عنده لمدة طويلة و...

مااقول الا الله يفرج عنكم

الله يجازيه يااختي
لكن ابقولك شي ..
باين عليه انه طمعان في الشقق ويبي يأجرها على ناس او شركه وعارضين عليه مبلغ وقدره .
ولا مافي احد يطلع مستأجرين من عمارته او يقول ماراح اجدد العقد .. الا وهو ضامن انه بيجي غيرهم
فأنا من رأيي ياختي تكلمين زوجك وتشوفون شقه غيرها
وااما سالفة حق اربعه شهور الله يجازي السوداني بفعلته يارب
وحاولو تدبرونها من هنا ولا من هنا اذا الشرطه ماتفهمت الوضع .. وتعطون الرجال حقه
والنصيحه انكم تدورون شقه غيرها

تقبلي مروري

راح زوجي المحكمة وقالوله لازم تعطي المالك حقه

قالهم أنا سددت لمكتب العقار اللي هو متعامل معاه المالك

وغير كذا أنا لما حان موعد سداد الإيجار قبلها بأسبوع كلمنا المالك

وقال أعطوها مكتب العقار وهذا بناء على رغبته وأنا أعطيتها

الموظف السوداني والإيصال معاي .. ووراهم الإيصال وقال لازم

تعطي المالك حقه وإلا نحطك بالتوقيف وهذي أوامر الأمير سلمان

في حالة تقعص المستأجر أو إبداء عدم الرغبة بالسداد يشتكي عليه

المالك على طول ويمسكون المستأجر ويكفله كفيل الكفيل هذا من الشروط إنه له

ملك بنفس المنطقة وإلا يتوقف المستأجر توقيف إجباري .. وذلك لتذمر الملاك من المستأجرين؟

قال له زوجي أنا ماتأخرت عن السداد والمفروض تجيبون مكتب العقار يحضر كمان هو

لازم ناخذ أقواله للأني أنا مظلوم ..

وتخيلوا أيش رد عليه ..؟

قال له إنت ألحين سدد حق المالك .. وإذا تبي بعدين داعي على راعي المكتب إنت ..

وفعلأً تم سداد أربعة شهور تم سدادها مُسبقاً في المحكمة

وفي حالة الرغبة بإكمال الشهرين الباقية لابد من سدادها وللتخفيف على المستأجر يتم الدفع كل شهر فترة الإقامة ..!

وحسبنا الله ونعم الوكيل

شكراً على ردودكم والله يعطيكم العافية ماتقصرون ودعواتكم لنا خففت عني كثير

وأنا أستغرب إنهم ماينظرون لحالنا المستأجرين ومن تذمر للإرتفاع الإيجارات

علينا بأسعار رهيبة وبدون وجه حق ..

مع إني متأكده إنهم بيقولوا خذوا بيت على قد فلوسكم

مع إن حتى الأحياء الزبالة وأنتم بكرامة والبيوت القديمة يرفعون إيجاراتها

ماأدري لو إنهم يبنون عشش وخيام وصنادق ويقولون هذي بيوت نأجرها

لذوي الدخل المحدود

قاضيان في النار وقاضي بالجنه


المفروض رجالك خلاه يحلف يمين غموس او حلف زوجك


وانا لو مكان رجالك وربي لخليه ينجن وانا ماطلعت قبل عقدي واذا انتهى العقد لخليه سنه كاملة ما جلسة معه عند الشيخ لان الشرطه ترسل طلبين للحضور للمركز الشرطه واذا ماخضرت بعدها الطلب الثالث الحضور بالخفاره يعني يجبونك من اي مكان مخفور بالدورية وتحاول تحل الموضوع بطريقة وديه واذا ماحلته احالتكم للمحكمه والمحكمه نفس الشي ثلاث طلبات بين كل طلب والثاني فتره من ثلاث شهور لي خمسه وبعد الطلب الثالث يطلب اليمين الغموس وهذا يمين كارثي على الكذاب والله يعاقب اللي يحلف فيه كاذب عقاب شديد فالدنيا والاخره

والله اعرف رجال حلف باليمن زور والله كانوا عياله اربعه ثلاثه ماتوا مع امهم في سنتين وكلهم حوادث الله لايبلانا وهو مقتنع ان هذا عاقب من الله وسببه حلفه باليمن كذب .....


ياليتك تابعه لمركز الحمراء بالرياض كان اشيب فيه شيب لكن قدر الله وما شاء فعل وقصر الشر نعمه وغنيمه