[align=center]
السلام عليكم ورحمة الله وبركاته

اخواني انا بقولكم تجربتي وممكن تكون نادره ولكن قد تحصل بيوم من الايام لواحد منكم مثل ماحصل لي انا
الله يسخر من يشاء وهو على كل شي قدير
القصه :

بيوم من الايام كنت ضايق وحالتي تشكى ع الله كلمت واحد من اخوياي وقلت ابي سيارتك بروح عليها مشوار

اخذت سيارة الرجال وتوجهة للمطار وتصدقون بالله مامعي ريال واحد ,, مامعي الامفاتيح السياره ومحفظتي تهفهف مابها الا الضعوي طفران ع الحديده

المهم رحت لصالة القدوم وانطقيت بالسياره بين اني انزل واشوف ركاب يبون احياء الرياض
وبين خوف من المرور وبين حياء ,,المهم اختلطت عندي اشياء شكثرها ومنعتني من النزول

جلست ساعات طويله بالسياره رايح جاي ع المطار

بعد شوي لقيت واحد واقف برا كل الي معاهم سيارات خلوه ما اخذوه

وواقف ينتظر لموزين المهم وقفت عنده طلع من الجنسيه الهنديه

يعني ( هنــــدي ) المهم قلت وين تبي قال ابي الحي الفلاني قلت اوكي مشينا

قال مافيه الا 15 ريال تبي ولا بكيفك

تخيلوا من المطار للشميسي 15 ريال .. مستحيل احد يوصله

بس انا من زود الطفره وقلة معرفه وعلى قولت المثل القليل يأتي بالكثير اركبته معي

وطول الطريق يسولف ومن ضمن سواليفه سألني قال انت ماشاء الله سعودي وشباب ليش تاخذني بالمبلغ هذا

قلت والله يابو هنووود من الطفره ولعنت الخير ولا وش مخليني اطق هالمشوار بـ 15 ريال

قال ماتشتغل قلت لا والله عاطل باطل سلتوح ماعندي شي

المهم جلس يسولف لي عن الشباب السعودي وتركهم للشركات وعدم جديتهم بالشغل

قبل نوصل الحي قال انا مدير شركه وعطني رقمك وراح اتصل عليك بعد فتره

انا ماصدقت خبر عطيته رقمي مع العلم ورب البيت اني ماصدقته وتوقعت ماراح يتصل

الكلام هذا على ماعتقد يوم الثلاثاء او الاثنين

المهم نزلته ومشيت حتى جواله ما اخذته

رحت وحطيت بالسياره 10 ريال بانزين وبقى 5 ريال شي حلو ونعمه اقل شي فيه مبلغ معي

عطيت الرجال السياره وشكرته ورحت للبيت جلست نسيت كل الي صار

بس بيني وبينكم حسسسسيت اني سويت انجاز اليوم واشتغلت وحسيت باحساس غريب

صدقوني الشغل والله له لذه مايعرفها الا العاطل

المهم جاء اليوم الثاني بحدود الساعه 10 الصباح الا جوالي يرن يرن يرن رقم تلفون

رديت الو مين قال معك فلان الي وصلتني امس

تكلمت معه شوي قال تقدر تجي الحين للشركه وعطاني العنوان

تتوقعون وش سويت ..؟

مافرحت ولا شي

لان فيه مشكله واجهتني

مامعي فلوس طفران اروح بلموزين ,, والناس بالدوام مدري شلون اروح

حسيت بخيبة امل غير طبيعيه يعني الفرصه قدامي الان وماقدر اروح

واذا مارحت له وش بيقول هذا نصاب مايبي شغل لو يبي كان جاء ومن هالكلام

المهم نزلت للشارع ابي اي لموزين سعودي وابي اركب معه واذا مشينا بشرح له ظرفي

اذا هو رجال بيقدر موقفي ويبي يفزع لي وماراح انساه واذا هو رخمه بينزلني

هذا الي حطيت ببالي

المهم بعد كم دقيقه الا هذي لموزين سعودي ركبت معه ومحتار اكلمه الحين ولا اذا وصلنا ومحتار وطايح بنار

بعد ماجينا نص الطريق قلت له السالفه وشرحت له قصتي من طقطق لسلام عليكم

قال مايصير خاطرك الا طيب وابشر لو تبي اسلفك قلت لا ماتقصر بس ابي توصلني وهذا الشي اعتبره معروف مانساه طول عمري

المهم وصلني قابلت المدير وجلست معه وتكلمنا عن الشغل

بعد ماخلصنا من الكلام .. قال يوم السبت تقدر تباشر العمل ..؟

انا ماصدقت خبر قلت ايه اقدر ليه ماقدر ابشر يوم السبت الساعه كم تبي اجي

قال الساعه 8 تكون هنا بس الحين بنوقع العقد قلت اوكي

والله وثم والله ماصدقت الي شفته يوم وقعت العقد

من خلال المكتوب بالعقد طاحت عيني ع الراتب ادوره وينه

وكنت حاط ببالي 2000 واذا طار وصل 2500

لقيت الراتب 3500 + بدل مواصلات + بدل سكن وتأمين طبي

والله شوي واقوم ابوس راسه

المهم طلعت وانا مافكرت شلون ارجع للبيت
لو انتظر لين الساعه 3 واكلم احد من ااخوياي يجي وياخذني

لما طلعت حصلت صاحبي الي وصلني للشركه ينتظرني برا

قسم بالله ماني مصدق ذاك اليوم الي حصل (( الدنياء لازالت بخير ))

وانحرجت وماقدرت اتكلم قال اركب بس وخلني اوصلك البيت

مشينا وسألني انقبلت ولا لا وقلت ابشرك قبلوني والدوام السبت

قال مابي منك الا تدعي لي بس

ومن خلال سواليفنا وعن التقديم عن طريق النت

تكلم عن هالموقع هذا ( منتدى البطاله )

قال ان فيه وظائف وفيه وفيه وفيه

قلت له اني مشترك فيه

وطلع هو صاحب الموزين واحد من الاعضاء
لكن الي قاهرني ماعطاني اسمه شنو بالمنتدى

واتوقع انه راح يقراء موضوعي الان بس اتمنى ومن كل قلبي انه يتواصل معي

لانه فرج عني كربه الله يفرج عنه كربات يوم القيامه

وهذي قصتي كلها



الخلاصه او بمعنى اخر (الزبده )من القصه

1: لاتجلس بالبيت اي فرصة شغل تجيك شريفه ولاتمس الدين والسمعه بشي اشتغلها لانها بتجيب لك رزق جديد وتفتح لك ابواب ماتتوقعها

2: لاتستهين باحد مهما كان هذا الهندي رفضوا الكل ياخذونه لان الله سخره لي انا ,, واخذته بالمبلغ هذا ( 15 ريال ) والمبلغ هذا جاب لي وظيفه براتب ماحلمت فيه طول عمري

3: لاتحط راسك وتنام اذا جتك فرصة عمل وتقول من وين لي اروح للشركه ابتكر اي طريقه توصلك ومثل ماسويت انا تكلمت مع صاحب الموزين وشرحت له ظروفي وكان سعيد جدا انه قدم لي هالخدمه ويبي الاجر والدعاء له بظهر الغيب

4 : كلي اسف ع الاطاله واسمحولي اذا خانني التعبير بكتابة تجربتي


واتمنى ومن كل قلبي الدعاء لي ولجميع بنات وشباب المسلمين بسعة الرزق وبالزواج وبالراحه بالدنياء والاخره

[/align]

يسلمـــــووو خيــــــــــــــووو

والله يوفقكـ يالغالــــــــــــي

الله يزيدك من خيره ياخوووي,,,
وبارك الله لك في شغلك..واسعدك فالدارين
انا استمتعت بقصتك..الله يرزق العاطلين..
فعلآ الواحد مايدري وش المكتوب له فهالدنيا..احسن نيتك لله يرزقك من خيره ..ويزيدك ..وينفع بك
واخيرآ اتمنى لك التوفيق..واتمنى لك النجاح في عملك
.
.
.
تقبل مرور>اختك تحب العسكريه

سبحــآإن الله .. ربي كآتب لك ياخوي انك تاخذسيارة خويك وتقابل هالهندي

الله يوسع لك في رزقك ويرزق خوينا راعي التكسي كل خير

قصه رآآئعه ’, سلمت

الحمد لله الدنيا باقي بخير

الله يوفقك في وظيفتك

الله يوفقك ........ ويوفق كل الي ساعدوك من صديقك للهندي لصاحب التاكسي

مبروووووووووك

الله يوفقك ان شاء الله

الله يباركلك فيما اعطاك

الله يوسع برزقك ويزوجك ويفتح لك ابواب الرزق سرد ووطريقتك كتابتك رائعه

والله يجزاه خير صاحبك وربي مايضيع اجره

سبحان الله قبلت بالقليل وكان فاتحت خير عليك



دمت بخير وسعاده


وثيقه مرت من هون

لاحرمني الله دعاءكم

ولاحرمت من هالطله

تشكراتي لكم