05-06-2010, 04:53 PM
|
 |
عضو نشيط
|
|
تاريخ التسجيل: Jan 2010
المشاركات: 151
معدل تقييم المستوى: 33
|
|
منقولة من العضوء صبور الى العبور
السلام عليكم ورحمة ورحمة الله
مسائكم / صباحكم عسل
أحب أفيد كل اللي عنده مقابله بالمباحث في الجوف ، وأسرد لكم قصة مقابلتي اليوم
أنا تم قبولي مبدئياً في الجوف وكانت المقابلة يوم السبت بتاريخ :22/06/1431 هـ في تمام الساعة السادسة صباحاً ، يعني اليوم
المهم انا من سكان جدة ووصلت سكاكا الساعه 12 الصباح ، وأستأجرت شقة ونمت ، وللأسف راحت علي نومه وماحيت إلا الساعه 6:20 الصباح
وصحيت مثل المجنون  ولبست الثوب مقلوب
المهم طرت على مقرهم ووصلت حوالي الساعه 6:30 الصباح
طبعاً عنوانهم اللي بالنت وهو ( حي السديرية ـ خلف مبنى الجوازات ) خطأ . هذاك موقعهم القديم ، ونقلوا للموقع الجديد ماعرف وين بالضبط بس بحاول أوصفه .
* أول ماتدخل سكاكا من الشارع العام تمشي على طول ، وأي دوار تقابله ( تاخذه بوجهك ) على قولة أهل المنطقة حين أسئلهم . ياحليلهم والله أنهم كفو بعد حيي .
المهم تمشي على طول لحد مايقابلك مبنى يشبه قصر المصمك بالرياض تحت الإنشاء أعتقد أنه مشروع للحكير . يقابلك في اليمين ، بعد ماتعدي المبنى أول مدخل في اليسار تدخل معاه ، وتمشي شوي تلاقي المبنى عليه صبات .
المهم وصلت ولقيت المتقدمين صافين طابور عند الباب ، وعند الباب مجموعة عسكر ومعاهم كشف ، تعطيهم الهوية وإذا لقيوا اسمك بالكشف تدخل .
دخلنا ومشينا شوي بالحوش ووصلنا عند عسكري ثاني جالس على طاوله ، يطلب منك الجوال وياخذه ويحطه بكيس ويكتب عليه اسمك ورقم هويتك ونوع الجوال ، ويقولك طلع اللي بمخباك ، مثل الولاعات .... الخ . وبعدين يفتشك تفتيش مطارات .
المهم : دخلنا بعد كذا قاعه كبيره فيها كراسي وطاولات وعليها أقلام وأوراق A4 ويقولون لك أكتب الإستدعاء ( المعروض ) وتلاقي على الطاولات نموذج جاهز للإستدعاء تكتب مثله بخط يدك ، وكمان تلاقي نموذج بالطلبات وطريقة ترتيبها .
المهم بعد ماتخلص من كتابة الإستدعاء وتكمل ملفك ، هناك لجنة تنادي بالأسماء وحين تسمع أسمك تروح لهم وتعطيهم ملفك ، ويعطونك نموذج مطبوع مكون من 4 اوراق يقولون لك تأكد من معلوماتك في الصفحة الأولى وأكتب اسمك وتوقيعك في الصفحة الثالثة .
بعد كذا تنتظر في هالقاعه ويجمعون الملفات ، ويجي عسكري ينادي بالأسماء على شكل مجموعات وياخذ المجموعه اللي يناديها مدري وين 
المهم شوي ونادى في اسمي من ظمن مجموعه ، واخذونا لقاعه ثانيه مثل قاعات الجامعات ، وقالوا . نزلوا الأشمغة والطواقي العُقل . وشمروا عن سواعدكم وعن اقدامك يعني تشمر عن يدك لين المرفق وعن رجلك لين الركبه ، وتنزل الشبشب ( أكرمكم الله )
بعد كذا يجي عسكري ينادي بأسماء ثلاثه ثلاثه ، وتنتظر عند غرفة الكشف ، وبعد مايطلع اللي قبلك تدخل الغرفه أول ماتكشف على النظر ، وبعدين تروح للميزان وتقيس الطول والوزن . ويكتبون على ملفك ، عاد انت ماتدري وش كتبوا ، وكم طلع طولك وكم طلع وزنك . وبعدين تطلع من الغرفه وتنتظر عند الغرفة الثانية ،،، غرفة المقابلة الشخصية . وحين يطلع اللي قبلك تدخل وتلاقي 5 ظباط ، واحد ببدلة مكتبية و 2 ببدلة ميدانية و2 بالزي السعودي المدني .
ويسئلونك اسئله مختلفه ، وعلى حسب ماجمعت من الشباب اللي دخلوا قبلي . اللي يقول سئلوني من هو محافظ دومة الجندل ، أو كم رقم هويتك ، أو كم رقم هوية أبوك . أو ماهي اطول آيه في القرآن . أنا سئلوني ايش اسمك ، وعطيتهم أسمي رباعي . وكمان سئلوني وش عندك شهادات . ونثرت لهم كل شهاداتي <<- تكفى يالبروفسور . 
المهم قال لي واحد فيهم خلاص روح 
وطلعت وانا مبـثـــ ــــوط .
والحين بكتب لكم نص الإستدعاء ( المعروض )
لأني سرقت نسخة من هناك ،،، لا لا ماسرقت 
كتبت في ورقه نفس اللي مكتوب وخبيتها في مخباي .
وإليكم نص الإستدعاء .
.................................................. ................
بسم الله الرحمن الرحيم
المكرم / قائد مركز التدريب الوطني بالجوف المحترم
السلام عليكم ورحمة الله وبركاته
أفيدكم بأنني أرغب في الإلتحاق بالدورة التأهيلية الخاصة في مركز التدريب الوطني بالجوف ، وذلك لخدمة ديني ثم مليكي ووطني . ولكم مني جزيل الشكر وخالص الدعاء .
والله الموفق ،،
العنوان :ـ
المؤهلات العلمية إن وجدت
جوال :ـ
تليفون :ـ
مقدمة /
الإسم :ـ
رقم الطلب :ـ
التوقيع :ـ
.................................................. ..................................
وتقبلوا تحياتي ،،، ولاتحرموني من دعائكم الصالح .
|
العرض العادي
